3. ведика̄ракаттхераапада̄наван̣н̣ана̄

ниббуте локана̄тхамхӣтиа̄дикам̣ а̄йасмато ведика̄ракаттхерасса апада̄нам̣. айампи пуримаджинаваресу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто пийадассисса бхагавато ка̄ле вибхавасампанне екасмим̣ куле ниббатто вин̃н̃утам̣ патва̄ гхара̄ва̄сам̣ сан̣т̣хапетва̄ ниббуте саттхари пасанно тасса четийе валайам̣ ка̄реси, саттахи ратанехи парипӯретва̄ маха̄пӯджам̣ ка̄реси. со тена пун̃н̃ена девамануссесу сам̣саранто анекесу джа̄тисатасахассесу пӯджанӣйо махаддхано маха̄бхого убхайасукхам̣ анубхавитва̄ имасмим̣ буддхуппа̄де кулагехе ниббатто вибхавасампанно паббаджитва̄ ва̄йаманто начирассева араха̄ ахоси.

10. со екадивасам̣ аттано пуббе катакусалам̣ саритва̄ соманассаджа̄то пуббачарита̄пада̄нам̣ пака̄сенто ниббуте локана̄тхамхӣтиа̄дима̄ха. там̣ хет̣т̣ха̄ вуттаттхамева. пийадассӣнаруттамети пийам̣ соманасса̄ка̄рам̣ дассанам̣ йасса со пийадассӣ, а̄рохапарин̣а̄хадваттим̣самаха̄пурисалаккхан̣аасӣта̄нубйан̃джанабйа̄маппабха̄ман̣д̣алехи са̄дху маха̄джанаппаса̄дам̣ джанайана̄ка̄радассаноти аттхо. нара̄нам̣ уттамоти наруттамо, пийадассӣ ча со наруттамо чети пийадассӣнаруттамо, тасмим̣ пийадассӣнаруттаме ниббуте дха̄тугаббхамхи муттаведим̣ ахам̣ ака̄синти самбандхо. пуппха̄дха̄раттха̄йа парийоса̄не ведика̄валайам̣ ака̄синти аттхо.

11. ман̣ӣхи парива̄ретва̄ти ман̣ати джотати пабха̄сатӣти ман̣и, атха ва̄ джана̄нам̣ манам̣ пӯренто соманассам̣ каронто ито гато паваттоти ман̣и, джа̄тиран̇гаман̣ивел̣урийаман̣иа̄дӣхи анекехи ман̣ӣхи катаведика̄валайам̣ парива̄ретва̄ уттамам̣ маха̄пӯджам̣ ака̄синти аттхо. сесам̣ утта̄наттхамева̄ти.

ведика̄ракаттхераапада̄наван̣н̣ана̄ саматта̄.