2. ассаджипунаббасукаваттху

овадеййа̄нуса̄сеййа̄ти имам̣ дхаммадесанам̣ саттха̄ джетаване вихаранто ассаджипунаббасукабхиккхӯ а̄раббха катхеси. десана̄ пана кӣт̣а̄гирисмим̣ самут̣т̣хита̄.

те кира две бхиккхӯ кин̃ча̄пи аггаса̄вака̄нам̣ саддхивиха̄рика̄, аладжджино пана ахесум̣ па̄пабхиккхӯ. те па̄пакехи аттано парива̄рехи пан̃чахи бхиккхусатехи саддхим̣ кӣт̣а̄гирисмим̣ вихаранта̄ ‘‘ма̄ла̄ваччхам̣ ропентипи ропа̄пентипӣ’’тиа̄дикам̣ (па̄ра̄. 431; чӯл̣ава. 21) на̄наппака̄рам̣ ана̄ча̄рам̣ каронта̄ куладӯсакакаммам̣ катва̄ тато уппаннехи паччайехи джӣвикам̣ каппента̄ там̣ а̄ва̄сам̣ песала̄нам̣ бхиккхӯнам̣ ана̄ва̄сам̣ акам̣су. саттха̄ там̣ паваттим̣ сутва̄ тесам̣ пабба̄джанӣйакаммакаран̣аттха̄йа сапарива̄ре две аггаса̄ваке а̄мантетва̄ ‘‘гаччхатха, са̄рипутта̄, тесу йе тумха̄кам̣ вачанам̣ на каронти, тесам̣ пабба̄джанӣйакаммам̣ каротха, йе пана каронти, те овадатха ануса̄сатха. оваданто хи ануса̄санто апан̣д̣ита̄нам̣йева аппийо хоти амана̄по, пан̣д̣ита̄нам̣ пана пийо хоти мана̄по’’ти анусандхим̣ гхат̣етва̄ дхаммам̣ десенто имам̣ га̄тхама̄ха –

77. ‘‘овадеййа̄нуса̄сеййа, асаббха̄ ча нива̄райе;

сатан̃хи со пийо хоти, асатам̣ хоти аппийо’’ти.

таттха овадеййа̄ти уппанне ваттхусмим̣ ваданто овадати на̄ма, ануппанне ваттхусмим̣ ‘‘айасопи те сийа̄’’тиа̄дивасена ана̄гатам̣ дассенто ануса̄сати на̄ма. саммукха̄ ваданто овадати на̄ма, параммукха̄ дӯтам̣ ва̄ са̄санам̣ ва̄ песенто ануса̄сати на̄ма. саким̣ ваданто овадати на̄ма, пунаппунам̣ ваданто ануса̄сати на̄ма. оваданто ева ва̄ ануса̄сати на̄ма̄ти евам̣ овадеййа ануса̄сеййа. асаббха̄ ча̄ти акусаладхамма̄ ча нива̄реййа, кусаладхамме патит̣т̣ха̄пеййа̄ти аттхо. сатан̃хи со пийо хотӣти со еварӯпо пуггало буддха̄дӣнам̣ саппуриса̄нам̣ пийо хоти. йе пана адит̣т̣хадхамма̄ авитин̣н̣апаралока̄ а̄мисачаккхука̄ джӣвикаттха̄йа паббаджита̄, тесам̣ асатам̣ со ова̄дако ануса̄сако, ‘‘‘на твам̣ амха̄кам̣ упаджджха̄йо, на а̄чарийо, касма̄ амхе овадасӣ’ти евам̣ мукхасаттӣхи виджджханта̄нам̣ аппийо хотӣ’’ти.

десана̄васа̄не бахӯ сота̄паттипхала̄дӣни па̄пун̣им̣сӯти. са̄рипуттамоггалла̄на̄пи таттха гантва̄ те бхиккхӯ овадим̣су ануса̄сим̣су. тесу екачче ова̄дам̣ сампат̣иччхитва̄ самма̄ ваттим̣су, екачче виббхамим̣су, екачче пабба̄джанӣйакаммам̣ па̄пун̣им̣сӯти.

ассаджипунаббасукаваттху дутийам̣.