9. сантатимаха̄маттаваттху

алан̇като чепӣти имам̣ дхаммадесанам̣ саттха̄ джетаване вихаранто сантатимаха̄маттам̣ а̄раббха катхеси.

со хи екасмим̣ ка̄ле ран̃н̃о пасенадикосаласса паччантам̣ купитам̣ вӯпасаметва̄ а̄гато. атхасса ра̄джа̄ тут̣т̣хо сатта диваса̄ни раджджам̣ датва̄ екам̣ наччагӣтакусалам̣ иттхим̣ ада̄си. со сатта диваса̄ни сура̄мадаматто хутва̄ саттаме дивасе сабба̄лан̇ка̄рапат̣иман̣д̣ито хаттхиккхандхаварагато нха̄натиттхам̣ гаччханто саттха̄рам̣ пин̣д̣а̄йа пависантам̣ два̄рантаре дисва̄ хаттхиккхандхаварагатова сӣсам̣ ча̄летва̄ вандитва̄ пакка̄ми. саттха̄ ситам̣ катва̄ ‘‘ко ну кхо, бханте, ситапа̄тукаран̣е хетӯ’’ти а̄нандаттхерена пут̣т̣хо ситака̄ран̣ам̣ а̄чиккханто а̄ха – ‘‘пасса̄нанда, сантатимаха̄маттам̣, аджджа сабба̄бхаран̣апат̣иман̣д̣итова мама сантикам̣ а̄гантва̄ чатуппадикага̄тха̄васа̄не арахаттам̣ патва̄ саттата̄ламатте а̄ка̄се нисӣдитва̄ паринибба̄йиссатӣ’’ти. маха̄джано тхерена саддхим̣ катхентасса саттху вачанам̣ ассоси. таттха миччха̄дит̣т̣хика̄ чинтайим̣су – ‘‘пассатха саман̣асса готамасса кирийам̣, мукхаппаттамева бха̄сати, аджджа кира еса евам̣ сура̄мадаматто йатха̄лан̇катова етасса сантике дхаммам̣ сутва̄ паринибба̄йиссати, аджджева там̣ муса̄ва̄дена нигган̣хисса̄ма̄’’ти. самма̄дит̣т̣хика̄ чинтесум̣ – ‘‘ахо буддха̄нам̣ маха̄нубха̄вата̄, аджджа буддхалӣл̣ан̃чева сантатимаха̄матталӣл̣ан̃ча дат̣т̣хум̣ лабхисса̄ма̄’’ти.

сантатимаха̄маттопи нха̄натиттхе дивасабха̄гам̣ удакакӣл̣ам̣ кӣл̣итва̄ уййа̄нам̣ гантва̄ а̄па̄набхӯмийам̣ нисӣди. са̄пи иттхӣ ран̇гамаджджхам̣ отаритва̄ наччагӣтам̣ дассетум̣ а̄рабхи. тасса̄ сарӣралӣл̣а̄йа дассанаттхам̣ сатта̄хам̣ аппа̄ха̄рата̄йа там̣ дивасам̣ наччагӣтам̣ дассайама̄на̄йа антокуччхийам̣ саттхакава̄та̄ самут̣т̣ха̄йа хадайамам̣сам̣ кантитва̄ агамам̣су. са̄ тан̇кхан̣ан̃н̃ева мукхена чева аккхӣхи ча виват̣ехи ка̄ламака̄си. сантатимаха̄матто ‘‘упадха̄ретха на’’нти ватва̄ ‘‘нируддха̄, са̄мӣ’’ти ча вуттаматтейева балавасокена абхибхӯто тан̇кхан̣ан̃н̃евасса сатта̄хам̣ пӣтасура̄ таттакапа̄ле удакабинду вийа париккхайам̣ агама̄си. со ‘‘на ме имам̣ сокам̣ ан̃н̃е нибба̄петум̣ саккхиссанти ан̃н̃атра татха̄гатена̄’’ти балака̄йапаривуто са̄йанхасамайе саттху сантикам̣ гантва̄ вандитва̄ евама̄ха – ‘‘бханте, ‘еварӯпо ме соко уппанно, там̣ ме тумхе нибба̄петум̣ саккхиссатха̄’ти а̄гатомхи, пат̣исаран̣ам̣ ме хотха̄’’ти. атха нам̣ саттха̄ ‘‘сокам̣ нибба̄петум̣ саматтхассева сантикам̣ а̄гатоси. имисса̄ хи иттхийа̄ имина̄ва а̄ка̄рена матака̄ле тава родантасса паггхаритаассӯни чатуннам̣ маха̄самудда̄нам̣ удакато атирекатара̄нӣ’’ти ватва̄ имам̣ га̄тхама̄ха –

