6. тим̣саматтапа̄веййакабхиккхуваттху

мухуттамапи че вин̃н̃ӯти имам̣ дхаммадесанам̣ саттха̄ джетаване вихаранто тим̣саматте па̄веййаке бхиккхӯ а̄раббха катхеси.

тесан̃хи бхагава̄ иттхим̣ парийесанта̄нам̣ каппа̄сикаванасан̣д̣е пат̣хамам̣ дхаммам̣ десеси. тада̄ те саббева ехибхиккхубха̄вам̣ патва̄ иддхимайапаттачӣварадхара̄ хутва̄ тераса дхутан̇га̄ни сама̄да̄йа ваттама̄на̄ пунапи дӣгхасса аддхуно аччайена саттха̄рам̣ упасан̇камитва̄ анаматаггадхаммадесанам̣ сутва̄ тасмим̣йева а̄сане арахаттам̣ па̄пун̣им̣су. бхиккхӯ ‘‘ахо ватимехи бхиккхӯхи кхиппамева дхаммо вин̃н̃а̄то’’ти дхаммасабха̄йам̣ катхам̣ самут̣т̣ха̄песум̣. саттха̄ там̣ сутва̄ ‘‘на, бхиккхаве, ида̄нева, пуббепи име тим̣саматта̄ саха̄йака̄ дхутта̄ хутва̄ тун̣д̣иладжа̄таке (джа̄. 1.6.88 а̄дайо) маха̄тун̣д̣иласса дхаммадесанам̣ сутва̄пи кхиппамева дхаммам̣ вин̃н̃а̄йа пан̃ча сӣла̄ни сама̄дийим̣су, те тенева упаниссайена етарахи нисинна̄санейева арахаттам̣ патта̄’’ти ватва̄ дхаммам̣ десенто имам̣ га̄тхама̄ха –

65. ‘‘мухуттамапи че вин̃н̃ӯ, пан̣д̣итам̣ пайирупа̄сати;

кхиппам̣ дхаммам̣ виджа̄на̄ти, дживха̄ сӯпарасам̣ йатха̄’’ти.

тассаттхо – вин̃н̃ӯ пан̣д̣итапурисо мухуттамапи че ан̃н̃ам̣ пан̣д̣итам̣ пайирупа̄сати, со тасса сантике угган̣ханто парипуччханто кхиппамева парийаттидхаммам̣ виджа̄на̄ти. тато каммат̣т̣ха̄нам̣ катха̄петва̄ пат̣ипаттийам̣ гхат̣енто ва̄йаманто йатха̄ на̄ма анупахатадживха̄паса̄до пурисо расавиджа̄нанаттхам̣ дживхагге т̣хапетва̄ ева лон̣ика̄дибхедам̣ расам̣ виджа̄на̄ти, евам̣ пан̣д̣ито кхиппамева локуттарадхаммампи виджа̄на̄тӣти.

десана̄васа̄не бахӯ бхиккхӯ арахаттам̣ па̄пун̣им̣сӯти.

тим̣саматтапа̄веййакабхиккхуваттху чхат̣т̣хам̣.