3. а̄нандасет̣т̣хиваттху

путта̄ маттхӣти имам̣ дхаммадесанам̣ саттха̄ са̄ваттхийам̣ вихаранто а̄нандасет̣т̣хим̣ а̄раббха катхеси.

са̄ваттхийам̣ кира а̄нандасет̣т̣хи на̄ма чатта̄лӣсакот̣ивибхаво маха̄маччхарӣ ахоси. со анвад̣д̣хама̄сам̣ н̃а̄таке саннипа̄тетва̄ путтам̣ мӯласирим̣ на̄ма тӣсу вела̄су евам̣ овадати – ‘‘идам̣ чатта̄лӣсакот̣идханам̣ ‘бахӯ’’’ти ма̄ сан̃н̃ам̣ кари, виджджама̄нам̣ дханам̣ на да̄таббам̣, навам̣ дханам̣ уппа̄детаббам̣. екекампи хи каха̄пан̣ам̣ вайам̣ каронтасса пана кхӣйатева. тасма̄ –

‘‘ан̃джана̄нам̣ кхайам̣ дисва̄, упачика̄нан̃ча а̄чайам̣;

мадхӯнан̃ча сама̄ха̄рам̣, пан̣д̣ито гхарама̄васе’’ти.

со апарена самайена аттано пан̃ча маха̄нидхийо путтасса ана̄чиккхитва̄ дхананиссито маччхерамаламалино ка̄лам̣ катва̄ тассева нагарасса екасмим̣ два̄рага̄маке чан̣д̣а̄ла̄нам̣ куласахассам̣ пат̣ивасати. таттхекисса̄ чан̣д̣а̄лийа̄ куччхисмим̣ пат̣исандхим̣ ган̣хи. ра̄джа̄ тасса ка̄лакирийам̣ сутва̄ путтамасса мӯласирим̣ паккоса̄петва̄ сет̣т̣хит̣т̣ха̄не т̣хапеси. тампи чан̣д̣а̄лакуласахассам̣ екатова бхатийа̄ каммам̣ катва̄ джӣвама̄нам̣ тасса пат̣исандхиггахан̣ато пат̣т̣ха̄йа нева бхатим̣ лабхати, на йа̄панаматтато парам̣ бхаттапин̣д̣ампи. те ‘‘майам̣ етарахи каммам̣ каронта̄пи пин̣д̣абхаттампи на лабха̄ма, амха̄кам̣ антаре ка̄л̣акан̣н̣ийа̄ бхавитабба’’нти две кот̣т̣ха̄са̄ хутва̄ йа̄ва тасса ма̄та̄питаро висум̣ хонти, та̄ва вибхаджитва̄ ‘‘имасмим̣ куле ка̄л̣акан̣н̣ӣ уппанна̄’’ти тасса ма̄тарам̣ нӣхарим̣су.

са̄пи йа̄васса̄ со куччхигато, та̄ва йа̄панаматтампи киччхена лабхитва̄ путтам̣ виджа̄йи. тасса хаттха̄ ча па̄да̄ ча аккхӣни ча кан̣н̣а̄ ча на̄са̄ ча мукхан̃ча йатха̄т̣ха̄не на ахесум̣. со еварӯпена ан̇гавекаллена саманна̄гато пам̣суписа̄чако вийа ативирӯпо ахоси. евам̣ сантепи там̣ ма̄та̄ на париччаджи. куччхийам̣ васитапуттасмин̃хи синехо балава̄ хоти. са̄ там̣ киччхена посайама̄на̄ там̣ а̄да̄йа гатадивасе кин̃чи алабхитва̄ гехе катва̄ сайамева гатадивасе бхатим̣ лабхати. атха нам̣ пин̣д̣а̄йа чаритва̄ джӣвитум̣ саматтхака̄ле са̄ капа̄лакам̣ хаттхе т̣хапетва̄, ‘‘та̄та, майам̣ там̣ нисса̄йа маха̄дуккхам̣ патта̄, ида̄ни на саккоми там̣ посетум̣, имасмим̣ нагаре капан̣аддхика̄дӣнам̣ пат̣ийаттабхатта̄ни аттхи, таттха бхиккха̄йа чаритва̄ джӣва̄хӣ’’ти там̣ виссаджджеси. со гхарапат̣ипа̄т̣ийа̄ чаранто а̄нандасет̣т̣хика̄ле нивуттат̣т̣ха̄нам̣ гантва̄ джа̄тиссаро хутва̄ аттано гехам̣ па̄виси. тӣсу пана два̄ракот̣т̣хакесу на кочи саллаккхеси. чатуттхе два̄ракот̣т̣хаке мӯласирисет̣т̣хино путтака̄ дисва̄ уббиггахадайа̄ пародим̣су. атха нам̣ сет̣т̣хипуриса̄ ‘‘никкхама ка̄л̣акан̣н̣ӣ’’ти потхетва̄ нӣхаритва̄ сан̇ка̄рат̣т̣ха̄не кхипим̣су. саттха̄ а̄нандаттхерена паччха̄саман̣ена пин̣д̣а̄йа чаранто там̣ т̣ха̄нам̣ патто тхерам̣ олокетва̄ тена пут̣т̣хо там̣ паваттим̣ а̄чиккхи. тхеро мӯласирим̣ паккоса̄песи. атха маха̄джанака̄йо саннипати. саттха̄ мӯласирим̣ а̄мантетва̄ ‘‘джа̄на̄си ета’’нти пуччхитва̄ ‘‘на джа̄на̄мӣ’’ти вутте, ‘‘пита̄ те а̄нандасет̣т̣хӣ’’ти ватва̄ асаддахантам̣ ‘‘а̄нандасет̣т̣хи путтасса те пан̃ча маха̄нидхийо а̄чиккха̄хӣ’’ти а̄чиккха̄петва̄ саддаха̄песи. со саттха̄рам̣ саран̣ам̣ агама̄си. тасса дхаммам̣ десенто имам̣ га̄тхама̄ха –

