12. гарахадиннаваттху

йатха̄ сан̇ка̄рат̣т̣ха̄насминти имам̣ дхаммадесанам̣ саттха̄ джетаване вихаранто гарахадиннам̣ на̄ма ниган̣т̣хаса̄вакам̣ а̄раббха катхеси.

са̄ваттхийан̃хи сиригутто ча гарахадинно ча̄ти две саха̄йака̄ ахесум̣. тесу сиригутто упа̄сако буддхаса̄вако, гарахадинно ниган̣т̣хаса̄вако. там̣ ниган̣т̣ха̄ абхиккхан̣ам̣ евам̣ ваданти – ‘‘тава саха̄йакам̣ сиригуттам̣ ‘ким̣ твам̣ саман̣ам̣ готамам̣ упасан̇камаси, тасса сантике ким̣ лабхиссасӣ’ти ватва̄ йатха̄ амхе упасан̇камитва̄ амха̄кан̃ча деййадхаммам̣ дассати, ким̣ евам̣ овадитум̣ на ват̣т̣атӣ’’ти. гарахадинно тесам̣ вачанам̣ сутва̄ абхиккхан̣ам̣ гантва̄ т̣хитанисиннат̣т̣ха̄на̄дӣсу сиригуттам̣ евам̣ овадати – ‘‘самма, ким̣ те саман̣ена готамена, там̣ упасан̇камитва̄ ким̣ лабхиссаси, ким̣ те мама, аййе, упасан̇камитва̄ тесам̣ да̄нам̣ да̄тум̣ на ват̣т̣атӣ’’ти? сиригутто тасса катхам̣ сутва̄пи бахӯ дивасе тун̣хӣ хутва̄ ниббиджджитва̄ екадивасам̣, ‘‘самма, твам̣ абхиккхан̣ам̣ а̄гантва̄ мам̣ т̣хитат̣т̣ха̄на̄дӣсу евам̣ вадеси, ‘саман̣ам̣ готамам̣ упасан̇камитва̄ ким̣ лабхиссаси, мама, аййе, упасан̇камитва̄ тесам̣ да̄нам̣ дехӣ’ти, катхехи та̄ва ме, тава, аййа̄, ким̣ джа̄нантӣ’’ти? ‘‘‘ахо, са̄ми, ма̄ евам̣ вада, мама аййа̄нам̣ ан̃н̃а̄там̣ на̄ма наттхи, саббам̣ атӣта̄на̄гатапаччуппаннам̣ саббам̣ ка̄йавачӣманокаммам̣ идам̣ бхависсати, идам̣ на бхависсатӣ’ти саббам̣ бхабба̄бхаббам̣ джа̄нантӣ’’ти? ‘‘евам̣ вадесӣ’’ти. ‘‘а̄ма, вадемӣ’’ти. ‘‘йади евам̣, атибха̄рийам̣ те катам̣, еттакам̣ ка̄лам̣ майхам̣ етаматтхам̣ ана̄чиккхантена, аджджа майа̄ аййа̄нам̣ н̃а̄н̣а̄нубха̄во н̃а̄то, гаччха, самма, аййе, мама вачанена нимантехӣ’’ти. со ниган̣т̣ха̄нам̣ сантикам̣ гантва̄ те вандитва̄ ‘‘майхам̣ саха̄йако сиригутто сва̄тана̄йа тумхе нимантетӣ’’ти а̄ха. ‘‘сиригуттена са̄мам̣ твам̣ вутто’’ти? ‘‘а̄ма, аййа̄’’ти. те хат̣т̣хатут̣т̣ха̄ хутва̄ ‘‘ниппханнам̣ но киччам̣, сиригуттасса амхесу пасаннака̄лато пат̣т̣ха̄йа ка̄ на̄ма сампатти амха̄кам̣ на бхависсатӣ’’ти вадим̣су.

