1. атичхаттийаттхераапада̄наван̣н̣ана̄

париниббуте бхагаватӣтиа̄дикам̣ а̄йасмато атичхаттийаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто аттхадассисса бхагавато ка̄ле екасмим̣ кулагехе ниббатто дхарама̄насса бхагавато адит̣т̣хатта̄ париниббутака̄ле ‘‘ахо мама париха̄нӣ’’ти чинтетва̄ ‘‘мама джа̄тим̣ сапхалам̣ карисса̄мӣ’’ти катасаннит̣т̣ха̄но чхатта̄дхичхаттам̣ ка̄ретва̄ тасса бхагавато сарӣрадха̄тум̣ нихитадха̄тугаббхам̣ пӯджеси. апарабха̄ге пуппхаччхаттам̣ ка̄ретва̄ тамева дха̄тугаббхам̣ пӯджеси. со тенева пун̃н̃ена девамануссесу сам̣саранто убхайасампаттийо анубхавитва̄ имасмим̣ буддхуппа̄де гахапатикуле ниббатто вин̃н̃утам̣ патто саттхари пасанно паббаджитва̄ каммат̣т̣ха̄нам̣ гахетва̄ ва̄йаманто начирассева арахаттам̣ па̄пун̣и.

1. со аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто париниббуте бхагаватӣтиа̄дима̄ха. таттха чхатта̄тичхаттанти чха̄дийати сам̣варийати а̄тапа̄динти чхаттам̣, чхаттасса атичхаттам̣ чхаттасса упари катачхаттам̣ чхатта̄тичхаттам̣, чхаттасса упарӯпари чхаттанти аттхо. тхӯпамхи абхиропайинти тхӯпийати ра̄сикарӣйатӣти тхӯпо, атха ва̄ тхӯпати тхирабха̄вена вуддхим̣ вирӯл̣хим̣ вепуллам̣ а̄паджджама̄но патит̣т̣ха̄тӣти тхӯпо, тасмим̣ тхӯпамхи майа̄ ка̄ритам̣ чхаттам̣ упарӯпари т̣хапанавасена абхи висесена а̄ропайим̣ пӯджесинти аттхо.

2. пуппхаччхаданам̣ катва̄на̄ти викаситехи сугандхехи анекехи пхуппхехи чхаданам̣ чхаттупари вита̄нам̣ катва̄ пӯджесинти аттхо. сесам̣ саббаттха утта̄наттхамева̄ти.

атичхаттийаттхераапада̄наван̣н̣ана̄ саматта̄.