62. ‘‘путта̄ маттхи дханамматтхи, ити ба̄ло вихан̃н̃ати;

атта̄ хи аттано наттхи, куто путта̄ куто дхана’’нти.

тассаттхо – путта̄ ме аттхи, дханам̣ ме аттхи, ити ба̄ло путтатан̣ха̄йа чева дханатан̣ха̄йа ча хан̃н̃ати вихан̃н̃ати дуккхайати, ‘‘путта̄ ме нассим̣сӯ’’ти вихан̃н̃ати, ‘‘нассантӣ’’ти вихан̃н̃ати, ‘‘нассиссантӣ’’ти вихан̃н̃ати. дханепи есева найо. ити чхаха̄ка̄рехи вихан̃н̃ати. ‘‘путте посесса̄мӣ’’ти раттин̃ча дива̄ ча тхаладжалапатха̄дӣсу на̄наппака̄рато ва̄йамантопи вихан̃н̃ати, ‘‘дханам̣ уппа̄десса̄мӣ’’ти касива̄н̣иджджа̄дӣни каронтопи вихан̃н̃атева. евам̣ вихан̃н̃асса ча атта̄ хи аттано наттхи тена вигха̄тена дуккхитам̣ атта̄нам̣ сукхитам̣ ка̄тум̣ асакконтасса паваттийамписса атта̄ хи аттано наттхи, маран̣аман̃че нипаннасса ма̄ран̣антика̄хи ведана̄хи аггиджа̄ла̄хи вийа парид̣айхама̄насса чхиджджама̄несу сандхибандханесу, бхиджджама̄несу ат̣т̣хисан̇гха̄т̣есу нимӣлетва̄ паралокам̣ уммӣлетва̄ идхалокам̣ пассантасса̄пи дивасе дивасе двиккхаттум̣ нха̄петва̄ тиккхаттум̣ бходжетва̄ гандхама̄ла̄дӣхи алан̇каритва̄ йа̄ваджӣвам̣ поситопи саха̄йабха̄вена дуккхапаритта̄н̣ам̣ ка̄тум̣ асаматтхата̄йа атта̄ хи аттано наттхи. куто путта̄ куто дханам̣ путта̄ ва̄ дханам̣ ва̄ тасмим̣ самайе кимева кариссанти, а̄нандасет̣т̣хинопи кассачи кин̃чи адатва̄ путтассаттха̄йа дханам̣ сан̣т̣хапетва̄ пуббе ва̄ маран̣аман̃че нипаннасса, ида̄ни ва̄ имам̣ дуккхам̣ паттасса куто путта̄ куто дханам̣. путта̄ ва̄ дханам̣ ва̄ тасмим̣ самайе ким̣ дуккхам̣ харим̣су, ким̣ ва̄ сукхам̣ уппа̄дайим̣сӯти.

десана̄васа̄не чатура̄сӣтийа̄ па̄н̣асахасса̄нам̣ дхамма̄бхисамайо ахоси. десана̄ маха̄джанасса са̄ттхика̄ ахосӣти.

а̄нандасет̣т̣хиваттху татийам̣.