сиригуттасса̄пи махантам̣ нивесанам̣. со тасмим̣ двиннам̣ геха̄нам̣ антаре убхато дӣгхам̣ а̄ва̄т̣ам̣ кхан̣а̄петва̄ гӯтхакалаласса пӯра̄песи. бахиа̄ва̄т̣е двӣсу парийантесу кха̄н̣уке кот̣т̣а̄петва̄ тесу раджджуйо бандха̄петва̄ а̄сана̄нам̣ пуримапа̄де а̄ва̄т̣асса пуримапассе т̣хапа̄петва̄ паччхимапа̄де раджджукесу т̣хапа̄песи. ‘‘евам̣ нисиннака̄ле евам̣ авам̣сира̄ патиссантӣ’’ти ман̃н̃ама̄но йатха̄ а̄ва̄т̣о на пан̃н̃а̄йати, евам̣ а̄сана̄нам̣ упари паччаттхаран̣а̄ни да̄песи. маханта̄ маханта̄ ча̄т̣ийо т̣хапа̄петва̄ кадалипан̣н̣ехи ча сетапилотика̄хи ча мукха̄ни бандха̄петва̄ та̄ туччха̄ ева гехасса паччхимабха̄ге бахи йа̄губхаттаситтхасаппителамадхупха̄н̣итапӯвачун̣н̣амаккхита̄ катва̄ т̣хапа̄песи. гарахадинно па̄това тасса гхарам̣ вегена гантва̄, ‘‘аййа̄нам̣ сакка̄ро саджджито’’ти пуччхи. ‘‘а̄ма, самма, саджджито’’ти. ‘‘кахам̣ пана есо’’ти. ‘‘ета̄су еттика̄су ча̄т̣ӣсу йа̄гу, еттика̄су бхаттам̣, еттика̄су саппипха̄н̣итапӯва̄дӣни пӯрита̄ни, а̄сана̄ни пан̃н̃атта̄нӣ’’ти. со ‘‘са̄дхӯ’’ти ватва̄ гато тасса гатака̄ле пан̃часата̄ ниган̣т̣ха̄ а̄гамим̣су. сиригутто геха̄ никкхамитва̄ пан̃чапатит̣т̣хитена ниган̣т̣хе вандитва̄ тесам̣ пурато ан̃джалим̣ паггайха т̣хито евам̣ чинтеси – ‘‘тумхе кира атӣта̄дибхедам̣ саббам̣ джа̄на̄тха, евам̣ тумха̄кам̣ упат̣т̣ха̄кена майхам̣ катхитам̣. саче саббам̣ тумхе джа̄на̄тха, майхам̣ гехам̣ ма̄ пависиттха. мама гехам̣ павит̣т̣ха̄нан̃хи во нева йа̄гу аттхи, на бхатта̄дӣни. саче аджа̄нитва̄ пависиссатха, гӯтхаа̄ва̄т̣е во па̄тетва̄ потхесса̄мӣ’’ти евам̣ чинтетва̄ пуриса̄нам̣ сан̃н̃ам̣ ада̄си. евам̣ тесам̣ нисӣданабха̄вам̣ н̃атва̄ паччхимапассе т̣хатва̄ а̄сана̄нам̣ упари паччаттхаран̣а̄ни апанеййа̄тха, ма̄ та̄ни асучина̄ маккхайим̣сӯти.

