6. маха̄ка̄л̣аттхераваттху

субха̄нупассинти имам̣ дхаммадесанам̣ саттха̄ сетабйанагарам̣ упанисса̄йа сим̣сапа̄ване вихаранто чӯл̣ака̄л̣амаха̄ка̄л̣е а̄раббха катхеси.

сетабйанагарава̄сино хи чӯл̣ака̄л̣о, маджджхимака̄л̣о, маха̄ка̄л̣оти тайо бха̄таро кут̣умбика̄. тесу джет̣т̣хаканит̣т̣ха̄ диса̄су вичаритва̄ пан̃чахи сакат̣асатехи бхан̣д̣ам̣ а̄харанти, маджджхимака̄л̣о а̄бхатам̣ виккин̣а̄ти. атхекасмим̣ самайе те убхопи бха̄таро пан̃чахи сакат̣асатехи на̄на̄бхан̣д̣ам̣ гахетва̄ са̄ваттхим̣ гантва̄ са̄ваттхийа̄ ча джетаванасса ча антаре сакат̣а̄ни мочайим̣су. тесу маха̄ка̄л̣о са̄йанхасамайе ма̄ла̄гандха̄дихаттхе са̄ваттхива̄сино арийаса̄ваке дхаммассавана̄йа гаччханте дисва̄ ‘‘кухим̣ име гаччхантӣ’’ти пуччхитва̄ таматтхам̣ сутва̄ ‘‘ахампи гамисса̄мӣ’’ти чинтетва̄ канит̣т̣хам̣ а̄мантетва̄, ‘‘та̄та, тесу сакат̣есу аппаматто хохи, ахам̣ дхаммам̣ сотум̣ гаччха̄мӣ’’ти ватва̄ гантва̄ татха̄гатам̣ вандитва̄ парисапарийанте нисӣди. саттха̄ там̣ дисва̄ тасса аджджха̄сайавасена анупуббим̣ катхам̣ катхенто дуккхаккхандхасутта̄дивасена (ма. ни. 1.163 а̄дайо) анекапарийа̄йена ка̄ма̄нам̣ а̄дӣнавам̣ ока̄рам̣ сам̣килесан̃ча катхеси. там̣ сутва̄ маха̄ка̄л̣о ‘‘саббам̣ кира паха̄йа гантаббам̣, паралокам̣ гаччхантам̣ нева бхога̄, на н̃а̄така̄ ча анугаччханти, ким̣ ме гхара̄ва̄сена паббаджисса̄мӣ’’ти чинтетва̄ маха̄джане саттха̄рам̣ вандитва̄ пакканте саттха̄рам̣ паббаджджам̣ йа̄читва̄ саттха̄ра̄ ‘‘наттхи те кочи апалокетаббо’’ти вутте, ‘‘канит̣т̣хо ме, бханте, аттхӣ’’ти ватва̄ тена хи ‘‘апалокехи на’’нти вутте, ‘‘са̄дху, бханте’’ти ватва̄ гантва̄ канит̣т̣хам̣ паккоса̄петва̄, ‘‘та̄та, имам̣ саббам̣ са̄патеййам̣ пат̣ипаджджа̄хӣ’’ти а̄ха. ‘‘тумхе пана ким̣ кариссатха бха̄тика̄’’ти? ‘‘ахам̣ саттху сантике паббаджисса̄мӣ’’ти. со там̣ на̄наппака̄рехи йа̄читва̄ ниваттетум̣ асакконто ‘‘са̄дху, са̄ми, йатха̄ аджджха̄сайам̣ каротха̄’’ти а̄ха. маха̄ка̄л̣о гантва̄ саттху сантике паббаджи. ‘‘ахам̣ бха̄тикам̣ гахетва̄ва уппаббаджисса̄мӣ’’ти чӯл̣ака̄л̣опи паббаджи. апарабха̄ге маха̄ка̄л̣о упасампадам̣ лабхитва̄ саттха̄рам̣ упасан̇камитва̄ са̄сане дхура̄ни пуччхитва̄ саттха̄ра̄ двӣсу дхуресу катхитесу ‘‘ахам̣, бханте, махаллакака̄ле паббаджитатта̄ гантхадхурам̣ пӯретум̣ на саккхисса̄ми, випассана̄дхурам̣ пана пӯресса̄мӣ’’ти йа̄ва арахатта̄ каммат̣т̣ха̄нам̣ катха̄петва̄ соса̄никадхутан̇гам̣ сама̄да̄йа пат̣хамайа̄ма̄тикканте саббесу ниддам̣ оккантесу суса̄нам̣ гантва̄ паччӯсака̄ле саббесу анут̣т̣хитесуйева виха̄рам̣ а̄гаччхати.