‘‘йам̣ пуббе там̣ висосехи, паччха̄ те ма̄ху кин̃чанам̣;

маджджхе че но гахессаси, упасанто чариссасӣ’’ти. (су. ни. 955, 1105; чӯл̣ани. джатукан̣н̣има̄н̣авапуччха̄ниддеса 68);

га̄тха̄парийоса̄не сантатимаха̄матто арахаттам̣ патва̄ аттано а̄йусан̇кха̄рам̣ олокенто тасса аппаваттанабха̄вам̣ н̃атва̄ саттха̄рам̣ а̄ха – ‘‘бханте, паринибба̄нам̣ ме ануджа̄на̄тха̄’’ти. саттха̄ тена катакаммам̣ джа̄нантопи ‘‘муса̄ва̄дена нигган̣ханаттхам̣ саннипатита̄ миччха̄дит̣т̣хика̄ ока̄сам̣ на лабхиссанти, ‘буддхалӣл̣ан̃чева сантатимаха̄матталӣл̣ан̃ча пассисса̄ма̄’ти саннипатита̄ самма̄дит̣т̣хика̄ имина̄ катакаммам̣ сутва̄ пун̃н̃есу а̄дарам̣ кариссантӣ’’ти саллаккхетва̄ ‘‘тена хи тайа̄ катакаммам̣ майхам̣ катхехи, катхенто ча бхӯмийам̣ т̣хито акатхетва̄ саттата̄ламатте а̄ка̄се т̣хито катхехӣ’’ти а̄ха. со ‘‘са̄дху, бханте’’ти саттха̄рам̣ вандитва̄ еката̄лаппама̄н̣ам̣ уггамма орохитва̄ пуна саттха̄рам̣ вандитва̄ уггаччханто пат̣ипа̄т̣ийа̄ саттата̄лаппама̄н̣е а̄ка̄се паллан̇кена нисӣдитва̄ ‘‘сун̣а̄тха ме, бханте, пуббакамма’’нти ватва̄ а̄ха –

ито еканавутикаппе випассӣсамма̄самбуддхака̄ле ахам̣ бандхуматинагаре екасмим̣ куле ниббаттитва̄ чинтесим̣ – ‘‘ким̣ ну кхо паресам̣ чхедам̣ ва̄ пӣл̣ам̣ ва̄ акаран̣акамма’’нти упадха̄ренто дхаммагхосакакаммам̣ дисва̄ тато пат̣т̣ха̄йа там̣ каммам̣ каронто маха̄джанам̣ сама̄дапетва̄ ‘‘пун̃н̃а̄ни каротха, упосатхадивасесу упосатхам̣ сама̄дийатха, да̄нам̣ детха, дхаммам̣ сун̣а̄тха, буддхаратана̄дӣхи садисам̣ ан̃н̃ам̣ на̄ма наттхи, тин̣н̣ам̣ ратана̄нам̣ сакка̄рам̣ каротха̄’’ти уггхосенто вичара̄ми. тасса майхам̣ саддам̣ сутва̄ буддхапита̄ бандхуматимаха̄ра̄джа̄ мам̣ паккоса̄петва̄, ‘‘та̄та, ким̣ каронто вичарасӣ’’ти пуччхитва̄, ‘‘дева, тин̣н̣ам̣ ратана̄нам̣ гун̣ам̣ пака̄сетва̄ маха̄джанам̣ пун̃н̃акаммесу сама̄дапенто вичара̄мӣ’’ти вутте, ‘‘каттха нисинно вичарасӣ’’ти мам̣ пуччхитва̄ ‘‘падаса̄ва, дева̄’’ти майа̄ вутте, ‘‘та̄та, на твам̣ евам̣ вичаритум̣ арахаси, имам̣ пуппхада̄мам̣ пиландхитва̄ ассапит̣т̣хе нисиннова вичара̄’’ти майхам̣ мутта̄да̄масадисам̣ пуппхада̄мам̣ датва̄ дантам̣ ассам̣ ада̄си. атха мам̣ ран̃н̃а̄ диннапариха̄рена татхева уггхосетва̄ вичарантам̣ пуна ра̄джа̄ паккоса̄петва̄, ‘‘та̄та, ким̣ каронто вичарасӣ’’ти пуччхитва̄ ‘‘тадева, дева̄’’ти вутте, ‘‘та̄та, ассопи те на̄нуччхавико, идха нисӣдитва̄ вичара̄’’ти чатусиндхавайуттаратхам̣ ада̄си. татийава̄репи ме ра̄джа̄ саддам̣ сутва̄ паккоса̄петва̄, ‘‘та̄та, ким̣ каронто вичарасӣ’’ти пуччхитва̄ ‘‘тадева, дева̄’’ти вутте, ‘‘та̄та, ратхопи те на̄нуччхавико’’ти майхам̣ махантам̣ бхогаккхандхам̣ маха̄паса̄дханан̃ча датва̄ екан̃ча хаттхим̣ ада̄си. сва̄хам̣ сабба̄бхаран̣апат̣иман̣д̣ито хаттхиккхандхе нисинно асӣти вассасахасса̄ни дхаммагхосакакаммам̣ ака̄сим̣, тасса ме еттакам̣ ка̄лам̣ ка̄йато чанданагандхо ва̄йати, мукхато уппалагандхо ва̄йати. идам̣ майа̄ катакамманти.

