3. саббахулакума̄ракаваттху

сукхака̄ма̄ни бхӯта̄нӣти имам̣ дхаммадесанам̣ саттха̄ джетаване вихаранто самбахуле кума̄раке а̄раббха катхеси.

екасмин̃хи самайе саттха̄ са̄ваттхийам̣ пин̣д̣а̄йа пависанто антара̄магге самбахуле кума̄раке екам̣ гхарасаппаджа̄тикам̣ ахим̣ дан̣д̣акена пахаранте дисва̄ ‘‘кума̄рака̄ ким̣ каротха̄’’ти пуччхитва̄ ‘‘ахим̣, бханте, дан̣д̣акена пахара̄ма̄’’ти вутте ‘‘ким̣ ка̄ран̣а̄’’ти пуна пуччхитва̄ ‘‘д̣ам̣санабхайена, бханте’’ти вутте ‘‘тумхе ‘аттано сукхам̣ карисса̄ма̄’ти имам̣ пахаранта̄ ниббаттаниббаттат̣т̣ха̄не сукхала̄бхино на бхависсатха. аттано сукхам̣ паттхентена хи парам̣ пахаритум̣ на ват̣т̣атӣ’’ти ватва̄ анусандхим̣ гхат̣етва̄ дхаммам̣ десенто има̄ га̄тха̄ абха̄си –

131. ‘‘сукхака̄ма̄ни бхӯта̄ни, йо дан̣д̣ена вихим̣сати;

аттано сукхамеса̄но, печча со на лабхате сукхам̣.

132. ‘‘сукхака̄ма̄ни бхӯта̄ни, йо дан̣д̣ена на хим̣сати;

аттано сукхамеса̄но, печча со лабхате сукха’’нти.

таттха йо дан̣д̣ена̄ти йо пуггало дан̣д̣ена ва̄ лед̣д̣уа̄дӣхи ва̄ вихет̣хети. печча со на лабхате сукханти со пуггало паралоке мануссасукхам̣ ва̄ диббасукхам̣ ва̄ параматтхабхӯтам̣ ва̄ нибба̄насукхам̣ на лабхати. дутийага̄тха̄йа печча со лабхатети со пуггало паралоке вуттаппака̄рам̣ тивидхампи сукхам̣ лабхатӣти аттхо.

десана̄васа̄не пан̃часата̄пи те кума̄рака̄ сота̄паттипхале патит̣т̣хахим̣сӯти.

самбахулакума̄ракаваттху татийам̣.