3-5. пун̣н̣аманта̄н̣ипуттаттхераапада̄наван̣н̣ана̄

аджджха̄йако мантадхаротиа̄дикам̣ а̄йасмато пун̣н̣асса манта̄н̣ипуттаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто падумуттарасса бхагавато уппаттито пуретарамева хам̣саватӣнагаре бра̄хман̣амаха̄са̄лакуле ниббаттитва̄ ануккамена вин̃н̃утам̣ патто. апарабха̄ге падумуттаре бхагавати уппаджджитва̄ бодханеййа̄нам̣ дхаммам̣ десенте хет̣т̣ха̄ вуттанайена маха̄джанена саддхим̣ виха̄рам̣ гантва̄ парисапарийанте нисӣдитва̄ дхаммам̣ сун̣анто саттха̄рам̣ екам̣ бхиккхум̣ дхаммакатхика̄нам̣ аггат̣т̣ха̄не т̣хапентам̣ дисва̄ ‘‘майа̄пи ана̄гате еварӯпена бхавитум̣ ват̣т̣атӣ’’ти чинтетва̄ десана̄васа̄не ут̣т̣хита̄йа париса̄йа саттха̄рам̣ упасан̇камитва̄ нимантетва̄ хет̣т̣ха̄ вуттанайена маха̄сакка̄рам̣ катва̄ бхагавантам̣ евама̄ха – ‘‘бханте, ахам̣ имина̄ адхика̄рена на ан̃н̃ам̣ сампаттим̣ паттхеми, йатха̄ панесо бхиккху саттамадивасаматтхаке тумхехи дхаммакатхика̄нам̣ аггат̣т̣ха̄не т̣хапито, евам̣ ахампи ана̄гате екасса буддхасса са̄сане дхаммакатхика̄нам̣ агго бхавеййа’’нти паттханам̣ ака̄си. саттха̄ ана̄гатам̣ олокетва̄ тасса паттхана̄йа самиджджханабха̄вам̣ дисва̄ ‘‘ана̄гате каппасатасахассаматтхаке готамо на̄ма буддхо уппаджджиссати, тасса са̄сане паббаджитва̄ твам̣ дхаммакатхика̄нам̣ агго бхависсасӣ’’ти бйа̄ка̄си.

со йа̄вата̄йукам̣ калйа̄н̣акаммам̣ катва̄ тато чуто каппасатасахассам̣ пун̃н̃асамбха̄рам̣ самбхаранто девамануссесу сам̣саритва̄ амха̄кам̣ бхагавато ка̄ле капилаваттхунагарасса авидӯре дон̣аваттхуна̄маке бра̄хман̣ага̄ме бра̄хман̣амаха̄са̄лакуле ан̃н̃а̄сикон̣д̣ан̃н̃аттхерасса бха̄гинеййо хутва̄ ниббатти. тасса пун̣н̣оти на̄мам̣ акам̣су. со саттхари абхисамбодхим̣ патва̄ паваттитаварадхаммачакке ануккамена ра̄джагахам̣ упанисса̄йа вихаранте ан̃н̃а̄сикон̣д̣ан̃н̃асса сантике паббаджитва̄ ладдхӯпасампадо падха̄намануйун̃джанто саббам̣ паббаджитакиччам̣ маттхакам̣ па̄петва̄ ‘‘дасабаласса сантикам̣ гамисса̄мӣ’’ти ма̄тулаттхерена саддхим̣ саттху сантикам̣ а̄гантва̄ капилаваттхуса̄манта̄йева охийитва̄ йонисо манасика̄ре каммам̣ каронто начирассева випассанам̣ уссукка̄петва̄ арахаттам̣ па̄пун̣и.

тасса пана пун̣н̣аттхерасса сантике паббаджита̄ кулапутта̄ пан̃часата̄ ахесум̣. тхеро те дасакатха̄ваттхӯхи овади. тепи саббе дасакатха̄ваттхӯхи овадита̄ тасса ова̄де т̣хатва̄ арахаттам̣ па̄пун̣итва̄ аттано паббаджитакиччам̣ маттхакаппаттам̣ н̃атва̄ упаджджха̄йам̣ упасан̇камитва̄ а̄хам̣су – ‘‘бханте, майам̣ паббаджитакиччасса маттхакам̣ патта̄, дасаннан̃ча катха̄ваттхӯнам̣ ла̄бхино, самайо да̄ни но дасабалам̣ пасситу’’нти, тхеро тесам̣ вачанам̣ сутва̄ чинтеси – ‘‘майхам̣ дасакатха̄ваттхула̄бхитам̣ саттха̄ джа̄на̄ти. ахам̣ дхаммам̣ десенто дасакатха̄ваттхӯни амун̃читва̄ва десеми, майи ча гаччханте саббепиме бхиккхӯ мам̣ парива̄ретва̄ гаччхиссанти, евам̣ ме ган̣ена саддхим̣ гантва̄ айуттам̣ дасабалам̣ пасситум̣, име та̄ва дасабалам̣ пасситум̣ гаччхантӯ’’ти. атха те евама̄ха – ‘‘а̄вусо, тумхе пурато гантва̄ дасабалам̣ пассатха, мама вачанена татха̄гатасса па̄де вандатха, ахампи тумха̄кам̣ гатамаггена а̄гаччхисса̄мӣ’’ти. тепи тхера̄ саббе дасабаласса джа̄тибхӯмират̣т̣хава̄сино саббе кхӣн̣а̄сава̄ саббе дасакатха̄ваттхула̄бхино упаджджха̄йасса ова̄дам̣ аччхиндитва̄ тхерам̣ вандитва̄ анупуббена ча̄рикам̣ чаранта̄ сат̣т̣хийоджанамаггам̣ атиккамма ра̄джагахе вел̣уванамаха̄виха̄рам̣ гантва̄ дасабаласса па̄де вандитва̄ екамантам̣ нисӣдим̣су. а̄чин̣н̣ам̣ кхо панетам̣ буддха̄нам̣ бхагаванта̄нам̣ а̄гантукехи бхиккхӯхи саддхим̣ пат̣исаммодитунти бхагава̄ техи саддхим̣ ‘‘каччи, бхиккхаве, кхаманӣйа’’нтиа̄дина̄ найена мадхурапат̣исантха̄рам̣ катва̄ ‘‘куто ча тумхе, бхиккхаве, а̄гататтха̄’’ти пуччхитва̄ пуна техи ‘‘джа̄тибхӯмито’’ти вутте ‘‘ко ну кхо, бхиккхаве, джа̄тибхӯмийам̣ джа̄тибхӯмака̄нам̣ бхиккхӯнам̣ сабрахмача̄рӣнам̣ евам̣ самбха̄вито ‘аттана̄ ча аппиччхо аппиччхакатхан̃ча бхиккхӯнам̣ катта̄’’’ти (ма. ни. 1.252) дасакатха̄ваттхула̄бхим̣ бхиккхум̣ пуччхи. тепи ‘‘пун̣н̣о на̄ма, бханте, а̄йасма̄ манта̄н̣ипутто’’ти а̄рочайим̣су.