евам̣ со аттано пуббакаммам̣ катхетва̄ а̄ка̄се нисиннова теджодха̄тум̣ сама̄паджджитва̄ паринибба̄йи. сарӣре аггиджа̄ла̄ ут̣т̣хахитва̄ мам̣салохитам̣ джха̄песи, суманапуппха̄ни вийа дха̄туйо авасиссим̣су. саттха̄ суддхаваттхам̣ паса̄реси, дха̄туйо таттха патим̣су. та̄ патте паккхипитва̄ чатумаха̄патхе тхӯпам̣ ка̄реси ‘‘маха̄джано вандитва̄ пун̃н̃абха̄гӣ бхависсатӣ’’ти. бхиккхӯ дхаммасабха̄йам̣ катхам̣ самут̣т̣ха̄песум̣, ‘‘а̄вусо, сантатимаха̄матто га̄тха̄васа̄не арахаттам̣ патва̄ алан̇катапат̣ийаттойева а̄ка̄се нисӣдитва̄ париниббуто, ким̣ ну кхо етам̣ ‘саман̣о’ти ваттум̣ ват̣т̣ати уда̄ху бра̄хман̣о’’ти. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄ ‘‘има̄йа на̄ма̄’’ти вутте, ‘‘бхиккхаве, мама путтам̣ ‘саман̣о’типи ваттум̣ ват̣т̣ати, ‘бра̄хман̣о’типи ваттум̣ ват̣т̣атийева̄’’ти ватва̄ дхаммам̣ десенто имам̣ га̄тхама̄ха –

142. алан̇като чепи самам̣ чареййа,

санто данто нийато брахмача̄рӣ;

саббесу бхӯтесу нидха̄йа дан̣д̣ам̣,

со бра̄хман̣о со саман̣о са бхиккхӯ’’ти.

таттха алан̇катоти ваттха̄бхаран̣ехи пат̣иман̣д̣ито. тассаттхо – ваттха̄лан̇ка̄ра̄дӣхи алан̇като чепи пуггало ка̄йа̄дӣхи самам̣ чареййа, ра̄га̄дивӯпасамена санто индрийадаманена данто чатумагганийамена нийато сет̣т̣хачарийа̄йа брахмача̄рӣ ка̄йадан̣д̣а̄дӣнам̣ оропитата̄йа саббесу бхӯтесу нидха̄йа дан̣д̣ам̣. со еварӯпо ба̄хитапа̄патта̄ бра̄хман̣отипи самитапа̄патта̄ саман̣отипи бхиннакилесатта̄ бхиккхӯтипи ваттаббойева̄ти.

десана̄васа̄не бахӯ сота̄паттипхала̄дӣни па̄пун̣им̣сӯти.

сантатимаха̄маттаваттху навамам̣.