атхека̄ суса̄нагопика̄ ка̄лӣ на̄ма чхавад̣а̄хика̄ тхерасса т̣хитат̣т̣ха̄нам̣ нисиннат̣т̣ха̄нам̣ чан̇камитат̣т̣ха̄нан̃ча дисва̄ ‘‘ко ну кхо идха̄гаччхати, паригган̣хисса̄ми на’’нти паригган̣хитум̣ асакконтӣ екадивасам̣ суса̄накут̣ика̄йамева дӣпам̣ джа̄летва̄ путтадхӣтаро а̄да̄йа гантва̄ екаманте нилӣйама̄на̄ маджджхимайа̄ме тхерам̣ а̄гаччхантам̣ дисва̄ гантва̄ вандитва̄, ‘‘аййо, но, бханте, имасмим̣ т̣ха̄не вихаратӣ’’ти а̄ха. ‘‘а̄ма, упа̄сике’’ти. ‘‘бханте, суса̄не вихарантехи на̄ма ваттам̣ угган̣хитум̣ ват̣т̣атӣ’’ти. тхеро ‘‘ким̣ пана майам̣ тайа̄ катхитаватте ваттисса̄ма̄’’ти аватва̄ ‘‘ким̣ ка̄тум̣ ват̣т̣ати упа̄сике’’ти а̄ха. ‘‘бханте, соса̄никехи на̄ма суса̄не васанабха̄во суса̄нагопака̄нан̃ча виха̄ре маха̄тхерасса ча га̄мабходжакасса ча катхетум̣ ват̣т̣атӣ’’ти. ‘‘тхеро ким̣ ка̄ран̣а̄’’ти? ‘‘катакамма̄ чора̄ дханаса̄микехи пада̄нупадам̣ анубаддха̄ суса̄не бхан̣д̣акам̣ чхад̣д̣етва̄ пала̄йанти, атха манусса̄ соса̄ника̄нам̣ парипантхам̣ каронти, етесам̣ пана катхите ‘майам̣ имасса бхаддантасса еттакам̣ на̄ма ка̄лам̣ еттха васанабха̄вам̣ джа̄на̄ма, ачоро есо’ти упаддавам̣ нива̄ренти. тасма̄ етесам̣ катхетум̣ ват̣т̣атӣ’’ти.

‘‘тхеро ан̃н̃ам̣ ким̣ ка̄табба’’нти? ‘‘бханте, суса̄не васантена на̄ма аййена маччхамам̣сатилапит̣т̣хателагул̣а̄дӣни ваджджетабба̄ни, дива̄ на нидда̄йитаббам̣, кусӣтена на бхавитаббам̣, а̄раддхавӣрийена бхавитаббам̣, асат̣хена ама̄йа̄вина̄ хутва̄ калйа̄н̣аджджха̄сайена бхавитаббам̣, са̄йам̣ саббесу суттесу виха̄рато а̄гантаббам̣, паччӯсака̄ле саббесу анут̣т̣хитесуйева виха̄рам̣ гантаббам̣. саче, бханте, аййо имасмим̣ т̣ха̄не евам̣ вихаранто паббаджитакиччам̣ маттхакам̣ па̄петум̣ саккхиссати, саче матасарӣрам̣ а̄нетва̄ чхад̣д̣енти, ахам̣ камбалакӯт̣а̄га̄рам̣ а̄ропетва̄ гандхама̄ла̄дӣхи сакка̄рам̣ катва̄ сарӣракиччам̣ карисса̄ми. но че саккхиссати, читакам̣ а̄ропетва̄ аггим̣ джа̄летва̄ сан̇куна̄ а̄кад̣д̣хитва̄ бахи кхипитва̄ пхарасуна̄ кот̣т̣етва̄ кхан̣д̣а̄кхан̣д̣икам̣ чхиндитва̄ аггимхи паккхипитва̄ джха̄песса̄мӣ’’ти а̄ха. атха нам̣ тхеро ‘‘са̄дху бхадде, екам̣ пана рӯпа̄рамман̣ам̣ дисва̄ майхам̣ катхеййа̄сӣ’’ти а̄ха. са̄ ‘‘са̄дхӯ’’ти паччассоси. тхеро йатха̄джджха̄сайена суса̄не саман̣адхаммам̣ кароти. чӯл̣ака̄л̣аттхеро пана ут̣т̣ха̄йа самут̣т̣ха̄йа гхара̄ва̄сам̣ чинтети, путтада̄рам̣ ануссарати. ‘‘бха̄тико ме атибха̄рийам̣ каммам̣ каротӣ’’ти чинтети.

