7. маггада̄йакаттхераапада̄наван̣н̣ана̄

уттаритва̄на надикантиа̄дикам̣ а̄йасмато маггада̄йакаттхерасса апада̄нам̣. айампи пуримаджинаваресу ката̄дхика̄ро анекесу бхавесу нибба̄на̄дхигаматтха̄йа пун̃н̃а̄ни упачинанто сиддхаттхасса бхагавато ка̄ле локасаммате куле ниббатто вуддхиманва̄йа гхара̄ва̄сам̣ васанто екадивасам̣ бхагавантам̣ екам̣ надим̣ уттаритва̄ ванантарам̣ гаччхантам̣ дисва̄ пасаннама̄насо ‘‘ида̄ни майа̄ бхагавато маггам̣ самам̣ ка̄тум̣ ват̣т̣атӣ’’ти чинтетва̄ куда̄лан̃ча пит̣акан̃ча а̄да̄йа бхагавато гаманамаггам̣ самам̣ катва̄ ва̄лукам̣ окиритва̄ бхагавато па̄де вандитва̄, ‘‘бханте, имина̄ магга̄лан̇ка̄ракаран̣ена ниббаттаниббаттат̣т̣ха̄не пӯджанӣйо бхавеййам̣, нибба̄нан̃ча па̄пун̣еййа’’нти паттханам̣ ака̄си. бхагава̄ ‘‘йатха̄дхиппа̄йам̣ самиджджхатӯ’’ти анумоданам̣ ватва̄ пакка̄ми.

32-3. со тена пун̃н̃ена девамануссесу сам̣саранто саббаттха пӯджито ахоси. имасмим̣ пана буддхуппа̄де па̄кат̣е екасмим̣ куле ниббатто саттхари пасанно паббаджитва̄ випассанам̣ вад̣д̣хетва̄ начирассева арахаттам̣ патва̄ аттано пуббакаммам̣ паччаккхато н̃атва̄ соманассаджа̄то пуббачарита̄пада̄нам̣ пака̄сенто уттаритва̄на надикантиа̄дима̄ха. таттха надати саддам̣ кароти гаччхатӣти надӣ, надӣйева надика̄, там̣ надикам̣ уттаритва̄ атиккамитва̄ти аттхо. куда̄лапит̣акама̄да̄йа̄ти ку вуччати патхавӣ, там̣ вида̄лане пада̄лане чхиндане аланти куда̄лам̣, пит̣акам̣ вуччати пам̣сува̄лика̄дива̄хакам̣, та̄лапан̣н̣аветталата̄дӣхи катабха̄джанам̣, куда̄лан̃ча пит̣акан̃ча куда̄лапит̣акам̣, там̣ а̄да̄йа гахетва̄ти аттхо. сесам̣ утта̄наттхамева̄ти.

маггада̄йакаттхераапада̄наван̣н̣ана̄ саматта̄.