атха ниган̣т̣хе ‘‘ито етха, бханте’’ти а̄ха. ниган̣т̣ха̄ пависитва̄ пан̃н̃атта̄санесу нисӣдитум̣ а̄рабхим̣су. атха не манусса̄ вадим̣су – ‘‘а̄гаметха, бханте, ма̄ та̄ва нисӣдатха̄’’ти. ‘‘ким̣ ка̄ран̣а̄’’ти? ‘‘амха̄кам̣ гехам̣ павит̣т̣ха̄нам̣ аййа̄нам̣ ваттам̣ н̃атва̄ нисӣдитум̣ ват̣т̣атӣ’’ти. ‘‘ким̣ ка̄тум̣ ват̣т̣ати, а̄вусо’’ти? ‘‘аттано аттано патта̄санамӯлесу т̣хатва̄ саббепи екаппаха̄ренева нисӣдитум̣ ват̣т̣атӣ’’ти. идам̣ кирасса адхиппа̄йо – ‘‘екасмим̣ а̄ва̄т̣е патите ‘ма̄, а̄вусо, авасеса̄ а̄сане нисӣдантӯ’ти ваттум̣ ма̄ лабхатӯ’’ти. те ‘‘са̄дхӯ’’ти ватва̄ ‘‘имехи катхитакатхам̣ амхехи ка̄тум̣ ват̣т̣атӣ’’ти чинтайим̣су. атха саббе аттано аттано патта̄санамӯле пат̣ипа̄т̣ийа̄ ат̣т̣хам̣су. атха не, ‘‘бханте, кхиппам̣ екаппаха̄ренева нисӣдатха̄’’ти ватва̄ тесам̣ нисиннабха̄вам̣ н̃атва̄ а̄сана̄нам̣ упари паччаттхаран̣а̄ни нӣхарим̣су. ниган̣т̣ха̄ екаппаха̄ренева нисинна̄, раджджӯнам̣ упари т̣хапита̄ а̄санапа̄да̄ бхат̣т̣ха̄, ниган̣т̣ха̄ авам̣сира̄ а̄ва̄т̣е патим̣су. сиригутто тесу патитесу два̄рам̣ пидахитва̄ те уттин̣н̣уттин̣н̣е ‘‘атӣта̄на̄гатапаччуппаннам̣ касма̄ на джа̄на̄тха̄’’ти дан̣д̣ехи па̄тхетва̄ ‘‘еттакам̣ етесам̣ ват̣т̣иссатӣ’’ти два̄рам̣ вивара̄песи. те никкхамитва̄ пала̄йитум̣ а̄рабхим̣су. гаманамагге пана тесам̣ судха̄парикаммакатам̣ бхӯмим̣ пиччхилам̣ ка̄ра̄песи. те таттха асан̣т̣хахитва̄ патите патите пуна потха̄петва̄ ‘‘алам̣ еттакам̣ тумха̄ка’’нти уййоджеси. те ‘‘на̄ситамха̄ тайа̄, на̄ситамха̄ тайа̄’’ти канданта̄ упат̣т̣ха̄касса гехадва̄рам̣ агамам̣су.

гарахадинно там̣ виппака̄рам̣ дисва̄ куддхо ‘‘на̄ситамхи сиригуттена, хаттхам̣ паса̄ретва̄ ванданта̄нам̣ садеваке локе йатха̄ручийа̄ да̄тум̣ саматтхе на̄ма пун̃н̃аккхеттабхӯте мама, аййе, потха̄петва̄ бйасанам̣ па̄песӣ’’ти ра̄джакулам̣ гантва̄ тасса каха̄пан̣асахассам̣ дан̣д̣ам̣ ка̄реси. атхасса ра̄джа̄ са̄санам̣ песеси. со гантва̄ ра̄джа̄нам̣ вандитва̄, ‘‘дева, упапариккхитва̄ дан̣д̣ам̣ ган̣хатха, ма̄ анупапариккхитва̄’’ти а̄ха. ‘‘упапариккхитва̄ ган̣хисса̄мӣ’’ти. ‘‘са̄дху, дева̄’’ти. ‘‘тена хи ган̣ха̄хӣ’’ти. дева, майхам̣ саха̄йако ниган̣т̣хаса̄вако мам̣ упасан̇камитва̄ т̣хитанисиннат̣т̣ха̄на̄дӣсу абхин̣хам̣ евам̣ вадеси – ‘‘самма, ким̣ те саман̣ена готамена, там̣ упасан̇камитва̄ ким̣ лабхиссасӣ’’ти идам̣ а̄дим̣ катва̄ сиригутто саббам̣ там̣ паваттим̣ а̄рочетва̄ ‘‘дева, саче имасмим̣ ка̄ран̣е дан̣д̣ам̣ гахетум̣ йуттам̣, ган̣хатха̄’’ти. ра̄джа̄ гарахадиннам̣ олокетва̄ ‘‘саччам̣ кира те евам̣ вутта’’нти а̄ха. ‘‘саччам̣, дева̄’’ти. твам̣ еттакампи аджа̄нанте саттха̄роти гахетва̄ вичаранто ‘‘саббам̣ джа̄нантӣ’’ти ким̣ ка̄ран̣а̄ татха̄гатаса̄вакасса катхеси. ‘‘тайа̄ а̄ропитадан̣д̣о туйхамева хотӯ’’ти евам̣ свева дан̣д̣ам̣ па̄пито, тассева кулӯпака̄ потхетва̄ нӣхат̣а̄.