атхека̄ куладхӣта̄ там̣мухуттасамут̣т̣хитена бйа̄дхина̄ са̄йанхасамайе амила̄та̄ акиланта̄ ка̄ламака̄си. таменам̣ н̃а̄така̄дайо да̄рутела̄дӣхи саддхим̣ са̄йам̣ суса̄нам̣ нетва̄ суса̄нагопика̄йа ‘‘имам̣ джха̄пехӣ’’ти бхатим̣ датва̄ ниййа̄детва̄ паккамим̣су. са̄ тасса̄ па̄рутаваттхам̣ апанетва̄ там̣мухуттаматам̣ пӣн̣итапӣн̣итам̣ суван̣н̣аван̣н̣ам̣ сарӣрам̣ дисва̄, ‘‘имам̣ аййасса дассетум̣ патирӯпам̣ а̄рамман̣а’’нти чинтетва̄ гантва̄ тхерам̣ вандитва̄, ‘‘бханте, еварӯпам̣ на̄ма а̄рамман̣ам̣ аттхи, олокетха аййа̄’’ти а̄ха. тхеро ‘‘са̄дхӯ’’ти ватва̄ па̄рупанам̣ нӣхара̄петва̄ па̄даталато йа̄ва кесагга̄ олокетва̄ ‘‘атипӣн̣итаметам̣ рӯпам̣ суван̣н̣аван̣н̣ам̣ аггимхи нам̣ паккхипитва̄ маха̄джа̄ла̄хи гахитаматтака̄ле майхам̣ а̄рочеййа̄сӣ’’ти ватва̄ сакат̣т̣ха̄намева гантва̄ нисӣди. са̄ татха̄ катва̄ тхерасса а̄рочеси. тхеро гантва̄ олокеси. джа̄ла̄йа пахат̣апахат̣ат̣т̣ха̄нам̣ кабарага̄вийа̄ вийа сарӣраван̣н̣ам̣ ахоси, па̄да̄ намитва̄ оламбим̣су, хаттха̄ пат̣икут̣им̣су, ӯрунала̄т̣ам̣ ниччаммам̣ ахоси. тхеро ‘‘идам̣ сарӣрам̣ ида̄нева олокента̄нам̣ апарийантакарам̣ хутва̄ ида̄нева кхайам̣ паттам̣ вайам̣ патта’’нти раттит̣т̣ха̄нам̣ гантва̄ нисӣдитва̄ кхайавайам̣ сампассама̄но –

‘‘аничча̄ вата сан̇кха̄ра̄, уппа̄давайадхаммино;

уппаджджитва̄ нируджджханти, тесам̣ вӯпасамо сукхо’’ти. (дӣ. ни. 2.221, 272; сам̣. ни. 1.186; 2.143; джа̄. 1.1.95) –

га̄тхам̣ ватва̄ випассанам̣ вад̣д̣хетва̄ саха пат̣исамбхида̄хи арахаттам̣ па̄пун̣и.