тесам̣ катхам̣ сутва̄ а̄йасма̄ са̄рипутто тхерам̣ дассанака̄мо ахоси. атха саттха̄ ра̄джагахато са̄ваттхим̣ агама̄си. пун̣н̣аттхеропи дасабаласса таттха а̄гатабха̄вам̣ сутва̄ ‘‘саттха̄рам̣ пассисса̄мӣ’’ти гантва̄ антогандхакут̣ийам̣йева татха̄гатам̣ сампа̄пун̣и. саттха̄ тасса дхаммам̣ десеси. тхеро дхаммам̣ сутва̄ дасабалам̣ вандитва̄ пат̣исалла̄наттха̄йа андхаванам̣ гантва̄ ан̃н̃атарасмим̣ руккхамӯле дива̄виха̄рам̣ нисӣди. са̄рипуттаттхеропи тасса̄гаманам̣ сутва̄ сӣса̄нулокико гантва̄ ока̄сам̣ саллаккхетва̄ тасмим̣ руккхамӯле нисиннакам̣ упасан̇камитва̄ тхерена саддхим̣ саммодитва̄ там̣ висуддхиккамам̣ (ма. ни. 1.257) пуччхи. сописса пуччхитапуччхитам̣ бйа̄каронто ратхавинӣтӯпама̄йа ативийа читтам̣ а̄ра̄дхеси. те ан̃н̃аман̃н̃асса субха̄ситам̣ саманумодим̣су.

434. атха нам̣ саттха̄ апарабха̄ге бхиккхусан̇гхасса маджджхе нисинно тхерам̣ ‘‘етадаггам̣, бхиккхаве, мама са̄вака̄нам̣ бхиккхӯнам̣ дхаммакатхика̄нам̣ йадидам̣ пун̣н̣о’’ти (а. ни. 1.188, 196) етадагге т̣хапеси. со пуббакаммам̣ саритва̄ соманассавасена пуббачарита̄пада̄нам̣ вибха̄венто аджджха̄йакотиа̄дима̄ха. таттха аджджха̄йакоти анекабра̄хман̣а̄нам̣ ва̄чета̄ сиккха̄пета̄. мантадхароти манта̄нам̣ дха̄рета̄ти аттхо, ведасан̇кха̄тасса чатуттхаведасса саджджха̄йанасаванада̄на̄нам̣ васена дха̄рета̄ти вуттам̣ хоти. тин̣н̣ам̣ веда̄нанти ируведайаджуведаса̄маведасан̇кха̄та̄нам̣ тин̣н̣ам̣ веда̄нам̣ н̃а̄н̣ена дха̄ретаббата̄ ‘‘ведо’’ти ладдхана̄месу тӣсу ведагантхесу па̄рам̣ парийоса̄нам̣ гатоти аттхо. пураккхатомхи сиссехӣти мама ниччапарива̄рабхӯтехи сиссехи паривуто ахам̣ амхи. упагаччхим̣ наруттаманти нара̄нам̣ уттамам̣ бхагавантам̣ упасан̇камим̣, самӣпам̣ гатоти аттхо. сесам̣ сувин̃н̃еййамева.

438. абхидхамманайан̃н̃ӯханти ахам̣ тада̄ тасса буддхасса ка̄ле абхидхамманайаковидоти аттхо. катха̄ваттхувисуддхийа̄ти катха̄ваттхуппакаран̣е висуддхийа̄ чхеко, аппиччхасантут̣т̣хикатха̄дӣсу дасасу катха̄ваттхӯсу ва̄ чхеко, та̄йа катха̄ваттхувисуддхийа̄ саббесам̣ йатиджана̄нам̣ пан̣д̣ита̄нам̣ вин̃н̃а̄петва̄на бодхетва̄на ана̄саво никкилесо вихара̄ми ва̄сам̣ каппеми.

439. ито пан̃часате каппети ито пан̃чабуддхапат̣иман̣д̣итато бхаддакаппато пан̃часате каппе суппака̄сака̄ сут̣т̣ху па̄кат̣а̄ чаккаратана̄ди саттахи ратанехи сампанна̄ джамбудӣпа̄дичатудӣпамхи иссара̄ падха̄на̄ чатуро чатта̄ро чаккаваттира̄джа̄но ахесунти аттхо. сесам̣ вуттанайамева̄ти.

пун̣н̣аманта̄н̣ипуттаттхераапада̄наван̣н̣ана̄ саматта̄.