5. уда̄йиттхераваттху

йа̄ваджӣвампи че ба̄лоти имам̣ дхаммадесанам̣ саттха̄ джетаване вихаранто уда̄йиттхерам̣ а̄раббха катхеси.

со кира маха̄тхересу пат̣иккантесу дхаммасабхам̣ гантва̄ дхамма̄сане нисӣди. атха нам̣ екадивасам̣ а̄гантука̄ бхиккхӯ дисва̄ ‘‘айам̣ бахуссуто маха̄тхеро бхависсатӣ’’ти ман̃н̃ама̄на̄ кхандха̄дипат̣исам̣йуттам̣ пан̃хам̣ пуччхитва̄ кин̃чи аджа̄нама̄нам̣ ‘‘ко есо, буддхехи саддхим̣ екавиха̄ре васама̄но кхандхадха̄туа̄йатанаматтампи на джа̄на̄тӣ’’ти гарахитва̄ там̣ паваттим̣ татха̄гатасса а̄рочесум̣. саттха̄ тесам̣ дхаммам̣ десенто имам̣ га̄тхама̄ха –

64. ‘‘йа̄ваджӣвампи че ба̄ло, пан̣д̣итам̣ пайирупа̄сати;

на со дхаммам̣ виджа̄на̄ти, даббӣ сӯпарасам̣ йатха̄’’ти.

тассаттхо – ба̄ло на̄меса йа̄ваджӣвампи пан̣д̣итам̣ упасан̇каманто пайирупа̄санто ‘‘идам̣ буддхавачанам̣, еттакам̣ буддхавачана’’нти евам̣ парийаттидхаммам̣ ва̄ ‘‘айам̣ ча̄ро, айам̣ виха̄ро, айам̣ а̄ча̄ро, айам̣ гочаро, идам̣ са̄ваджджам̣, идам̣ анаваджджам̣, идам̣ севитаббам̣, идам̣ на севитаббам̣, идам̣ пат̣ивиджджхитаббам̣, идам̣ саччхика̄табба’’нти евам̣ пат̣ипаттипат̣иведхадхаммам̣ ва̄ на джа̄на̄ти. йатха̄ ким̣? даббӣ сӯпарасам̣ йатха̄ти. йатха̄ хи даббӣ йа̄ва париккхайа̄ на̄наппака̄ра̄йа сӯпавикатийа̄ сампариваттама̄на̄пи ‘‘идам̣ лон̣икам̣, идам̣ алон̣икам̣, идам̣ титтакам̣, идам̣ кха̄рикам̣, идам̣ кат̣укам̣, идам̣ амбилам̣, идам̣ анамбилам̣, идам̣ каса̄ва’’нти сӯпарасам̣ на джа̄на̄ти, евамева ба̄ло йа̄ваджӣвампи пан̣д̣итам̣ пайирупа̄сама̄но вуттаппака̄рам̣ дхаммам̣ на джа̄на̄тӣти.

десана̄васа̄не а̄гантука̄ бхиккхӯ а̄савехи читта̄ни вимуччим̣сӯти.

уда̄йиттхераваттху пан̃чамам̣.