тасмим̣ арахаттам̣ патте саттха̄ бхиккхусан̇гхапаривуто ча̄рикам̣ чарама̄но сетабйам̣ гантва̄ сим̣сапа̄ванам̣ па̄виси. чӯл̣ака̄л̣асса бхарийа̄йо ‘‘саттха̄ кира ануппатто сим̣сапа̄вана’’нти сутва̄ ‘‘амха̄кам̣ са̄микам̣ ган̣хисса̄ма̄’’ти песетва̄ саттха̄рам̣ ниманта̄песум̣. буддха̄нам̣ пана апаричин̣н̣ат̣т̣ха̄не а̄санапан̃н̃аттим̣ а̄чиккхантена екена бхиккхуна̄ пат̣хаматарам̣ гантум̣ ват̣т̣ати. буддха̄нан̃хи маджджхимат̣т̣ха̄не а̄санам̣ пан̃н̃а̄петва̄ тасса даккхин̣ато са̄рипуттаттхерасса, ва̄мато маха̄моггалла̄наттхерасса, тато пат̣т̣ха̄йа убхосу пассесу бхиккхусан̇гхасса а̄санам̣ пан̃н̃а̄петаббам̣ хоти. тасма̄ маха̄ка̄л̣аттхеро чӣварапа̄рупанат̣т̣ха̄не т̣хатва̄, ‘‘чӯл̣ака̄л̣а, твам̣ пурато гантва̄ а̄санапан̃н̃аттим̣ а̄чиккха̄’’ти чӯл̣ака̄л̣ам̣ песеси. тасса дит̣т̣хака̄лато пат̣т̣ха̄йа гехаджана̄ тена саддхим̣ париха̄сам̣ каронта̄ нӣча̄сана̄ни сан̇гхаттхерасса кот̣ийам̣ аттхаранти, учча̄сана̄ни сан̇гханавакасса кот̣ийам̣. итаро ‘‘ма̄ евам̣ каротха, нӣча̄сана̄ни упари ма̄ пан̃н̃а̄петха, учча̄сана̄ни упари пан̃н̃а̄петха, нӣча̄сана̄ни хет̣т̣ха̄’’ти а̄ха. иттхийо тасса вачанам̣ асун̣антийо вийа ‘‘твам̣ ким̣ каронто вичараси, ким̣ тава а̄сана̄ни пан̃н̃а̄петум̣ на ват̣т̣ати, твам̣ кам̣ а̄пуччхитва̄ паббаджито, кена паббаджитоси, касма̄ идха̄гатосӣ’’ти ватва̄ нива̄санапа̄рупанам̣ аччхиндитва̄ сетака̄ни нива̄сетва̄ сӣсе ча ма̄ла̄чумбут̣акам̣ т̣хапетва̄, ‘‘гаччха саттха̄рам̣ а̄нехи, майам̣ а̄сана̄ни пан̃н̃а̄песса̄ма̄’’ти пахин̣им̣су. на чирам̣ бхиккхубха̄ве т̣хатва̄ авассикова уппаббаджитатта̄ ладжджитум̣ на джа̄на̄ти, тасма̄ со тена а̄каппена нира̄сан̇кова гантва̄ саттха̄рам̣ вандитва̄ буддхаппамукхам̣ бхиккхусан̇гхам̣ а̄да̄йа а̄гато. бхиккхусан̇гхасса пана бхаттакичча̄васа̄не маха̄ка̄л̣асса бхарийа̄йо ‘‘има̄хи аттано са̄мико гахито, майампи амха̄кам̣ са̄микам̣ ган̣хисса̄ма̄’’ти чинтетва̄ пунадивасе саттха̄рам̣ нимантайим̣су. тада̄ пана а̄санапан̃н̃а̄панаттхам̣ ан̃н̃о бхиккху агама̄си. та̄ тасмим̣ кхан̣е ока̄сам̣ алабхитва̄ буддхаппамукхам̣ бхиккхусан̇гхам̣ нисӣда̄петва̄ бхиккхам̣ адам̣су. чӯл̣ака̄л̣асса пана две бхарийа̄йо, маджджхимака̄л̣асса чатассо, маха̄ка̄л̣асса пана ат̣т̣ха. бхиккхӯпи бхаттакиччам̣ ка̄тука̄ма̄ нисӣдитва̄ бхаттакиччамакам̣су, бахи гантука̄ма̄ ут̣т̣ха̄йа агамам̣су. саттха̄ пана нисӣдитва̄ бхаттакиччам̣ кари. тасса бхаттакиччапарийоса̄не та̄ иттхийо, ‘‘бханте, маха̄ка̄л̣о амха̄кам̣ анумоданам̣ катва̄ а̄гаччхиссати, тумхе пурато гаччхатха̄’’ти вадим̣су. саттха̄ ‘‘са̄дхӯ’’ти ватва̄ пурато агама̄си. га̄мадва̄рам̣ патва̄ бхиккхӯ уджджха̄йим̣су ‘‘ким̣ на̄метам̣ саттха̄ра̄ катам̣, н̃атва̄ ну кхо катам̣, уда̄ху аджа̄нитва̄. хиййо чӯл̣ака̄л̣асса пурато гататта̄ паббаджджантара̄йо джа̄то, аджджа ан̃н̃асса пурато гататта̄ антара̄йо на̄хоси. ида̄ни маха̄ка̄л̣ам̣ т̣хапетва̄ а̄гато, сӣлава̄ кхо пана бхиккху а̄ча̄расампанно, кариссати ну кхо тасса паббаджджантара̄йа’’нти. саттха̄ тесам̣ вачанам̣ сутва̄ ниваттитва̄ т̣хито ‘‘ким̣ катхетха, бхиккхаве’’ти пуччхи. те таматтхам̣ а̄рочесум̣. ‘‘ким̣ пана тумхе, бхиккхаве, чӯл̣ака̄л̣ам̣ вийа маха̄ка̄л̣ам̣ саллаккхетха̄’’ти? ‘‘а̄ма, бханте’’. тасса хи две паджа̄патийо, имасса ат̣т̣ха. ‘‘ат̣т̣хахи париккхипитва̄ гахито ким̣ кариссати, бханте’’ти? саттха̄ ‘‘ма̄, бхиккхаве, евам̣ авачуттха, чӯл̣ака̄л̣о ут̣т̣ха̄йа самут̣т̣ха̄йа субха̄рамман̣абахуло вихарати, папа̄те т̣хито дуббаларуккхасадисо. майхам̣ пана путто маха̄ка̄л̣о асубха̄нупассӣ вихарати, гханаселапаббато вийа ачало’’ти ватва̄ има̄ га̄тха̄ абха̄си –

