3. чханнаттхераваттху

на бхадже па̄паке миттети имам̣ дхаммадесанам̣ саттха̄ джетаване вихаранто чханнаттхерам̣ а̄раббха катхеси.

со кира а̄йасма̄ ‘‘ахам̣ амха̄кам̣ аййапуттена саддхим̣ маха̄бхиниккхаманам̣ никкханто тада̄ ан̃н̃ам̣ екампи на пасса̄ми, ида̄ни пана ‘ахам̣ са̄рипутто на̄ма, ахам̣ моггалла̄но на̄ма, майам̣ аггаса̄вакамха̄’ти ватва̄ име вичарантӣ’’ти две аггаса̄ваке аккосати. саттха̄ бхиккхӯнам̣ сантика̄ там̣ паваттим̣ сутва̄ чханнаттхерам̣ паккоса̄петва̄ овадати. со тан̇кхан̣ейева тун̣хӣ хутва̄ пуна гантва̄ тхере аккосатийева. евам̣ йа̄вататийам̣ аккосантам̣ паккоса̄петва̄ саттха̄ овадитва̄ ‘‘чханна, две аггаса̄вака̄ на̄ма туйхам̣ калйа̄н̣амитта̄ уттамапуриса̄, еварӯпе калйа̄н̣амитте севассу бхаджассӯ’’ти ватва̄ дхаммам̣ десенто имам̣ га̄тхама̄ха –

78. ‘‘на бхадже па̄паке митте, на бхадже пуриса̄дхаме;

бхаджетха митте калйа̄н̣е, бхаджетха пурисуттаме’’ти.

тассаттхо – ка̄йадуччарита̄диакусалакамма̄бхирата̄ па̄памитта̄ на̄ма. сандхиччхедана̄дике ва̄ екавӣсатианесана̄дибхеде ва̄ ат̣т̣ха̄не нийоджака̄ пуриса̄дхама̄ на̄ма. убхопи ва̄ ете па̄памитта̄ чева пуриса̄дхама̄ ча, те на бхаджеййа на пайирупа̄сеййа, випарӣта̄ пана калйа̄н̣амитта̄ чева саппуриса̄ ча, те бхаджетха пайирупа̄сетха̄ти.

десана̄васа̄не бахӯ сота̄паттипхала̄дӣни па̄пун̣им̣сӯти.

чханнаттхеро пана там̣ ова̄дам̣ сутва̄пи пуриманайенева бхиккхӯ аккосати парибха̄сати. пунапи саттху а̄рочесум̣. саттха̄, ‘‘бхиккхаве, майи дхаранте чханнам̣ сиккха̄петум̣ на саккхиссатха, майи пана париниббуте саккхиссатха̄’’ти ватва̄ паринибба̄нака̄ле а̄йасмата̄ а̄нандена, ‘‘бханте, катхам̣ чханнаттхере амхехи пат̣ипаджджитабба’’нти вутте, ‘‘а̄нанда, чханнасса бхиккхуно брахмадан̣д̣о да̄таббо’’ти а̄н̣а̄песи. со саттхари париниббуте а̄нандаттхерена а̄рочитам̣ брахмадан̣д̣ам̣ сутва̄ дуккхӣ думмано тиккхаттум̣ муччхито патитва̄ ‘‘ма̄ мам̣, бханте, на̄сайиттха̄’’ти йа̄читва̄ самма̄ ваттам̣ пӯренто на чирассева саха пат̣исамбхида̄хи арахаттам̣ па̄пун̣ӣти.

чханнаттхераваттху татийам̣.