6. лакун̣д̣акабхаддийаттхераваттху

село йатха̄ти имам̣ дхаммадесанам̣ саттха̄ джетаване вихаранто лакун̣д̣акабхаддийаттхерам̣ а̄раббха катхеси.

путхуджджана̄ кира са̄ман̣ера̄дайо тхерам̣ дисва̄ сӣсепи кан̣н̣есупи на̄са̄йапи гахетва̄ ‘‘ким̣, чӯл̣апита, са̄санасмим̣ на уккан̣т̣хаси, абхирамасӣ’’ти ваданти. тхеро тесу нева куджджхати, на дуссати. дхаммасабха̄йам̣ катхам̣ самут̣т̣ха̄песум̣ ‘‘пассатха̄вусо, лакун̣д̣акабхаддийаттхерам̣ дисва̄ са̄ман̣ера̄дайо еван̃чеван̃ча вихет̣хенти, со тесу нева куджджхати, на дуссатӣ’’ти. саттха̄ а̄гантва̄ ‘‘ким̣ катхетха, бхиккхаве’’ти пуччхитва̄ ‘‘имам̣ на̄ма, бханте’’ти вутте ‘‘а̄ма, бхиккхаве, кхӣн̣а̄сава̄ на̄ма нева куджджханти, на дуссанти. гханаселасадиса̄ хете ачала̄ акампийа̄’’ти ватва̄ анусандхим̣ гхат̣етва̄ дхаммам̣ десенто имам̣ га̄тхама̄ха –

81. ‘‘село йатха̄ екагхано, ва̄тена на самӣрати;

евам̣ нинда̄пасам̣са̄су, на самин̃джанти пан̣д̣ита̄’’ти.

таттха нинда̄пасам̣са̄сӯти кин̃ча̄пи идха две локадхамма̄ вутта̄, аттхо пана ат̣т̣ханнампи васена ведитаббо. йатха̄ хи екагхано асусиро село пураттхима̄дибхедена ва̄тена на самӣрати на ин̃джати на чалати, евам̣ ат̣т̣хасупи локадхаммесу аджджхоттхарантесу пан̣д̣ита̄ на самин̃джанти, пат̣игхавасена ва̄ анунайавасена ва̄ на чаланти на кампанти.

десана̄васа̄не бахӯ сота̄паттипхала̄дӣни па̄пун̣им̣сӯти.

лакун̣д̣акабхаддийаттхераваттху чхат̣т̣хам̣.