8. кассакаваттху

на там̣ каммам̣ катам̣ са̄дхӯти имам̣ дхаммадесанам̣ саттха̄ джетаване вихаранто екам̣ кассакам̣ а̄раббха катхеси.

со кира са̄ваттхито авидӯре екам̣ кхеттам̣ касати. чора̄ удаканиддхаманена нагарам̣ пависитва̄ екасмим̣ ад̣д̣хакуле уман̇гам̣ бхиндитва̄ бахум̣ хиран̃н̃асуван̣н̣ам̣ гахетва̄ удаканиддхаманенева никкхамим̣су. еко чоро те ван̃четва̄ екам̣ сахассаттхавикам̣ оват̣т̣ика̄йа катва̄ там̣ кхеттам̣ гантва̄ техи саддхим̣ бхан̣д̣ам̣ бха̄джетва̄ а̄да̄йа гаччханто оват̣т̣икато патама̄нам̣ сахассаттхавикам̣ на саллаккхеси. там̣ дивасам̣ саттха̄ паччӯсасамайе локам̣ волокенто там̣ кассакам̣ аттано н̃а̄н̣аджа̄ласса антопавит̣т̣хам̣ дисва̄ ‘‘ким̣ ну кхо бхависсатӣ’’ти упадха̄райама̄но идам̣ аддаса – ‘‘айам̣ кассако па̄това каситум̣ гамиссати, бхан̣д̣аса̄мика̄ чора̄нам̣ анупадам̣ гантва̄ оват̣т̣икато патама̄нам̣ сахассаттхавикам̣ дисва̄ етам̣ ган̣хиссанти, мам̣ т̣хапетва̄ тасса ан̃н̃о саккхӣ на̄ма на бхависсати, сота̄паттимаггасса упаниссайописса аттхи, таттха майа̄ гантум̣ ват̣т̣атӣ’’ти. сопи кассако па̄това каситум̣ гато. саттха̄ а̄нандаттхерена паччха̄саман̣ена таттха агама̄си. кассако саттха̄рам̣ дисва̄ гантва̄ бхагавантам̣ вандитва̄ пуна каситум̣ а̄рабхи. саттха̄ тена саддхим̣ кин̃чи аватва̄ва сахассаттхавика̄йа патитат̣т̣ха̄нам̣ гантва̄ там̣ дисва̄ а̄нандаттхерам̣ а̄ха – ‘‘пасса, а̄нанда, а̄сӣвисо’’ти. ‘‘пасса̄ми, бханте, гхорависо’’ти.