со там̣ куджджхитва̄ тато пат̣т̣ха̄йа ад̣д̣хама̄саматтампи сиригуттена саддхим̣ акатхетва̄ чинтеси – ‘‘евам̣ вичаритум̣ майхам̣ айуттам̣, етасса кулӯпака̄нампи майа̄ бйасанам̣ ка̄тум̣ ват̣т̣атӣ’’ти сиригуттам̣ упасан̇камитва̄ а̄ха – ‘‘саха̄йа сиригутта̄’’ти. ‘‘ким̣, самма̄’’ти? ‘‘н̃а̄тисухаджджа̄нам̣ на̄ма калахопи хоти вива̄допи, ким̣ твам̣ кин̃чи на катхеси, касма̄ евам̣ каросӣ’’ти? ‘‘самма, тава майа̄ саддхим̣ акатханато на катхемӣ’’ти. ‘‘йам̣, самма, катам̣, катамева там̣ на майам̣ меттим̣ бхиндисса̄ма̄’’ти. тато пат̣т̣ха̄йа убхопи екат̣т̣ха̄не тит̣т̣ханти нисӣданти. атхекадивасам̣ сиригутто гарахадиннам̣ а̄ха – ‘‘ким̣ те ниган̣т̣хехи, те упасан̇камитва̄ ким̣ лабхиссаси, мама саттха̄рам̣ упасан̇камитум̣ ва̄ аййа̄нам̣ да̄нам̣ да̄тум̣ ва̄ ким̣ те на ват̣т̣атӣ’’ти? сопи етамева пачча̄сӣсати, тенасса кан̣д̣уванат̣т̣ха̄не накхена вилекхитам̣ вийа ахоси. со, ‘‘сиригутта, тава саттха̄ ким̣ джа̄на̄тӣ’’ти пуччхи. ‘‘амбхо, ма̄ евам̣ вада, саттху ме аджа̄нитаббам̣ на̄ма наттхи, атӣта̄дибхедам̣ саббам̣ джа̄на̄ти, сол̣асаха̄ка̄рехи сатта̄нам̣ читтам̣ париччхиндатӣ’’ти. ‘‘ахам̣ евам̣ на джа̄на̄ми, касма̄ майхам̣ еттакам̣ ка̄лам̣ на катхеси, тена хи твам̣ гаччха, тава саттха̄рам̣ сва̄тана̄йа нимантехи, бходжесса̄ми, пан̃чахи бхиккхусатехи саддхим̣ мама бхиккхам̣ ган̣хитум̣ вадехӣ’’ти.

сиригутто саттха̄рам̣ упасан̇камитва̄ вандитва̄ евама̄ха – ‘‘бханте, мама саха̄йако гарахадинно тумхе ниманта̄пети, пан̃чахи кира бхиккхусатехи саддхим̣ све тасса бхиккхам̣ ган̣хатха, пуримадивасе кхо пана тасса кулӯпака̄нам̣ майа̄ идам̣ на̄ма катам̣, майа̄ катасса пат̣икаран̣ампи на джа̄на̄ми, тумха̄кам̣ суддхачиттена бхиккхам̣ да̄тука̄матампи на джа̄на̄ми, а̄ваджджетва̄ йуттам̣ че, адхива̄сетха. но че, ма̄ адхива̄сайиттха̄’’ти. саттха̄ ‘‘ким̣ ну кхо со амха̄кам̣ ка̄ту ка̄мо’’ти а̄ваджджетва̄ аддаса ‘‘двиннам̣ геха̄нам̣ антаре махантам̣ а̄ва̄т̣ам̣ кхан̣а̄петва̄ асӣтисакат̣аматта̄ни кхадирада̄рӯни а̄хара̄петва̄ пӯра̄петва̄ аггим̣ датва̄ амхе ан̇га̄раа̄ва̄т̣е па̄тетва̄ нигган̣хитука̄мо’’ти. пуна а̄ваджджеси – ‘‘ким̣ ну кхо таттха гатапаччайа̄ аттхо аттхи, наттхӣ’’ти. тато идам̣ аддаса – ‘‘ахам̣ ан̇га̄раа̄ва̄т̣е па̄дам̣ паса̄ресса̄ми, там̣ пат̣иччха̄детва̄ т̣хапитакилан̃джам̣ антарадха̄йиссати, ан̇га̄рака̄сум̣ бхиндитва̄ чаккаматтам̣ маха̄падумам̣ ут̣т̣хахиссати, атха̄хам̣ падумакан̣н̣ика̄ аккаманто а̄сане нисӣдисса̄ми, пан̃часата̄ бхиккхӯпи татхева гантва̄ нисӣдиссанти, маха̄джано саннипатиссати, ахам̣ тасмим̣ сама̄гаме двӣхи га̄тха̄хи анумоданам̣ карисса̄ми, анумоданапарийоса̄не чатура̄сӣтийа̄ па̄н̣асахасса̄нам̣ дхамма̄бхисамайо бхависсати, сиригутто ча гарахадинно ча сота̄панна̄ бхависсанти, аттано ча дханара̄сим̣ са̄сане викириссанти, имам̣ кулапуттам̣ нисса̄йа майа̄ гантум̣ ват̣т̣атӣ’’ти бхиккхам̣ адхива̄сеси.

