4. ган̣т̣хибхедакачораваттху

йо ба̄лоти имам̣ дхаммадесанам̣ саттха̄ джетаване вихаранто ган̣т̣хибхедакачоре а̄раббха катхеси.

те кира две саха̄йака̄ дхаммассаванаттха̄йа гаччхантена маха̄джанена саддхим̣ джетаванам̣ гантва̄ еко дхаммакатхам̣ ассоси, еко аттано гайхӯпагам̣ олокеси. тесу еко дхаммам̣ сун̣ама̄но сота̄паттипхалам̣ па̄пун̣и, итаро екасса дуссанте баддхам̣ пан̃чама̄сакаматтам̣ лабхи. тасса там̣ гехе па̄кабхаттам̣ джа̄там̣, итарасса гехе на паччати. атха нам̣ саха̄йакачоро аттано бхарийа̄йа саддхим̣ уппан̣д̣айама̄но ‘‘твам̣ атипан̣д̣итата̄йа аттано гехе па̄кабхаттамӯлампи на ниппха̄десӣ’’ти а̄ха. итаро пана ‘‘ба̄лабха̄венева вата̄йам̣ аттано пан̣д̣итабха̄вам̣ ман̃н̃атӣ’’ти там̣ паваттим̣ саттху а̄рочетум̣ н̃а̄тӣхи саддхим̣ джетаванам̣ гантва̄ а̄рочеси. саттха̄ тасса дхаммам̣ десенто имам̣ га̄тхама̄ха –

63. ‘‘йо ба̄ло ман̃н̃ати ба̄лйам̣, пан̣д̣ито ва̄пи тена со;

ба̄ло ча пан̣д̣итама̄нӣ, са ве ‘ба̄ло’ти вуччатӣ’’ти.

таттха йо ба̄лоти йо андхаба̄ло апан̣д̣ито сама̄но ‘‘ба̄ло аха’’нти аттано ба̄лйам̣ ба̄лабха̄вам̣ ман̃н̃ати джа̄на̄ти. тена соти тена ка̄ран̣ена со пуггало пан̣д̣ито ва̄пи хоти пан̣д̣итасадисо ва̄. со хи ‘‘ба̄ло аха’’нти джа̄нама̄но ан̃н̃ам̣ пан̣д̣итам̣ упасан̇каманто пайирупа̄санто тена пан̣д̣итабха̄ваттха̄йа овадийама̄но ануса̄сийама̄но там̣ ова̄дам̣ ган̣хитва̄ пан̣д̣ито ва̄ хоти пан̣д̣итатаро ва̄. са ве ба̄лоти йо ча ба̄ло сама̄но ‘‘ко ан̃н̃о майа̄ садисо бахуссуто ва̄ дхаммакатхико ва̄ винайадхаро ва̄ дхутан̇гадхаро ва̄ аттхӣ’’ти евам̣ пан̣д̣итама̄нӣ хоти. со ан̃н̃ам̣ пан̣д̣итам̣ анупасан̇каманто апайирупа̄санто нева парийаттим̣ угган̣ха̄ти, на пат̣ипаттим̣ пӯрети, екантаба̄лабха̄вамева па̄пун̣а̄ти. со ган̣т̣хибхедакачоро вийа. тена вуттам̣ ‘‘са ве ‘ба̄ло’ти вуччатӣ’’ти.

десана̄парийоса̄не итарасса н̃а̄такехи саддхим̣ маха̄джано сота̄паттипхала̄дӣни па̄пун̣ӣти.

ган̣т̣хибхедакачораваттху чатуттхам̣.