7. са̄рипуттаттхерасса саха̄йакабра̄хман̣аваттху

йам̣ кин̃чи йит̣т̣хам̣ ва̄ти имам̣ дхаммадесанам̣ саттха̄ вел̣уване вихаранто са̄рипуттаттхерасса саха̄йакабра̄хман̣ам̣ а̄раббха катхеси.

тампи хи тхеро упасан̇камитва̄ ‘‘ким̣, бра̄хман̣а, кин̃чи кусалам̣ каросӣ’’ти пуччхи. ‘‘а̄ма, бханте’’ти. ‘‘ким̣ каросӣ’’ти? ‘‘йит̣т̣хайа̄гам̣ йаджа̄мӣ’’ти. ‘‘тада̄ кира там̣ йа̄гам̣ маха̄паричча̄гена йаджа’’нти. ито парам̣ тхеро пуриманайенева пуччхитва̄ там̣ саттху сантикам̣ нетва̄ там̣ паваттим̣ а̄рочетва̄ ‘‘имасса, бханте, брахмалокасса маггам̣ катхетха̄’’ти а̄ха. саттха̄, ‘‘бра̄хман̣а, евам̣ кира̄’’ти пуччхитва̄ ‘‘евам̣, бхо готама̄’’ти вутте, ‘‘бра̄хман̣а, тайа̄ сам̣ваччхарам̣ йит̣т̣хайа̄гам̣ йаджантена локийамаха̄джанасса диннада̄нам̣ пасанначиттена мама са̄вака̄нам̣ ванданта̄нам̣ уппаннакусалачетана̄йа чатубха̄гаматтампи на аггхатӣ’’ти ватва̄ анусандхим̣ гхат̣етва̄ дхаммам̣ десенто имам̣ га̄тхама̄ха –

108. ‘‘йам̣ кин̃чи йит̣т̣хам̣ ва хутам̣ ва локе,

сам̣ваччхарам̣ йаджетха пун̃н̃апеккхо;

саббампи там̣ на чатубха̄гамети,

абхива̄дана̄ уджджугатесу сеййо’’ти.

таттха йам̣ кин̃чӣти анавасесапарийа̄да̄навачанаметам̣. йит̣т̣ханти йебхуййена ман̇галакирийа̄дивасесу диннада̄нам̣. хутанти абхисан̇кхаритва̄ катам̣ па̄хунада̄нан̃чева, камман̃ча пхалан̃ча саддахитва̄ катада̄нан̃ча. сам̣ваччхарам̣ йаджетха̄ти екасам̣ваччхарам̣ нирантарамева вуттаппака̄рам̣ да̄нам̣ сакалачаккава̄л̣епи локийамаха̄джанасса дадеййа. пун̃н̃апеккхоти пун̃н̃ам̣ иччханто. уджджугатесӯти хет̣т̣химакот̣ийа̄ сота̄паннесу упаримакот̣ийа̄ кхӣн̣а̄савесу. идам̣ вуттам̣ хоти – ‘‘еварӯпесу пасанначиттена сарӣрам̣ онамитва̄ вандантасса кусалачетана̄йа йам̣ пхалам̣, тато чатубха̄гампи саббам̣ там̣ да̄нам̣ на аггхати, тасма̄ уджугатесу абхива̄данамева сеййо’’ти.

десана̄васа̄не со бра̄хман̣о сота̄паттипхалам̣ патто, ан̃н̃епи бахӯ сота̄паттипхала̄дӣни па̄пун̣им̣сӯти.

са̄рипуттаттхерасса саха̄йакабра̄хман̣аваттху саттамам̣.