сиригутто гантва̄ саттху адхива̄санам̣ гарахадиннасса а̄рочетва̄ ‘‘локаджет̣т̣хасса сакка̄рам̣ карохӣ’’ти а̄ха. гарахадинно ‘‘ида̄нисса каттаббайуттакам̣ джа̄нисса̄мӣ’’ти двиннам̣ геха̄нам̣ антаре махантам̣ а̄ва̄т̣ам̣ кхан̣а̄петва̄ асӣтисакат̣аматта̄ни кхадирада̄рӯни а̄хара̄петва̄ пӯра̄петва̄ аггим̣ датва̄ кхадиран̇га̄рара̄сӣнам̣ йоджа̄петва̄ саббараттим̣ дхама̄петва̄ кхадиран̇га̄рара̄сим̣ ка̄ра̄петва̄ а̄ва̄т̣аматтхаке руккхападара̄ни т̣хапа̄петва̄ килан̃джена пат̣иччха̄детва̄ гомайена лимпа̄петва̄ екена пассена дуббаладан̣д̣аке аттхаритва̄ гаманамаггам̣ ка̄реси, ‘‘евам̣ аккантааккантака̄ле дан̣д̣акесу бхаггесу париват̣т̣етва̄ ан̇га̄рака̄суйам̣ патиссантӣ’’ти ман̃н̃ама̄но гехапаччха̄бха̄ге сиригуттена т̣хапитанийа̄менева ча̄т̣ийо т̣хапа̄песи, а̄сана̄нипи татхева пан̃н̃а̄песи. сиригутто па̄това тасса гехам̣ гантва̄ ‘‘като те, самма, сакка̄ро’’ти а̄ха. ‘‘а̄ма, самма̄’’ти. ‘‘кахам̣ пана со’’ти? ‘‘ехи, пасса̄ма̄’’ти саббам̣ сиригуттена дасситанайенева дассеси. сиригутто ‘‘са̄дху, самма̄’’ти а̄ха. маха̄джано саннипати. миччха̄дит̣т̣хикена хи нимантите маханто саннипа̄то ахоси. миччха̄дит̣т̣хика̄пи ‘‘саман̣асса готамасса виппака̄рам̣ пассисса̄ма̄’’ти саннипатанти, самма̄дит̣т̣хика̄пи ‘‘аджджа саттха̄ маха̄дхаммадесанам̣ десессати, буддхависайам̣ буддхалӣлам̣ упадха̄ресса̄ма̄’’ти саннипатанти.