кассако там̣ катхам̣ сутва̄ ‘‘мама вела̄йа ва̄ авела̄йа ва̄ вичаран̣ат̣т̣ха̄наметам̣, а̄сӣвисо киреттха аттхӣ’’ти чинтетва̄ саттхари еттакам̣ ватва̄ пакканте ‘‘ма̄ресса̄ми на’’нти патодалат̣т̣хим̣ а̄да̄йа гато сахассабхан̣д̣икам̣ дисва̄ ‘‘имам̣ сандха̄йа саттха̄ра̄ катхитам̣ бхависсатӣ’’ти там̣ а̄да̄йа ниватто, абйаттата̄йа екаманте т̣хапетва̄ пам̣суна̄ пат̣иччха̄детва̄ пуна каситум̣ а̄рабхи. манусса̄ ча вибха̄та̄йа раттийа̄ гехе чорехи катакаммам̣ дисва̄ пада̄нупадам̣ гаччханта̄ там̣ кхеттам̣ гантва̄ таттха чорехи бхан̣д̣асса бха̄джитат̣т̣ха̄нам̣ дисва̄ кассакасса падавалан̃джам̣ аддасам̣су. те тасса пада̄нуса̄рена гантва̄ тхавика̄йа т̣хапитат̣т̣ха̄нам̣ дисва̄ пам̣сум̣ вийӯхитва̄ тхавикам̣ а̄да̄йа ‘‘твам̣ гехам̣ вилумпитва̄ кхеттам̣ касама̄но вийа вичарасӣ’’ти таджджетва̄ потхетва̄ нетва̄ ран̃н̃о дассайим̣су. ра̄джа̄ там̣ паваттим̣ сутва̄ тасса вадхам̣ а̄н̣а̄песи. ра̄джапуриса̄ там̣ паччха̄ба̄хам̣ бандхитва̄ каса̄хи та̄л̣ента̄ а̄гха̄танам̣ найим̣су. со каса̄хи та̄л̣ийама̄но ан̃н̃ам̣ кин̃чи аватва̄ ‘‘пасса̄нанда, а̄сӣвисоти, пасса̄ми бхагава̄ гхорависо’’ти ваданто гаччхати. атха нам̣ ра̄джапуриса̄ ‘‘твам̣ саттху чева а̄нандаттхерасса ча катхам̣ катхеси, ким̣ на̄мета’’нти пуччхитва̄ – ‘‘ра̄джа̄нам̣ дат̣т̣хум̣ лабхама̄но катхесса̄мӣ’’ти вутте ран̃н̃о сантикам̣ нетва̄ ран̃н̃о там̣ паваттим̣ катхайим̣су. атха нам̣ ра̄джа̄ ‘‘касма̄ евам̣ катхесӣ’’ти пуччхи. со ‘‘на̄хам̣, дева, чоро’’ти ватва̄ касанаттха̄йа никкхантака̄лато пат̣т̣ха̄йа саббам̣ там̣ паваттим̣ ран̃н̃о а̄чиккхи. ра̄джа̄ тасса катхам̣ сутва̄ ‘‘айам̣ бхан̣е локе аггапуггалам̣ саттха̄рам̣ саккхим̣ ападисати, на йуттам̣ етасса досам̣ а̄ропетум̣, ахаметтха каттаббам̣ джа̄нисса̄мӣ’’ти там̣ а̄да̄йа са̄йанхасамайе саттху сантикам̣ гантва̄ саттха̄рам̣ пуччхи – ‘‘бхагава̄ каччи тумхе а̄нандаттхерена саддхим̣ етасса кассакасса касанат̣т̣ха̄нам̣ гата̄’’ти? ‘‘а̄ма, маха̄ра̄джа̄’’ти. ‘‘ким̣ во таттха дит̣т̣ха’’нти? ‘‘сахассаттхавика̄, маха̄ра̄джа̄’’ти. ‘‘дисва̄ ким̣ авочуттха̄’’ти? ‘‘идам̣ на̄ма, маха̄ра̄джа̄’’ти. ‘‘бханте, сача̄йам̣ пурисо тумха̄дисам̣ ападисам̣ на̄карисса, на джӣвитам̣ алабхисса, тумхехи пана катхитакатхам̣ катхетва̄ тена джӣвитам̣ ладдха’’нти. там̣ сутва̄ саттха̄ ‘‘а̄ма, маха̄ра̄джа, ахампи еттакамева ватва̄ гато, пан̣д̣итена на̄ма йам̣ каммам̣ катва̄ паччха̄нутаппам̣ хоти, там̣ на каттабба’’нти ватва̄ анусандхим̣ гхат̣етва̄ дхаммам̣ десенто имам̣ га̄тхама̄ха –

67. ‘‘на там̣ каммам̣ катам̣ са̄дху, йам̣ катва̄ анутаппати;

йасса ассумукхо родам̣, випа̄кам̣ пат̣исеватӣ’’ти.

таттха на там̣ камманти йам̣ нирайа̄дӣсу ниббаттанасаматтхам̣ дуккхудрайам̣ каммам̣ катва̄ ануссаранто ануссарита̄нуссаритаккхан̣е анутаппати анусочати, там̣ катам̣ на са̄дху на сундарам̣ нираттхакам̣. йасса ассумукхоти йасса ассӯхи тинтамукхо роданто випа̄кам̣ анубхотӣти.

десана̄васа̄не кассако упа̄сако сота̄паттипхалам̣ патто, сампаттабхиккхӯпи сота̄паттипхала̄дӣни па̄пун̣им̣сӯти.

кассакаваттху ат̣т̣хамам̣.