7. ‘‘субха̄нупассим̣ вихарантам̣, индрийесу асам̣вутам̣;

бходжанамхи ча̄маттан̃н̃ум̣, кусӣтам̣ хӣнавӣрийам̣;

там̣ ве пасахати ма̄ро, ва̄то руккхам̣ва дуббалам̣.

8. ‘‘асубха̄нупассим̣ вихарантам̣, индрийесу сусам̣вутам̣;

бходжанамхи ча маттан̃н̃ум̣, саддхам̣ а̄раддхавӣрийам̣;

там̣ ве наппасахатӣ ма̄ро, ва̄то селам̣ва паббата’’нти.

таттха субха̄нупассим̣ вихарантанти сутам̣ анупассантам̣, ит̣т̣ха̄рамман̣е ма̄насам̣ виссаджджетва̄ вихарантанти аттхо. йо хи пуггало нимиттагга̄хам̣ анубйан̃джанагга̄хам̣ ган̣ханто ‘‘накха̄ собхана̄’’ти ган̣ха̄ти, ‘‘ан̇гулийо собхана̄’’ти ган̣ха̄ти, ‘‘хаттхапа̄да̄, джан̇гха̄, ӯру, кат̣и, ударам̣, тхана̄, гӣва̄, от̣т̣ха̄, данта̄, мукхам̣, на̄са̄, аккхӣни, кан̣н̣а̄, бхамука̄, нала̄т̣ам̣, кеса̄, собхана̄’’ти ган̣ха̄ти, ‘‘кеса̄, лома̄, накха̄, данта̄, тачо, собхана̄’’ти ган̣ха̄ти, ван̣н̣о субхо, сан̣т̣ха̄нам̣ субханти, айам̣ субха̄нупассӣ на̄ма. евам̣ там̣ субха̄нупассим̣ вихарантам̣. индрийесӯти чаккха̄дӣсу чхасу индрийесу. асам̣вутанти чаккхудва̄ра̄дӣни араккхантам̣. парийесанаматта̄ пат̣иггахан̣аматта̄ парибхогаматта̄ти имисса̄ матта̄йа аджа̄нанато бходжанамхи ча̄маттан̃н̃ум̣. апича паччавеккхан̣аматта̄ виссаджджанаматта̄ти имисса̄пи матта̄йа аджа̄нанато аматтан̃н̃ум̣, идам̣ бходжанам̣ дхаммикам̣, идам̣ адхаммикантипи аджа̄нантам̣. ка̄маччхандабйа̄па̄давихим̣са̄витаккавасита̄йа кусӣтам̣. хӣнавӣрийанти ниббӣрийам̣ чатӯсу ирийа̄патхесу вӣрийакаран̣арахитам̣. пасахатӣти абхибхавати аджджхоттхарати. ва̄то руккхам̣ва дуббаланти балавава̄то чхиннапапа̄те джа̄там̣ дуббаларуккхам̣ вийа. йатха̄ хи со ва̄то тасса дуббаларуккхасса пуппхапхалапаллава̄дӣнипи па̄тети, кхуддакаса̄кха̄пи бхан̃джати, маха̄са̄кха̄пи бхан̃джати, самӯлакампи там̣ руккхам̣ уппа̄т̣етва̄ уддхам̣мӯлам̣ адхоса̄кхам̣ катва̄ гаччхати, евамева еварӯпам̣ пуггалам̣ анто уппанно килесама̄ро пасахати, балавава̄то дуббаларуккхасса пуппхапхалапаллава̄дипа̄танам̣ вийа кхудда̄нукхуддака̄паттиа̄паджджанампи кароти, кхуддакаса̄кха̄бхан̃джанам̣ вийа ниссаггийа̄диа̄паттиа̄паджджанампи кароти, маха̄са̄кха̄бхан̃джанам̣ вийа терасасан̇гха̄дисеса̄паттиа̄паджджанампи кароти, уппа̄т̣етва̄ уддхам̣, мӯлакам̣ хет̣т̣ха̄са̄кхам̣ катва̄ па̄танам̣ вийа па̄ра̄джика̄паттиа̄паджджанампи кароти, сва̄ккха̄таса̄сана̄ нӣхаритва̄ катипа̄хенева гихибха̄вам̣ па̄петӣти евам̣ еварӯпам̣ пуггалам̣ килесама̄ро аттано васе ваттетӣти аттхо.