пунадивасе саттха̄ пан̃чахи бхиккхусатехи саддхим̣ гарахадиннасса гехадва̄рам̣ агама̄си. со геха̄ никкхамитва̄ пан̃чапатит̣т̣хитена вандитва̄ пурато ан̃джалим̣ паггайха т̣хито чинтеси – ‘‘бханте, ‘тумхе кира атӣта̄дибхедам̣ саббам̣ джа̄на̄тха, сатта̄нам̣ сол̣асаха̄ка̄рехи читтам̣ париччхиндатха̄’ти евам̣ тумха̄кам̣ упат̣т̣ха̄кена майхам̣ катхитам̣. саче джа̄на̄тха, майхам̣ гехам̣ ма̄ пависиттха. павит̣т̣ха̄нан̃хи во нева йа̄гу аттхи, на бхатта̄дӣни, саббе кхо пана тумхе ан̇га̄рака̄суйам̣ па̄тетва̄ нигган̣хисса̄мӣ’’ти. евам̣ чинтетва̄ саттху паттам̣ гахетва̄ ‘‘ито етха бхагава̄’’ти ватва̄, ‘‘бханте, амха̄кам̣ гехам̣ а̄гата̄нам̣ ваттам̣ н̃атва̄ а̄гантум̣ ват̣т̣атӣ’’ти а̄ха. ‘‘ким̣ ка̄тум̣ ват̣т̣ати, а̄вусо’’ти? ‘‘екекасса пависитва̄ пурато гантва̄ нисиннака̄ле паччха̄ ан̃н̃ена а̄гантум̣ ват̣т̣атӣ’’ти. евам̣ кирасса ахоси – ‘‘пурато гаччхантам̣ ан̇га̄рака̄суйам̣ патитам̣ дисва̄ авасеса̄ на а̄гаччхиссанти, екекамева па̄тетва̄ нигган̣хисса̄мӣ’’ти. саттха̄ ‘‘са̄дхӯ’’ти ватва̄ екакова па̄йа̄си. гарахадинно ан̇га̄рака̄сум̣ патва̄ апасаккитва̄ т̣хито ‘‘пурато йа̄тха, бханте’’ти а̄ха. атха саттха̄ ан̇га̄рака̄суматтхаке па̄дам̣ паса̄реси, килан̃джам̣ антарадха̄йи, ан̇га̄рака̄сум̣ бхиндитва̄ чаккаматта̄ни падума̄ни ут̣т̣хахим̣су. саттха̄ падумакан̣н̣ика̄ аккаманто гантва̄ пан̃н̃атте буддха̄сане нисӣди, бхиккхӯпи татхева гантва̄ нисӣдим̣су. гарахадиннасса ка̄йато д̣а̄хо ут̣т̣хахи.

со вегена гантва̄ сиригуттам̣ упасан̇камитва̄, ‘‘са̄ми, ме та̄н̣ам̣ хохӣ’’ти а̄ха. ‘‘ким̣ ета’’нти? ‘‘пан̃чаннам̣ бхиккхусата̄нам̣ гехе йа̄гу ва̄ бхатта̄дӣни ва̄ наттхи, ким̣ ну кхо каромӣ’’ти? ‘‘ким̣ пана тайа̄ ката’’нти а̄ха. ахам̣ двиннам̣ геха̄нам̣ антаре махантам̣ а̄ва̄т̣ам̣ ан̇га̄расса пӯрам̣ ка̄ресим̣ – ‘‘таттха па̄тетва̄ нигган̣хисса̄мӣ’’ти. ‘‘атха нам̣ бхиндитва̄ маха̄падума̄ни ут̣т̣хахим̣су. саббе падумакан̣н̣ика̄ аккамитва̄ гантва̄ пан̃н̃атта̄санесу нисинна̄, ида̄ни ким̣ кароми, са̄мӣ’’ти? нану твам̣ ида̄нева майхам̣ ‘‘‘еттика̄ ча̄т̣ийо, еттика̄ йа̄гу, еттака̄ни сатта̄дӣнӣ’ти дассесӣ’’ти. ‘‘муса̄ там̣, са̄ми, туччха̄ва ча̄т̣ийо’’ти. хоту, ‘‘гаччха, та̄су ча̄т̣ӣсу йа̄гуа̄дӣни олокехӣ’’ти. там̣ кхан̣ан̃н̃ева тена йа̄су ча̄т̣ӣсу ‘‘йа̄гӯ’’ти вуттам̣, та̄ йа̄гуйа̄ пӯрайим̣су, йа̄су ‘‘бхатта̄дӣнӣ’’ти вуттам̣, та̄ бхатта̄дӣнам̣ парипун̣н̣а̄ва ахесум̣. там̣ сампаттим̣ дисва̄ва гарахадиннасса сарӣрам̣ пӣтипа̄моджджена парипӯритам̣, читтам̣ пасаннам̣. со саккаччам̣ буддхаппамукхам̣ бхиккхусан̇гхам̣ паривиситва̄ катабхаттакиччасса саттхуно анумоданам̣ ка̄ретука̄мо паттам̣ ган̣хи. саттха̄ анумоданам̣ каронто ‘‘име сатта̄ пан̃н̃а̄чаккхуно абха̄венева мама са̄вака̄нам̣ буддхаса̄санасса гун̣ам̣ на джа̄нанти. пан̃н̃а̄чаккхувирахита̄ хи андха̄ на̄ма, пан̃н̃аванто сачаккхука̄ на̄ма̄’’ти ватва̄ има̄ га̄тха̄ абха̄си –

58. ‘‘йатха̄ сан̇ка̄радха̄насмим̣, уджджхитасмим̣ маха̄патхе;

падумам̣ таттха джа̄йетха, сучигандхам̣ манорамам̣.

