5. ума̄пуппхийаттхераапада̄наван̣н̣ана̄

ниббуте локамахитетиа̄дикам̣ а̄йасмато ума̄пуппхийаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сиддхаттхасса бхагавато ка̄ле кулагехе ниббатто вуддхиппатто гхара̄ва̄сам̣ сан̣т̣хапетва̄ васанто ниббутасса бхагавато четийамахе ваттама̄не инданӣламан̣иван̣н̣ам̣ ума̄пуппхам̣ гахетва̄ пӯджеси. со тена пун̃н̃ена сугатӣсуйева сам̣саранто диббама̄нусасампаттийо анубхавитва̄ уппаннуппаннабхаве бахулам̣ нӣлаван̣н̣о джа̄тисампанно вибхавасампанно ахоси. со имасмим̣ буддхуппа̄де вибхавасампанне екасмим̣ кулагехе ниббатто вин̃н̃утам̣ патва̄ саддха̄джа̄то паббаджито начирассева арахаттам̣ па̄пун̣и.

21. со пуббакаммам̣ саритва̄ соманассаджа̄то пуббачарита̄пада̄нам̣ пака̄сенто ниббуте локамахитетиа̄ди вуттам̣. таттха локамахитети локехи махито пӯджитоти локамахито, тасмим̣ локамахите сиддхаттхамхи бхагавати париниббутети самбандхо. а̄хутӣнам̣пат̣иггахети а̄хутино вуччанти пӯджа̄сакка̄ра̄, тесам̣ а̄хутӣнам̣ пат̣иггахетум̣ арахатӣти а̄хутӣнам̣пат̣иггахо, алуттакитантасама̄со, тасмим̣ а̄хутӣнам̣пат̣иггахе бхагавати париниббутети аттхо.

22. ума̄пуппханти уддхамуддхам̣ нӣлапабхам̣ мун̃чама̄нам̣ пуппхати викасатӣти ума̄пуппхам̣, там̣ ума̄пуппхам̣ гахетва̄ четийе пӯджам̣ ака̄синти аттхо. сесам̣ утта̄наттхамева̄ти.

ума̄пуппхийаттхераапада̄наван̣н̣ана̄ саматта̄.