асубха̄нупассинти дасасу асубхесу ан̃н̃атарам̣ асубхам̣ пассантам̣ пат̣икӯламанасика̄ре йуттам̣ кесе асубхато пассантам̣ ломе накхе данте тачам̣ ван̣н̣ам̣ сан̣т̣ха̄нам̣ асубхато пассантам̣. индрийесӯти чхасу индрийесу. сусам̣вутанти нимитта̄дигга̄харахитам̣ пихитадва̄рам̣. аматтан̃н̃ута̄пат̣иккхепена бходжанамхи ча маттан̃н̃ум̣. саддханти каммасса чева пхаласса ча саддаханалаккхан̣а̄йа локика̄йа саддха̄йа чева тӣсу ваттхӯсу авеччаппаса̄дасан̇кха̄та̄йа локуттарасаддха̄йа ча саманна̄гатам̣. а̄раддхавӣрийанти паггахитавӣрийам̣ парипун̣н̣авӣрийам̣. там̣ вети еварӯпам̣ там̣ пуггалам̣ йатха̄ дуббалава̄то сан̣икам̣ пахаранто екаггханам̣ селам̣ ча̄летум̣ на саккоти, татха̄ аббхантаре уппаджджама̄нопи дуббалакилесама̄ро наппасахати, кхобхетум̣ ва̄ ча̄летум̣ ва̄ на саккотӣти аттхо.

та̄пи кхо тасса пура̄н̣адутийика̄йо тхерам̣ парива̄ретва̄ ‘‘твам̣ кам̣ а̄пуччхитва̄ паббаджито, ида̄ни гихӣ бхависсаси на бхависсасӣ’’тиа̄дӣни ватва̄ ка̄са̄вам̣ нӣхаритука̄ма̄ ахесум̣. тхеро та̄сам̣ а̄ка̄рам̣ саллаккхетва̄ нисинна̄сана̄ вут̣т̣ха̄йа иддхийа̄ уппаттитва̄ кӯт̣а̄га̄ракан̣н̣икам̣ двидха̄ бхиндитва̄ а̄ка̄сена̄гантва̄ саттхари га̄тха̄ парийоса̄пентейева саттху суван̣н̣аван̣н̣ам̣ сарӣрам̣ абхиттхаванто а̄ка̄сато отаритва̄ татха̄гатасса па̄де ванди.

га̄тха̄парийоса̄не сампаттабхиккхӯ сота̄паттипхала̄дӣсу патит̣т̣хахим̣сӯти.

маха̄ка̄л̣аттхераваттху чхат̣т̣хам̣.