59. ‘‘евам̣ сан̇ка̄рабхӯтесу, андхабхӯте путхуджджане;

атирочати пан̃н̃а̄йа, самма̄самбуддхаса̄вако’’ти.

таттха сан̇ка̄радха̄насминти сан̇ка̄рат̣ха̄насмим̣, качаварара̄симхӣти аттхо. уджджхитасмим̣ маха̄патхети маха̄магге чхад̣д̣итасмим̣. сучигандханти сурабхигандхам̣. мано еттха раматӣти манорамам̣. сан̇ка̄рабхӯтесӯти сан̇ка̄рамива бхӯтесу. путхуджджанети путхӯнам̣ килеса̄нам̣ джананато евам̣ладдхана̄ме локийамаха̄джане. идам̣ вуттам̣ хоти – йатха̄ на̄ма маха̄патхе чхад̣д̣ите сан̇ка̄рара̄симхи асучиджегуччхийапат̣икӯлепи сучигандхам̣ падумам̣ джа̄йетха, там̣ ра̄джара̄джамаха̄матта̄дӣнам̣ манорамам̣ пийам̣ мана̄пам̣ упариматтхаке патит̣т̣ха̄на̄рахамева бхавеййа, евамева сан̇ка̄рабхӯтесупи путхуджджанесу джа̄то ниппан̃н̃асса маха̄джанасса ачаккхукасса антаре ниббаттопи аттано пан̃н̃а̄балена ка̄месу а̄дӣнавам̣, неккхамме ча а̄нисам̣сам̣ дисва̄ никкхамитва̄ паббаджито паббаджджа̄маттенапи, като уттарим̣ сӣласама̄дхипан̃н̃а̄вимуттивимуттин̃а̄н̣адассана̄ни а̄ра̄дхетва̄пи атирочати. самма̄самбуддхаса̄вако хи кхӣн̣а̄саво бхиккху андхабхӯте путхуджджане атиккамитва̄ рочати вирочати собхатӣти.

десана̄васа̄не чатура̄сӣтийа̄ па̄н̣асахасса̄нам̣ дхамма̄бхисамайо ахоси. гарахадинно ча сиригутто ча сота̄паттипхалам̣ па̄пун̣им̣су. те саббам̣ аттано дханам̣ буддхаса̄сане виппакирим̣су. саттха̄ ут̣т̣ха̄йа̄сана̄ виха̄рамагама̄си. бхиккхӯ са̄йанхасамайе дхаммасабха̄йам̣ катхам̣ самут̣т̣ха̄песум̣ – ‘‘ахо аччхарийа̄ буддхагун̣а̄ на̄ма, татха̄рӯпам̣ на̄ма кхадиран̇га̄рара̄сим̣ бхиндитва̄ падума̄ни ут̣т̣хахим̣сӯ’’ти. саттха̄ а̄гантва̄ ‘‘ка̄йа нуттха, бхиккхаве, етарахи катха̄йа саннисинна̄’’ти пуччхитва̄, ‘‘има̄йа на̄ма̄’’ти вутте – ‘‘аначчхарийам̣, бхиккхаве, йам̣ мама етарахи буддхабхӯтасса ан̇га̄рара̄симха̄ падума̄ни ут̣т̣хита̄ни, апарипакке н̃а̄н̣е ваттама̄насса бодхисаттабхӯтассапи ме ут̣т̣хахим̣сӯ’’ти ватва̄, ‘‘када̄, бханте, а̄чиккхатха но’’ти йа̄чито атӣтам̣ а̄харитва̄ –

‘‘ка̄мам̣ пата̄ми нирайам̣, уддхам̣па̄до авам̣сиро;

на̄нарийам̣ карисса̄ми, ханда пин̣д̣ам̣ пат̣иггаха̄’’ти. (джа̄. 1.1.40) –

идам̣ кхадиран̇га̄раджа̄такам̣ виттха̄ретва̄ катхесӣти.

гарахадиннаваттху два̄дасамам̣.

пуппхаваггаван̣н̣ана̄ нит̣т̣хита̄.

чатуттхо вагго.