3-8. пин̣д̣олабха̄радва̄джаттхераапада̄наван̣н̣ана̄

падумуттаро на̄ма джинотиа̄дикам̣ а̄йасмато пин̣д̣олабха̄радва̄джасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто падумуттарасса бхагавато ка̄ле сӣхайонийам̣ ниббаттитва̄ паббатапа̄де гуха̄йам̣ виха̄си. бхагава̄ тасса ануггахам̣ ка̄тум̣ гочара̄йа паккантака̄ле тасса сайанагухам̣ пависитва̄ ниродхам̣ сама̄паджджитва̄ нисӣди. сӣхо гочарам̣ гахетва̄ ниватто гухадва̄ре т̣хатва̄ бхагавантам̣ дисва̄ хат̣т̣хатут̣т̣хо джаладжатхаладжапуппхехи пӯджам̣ катва̄ читтам̣ паса̄денто бхагавато а̄раккхан̣аттха̄йа ан̃н̃е ва̄л̣амиге апанетум̣ тӣсу вела̄су сӣхана̄дам̣ наданто буддхагата̄йа сатийа̄ ат̣т̣ха̄си. йатха̄ пат̣хамадивасе, евам̣ сатта̄хам̣ пӯджеси. бхагава̄ ‘‘сатта̄хаччайена ниродха̄ вут̣т̣хахитва̄ ват̣т̣иссати имасса еттако упаниссайо’’ти тасса пассантассева а̄ка̄сам̣ паккхандитва̄ виха̄рамева гато.

сӣхо буддхавийогадуккхам̣ адхива̄сетум̣ асакконто ка̄лам̣ катва̄ хам̣саватӣнагаре маха̄бхогакуле ниббаттитва̄ вайаппатто нагарава̄сӣхи саддхим̣ виха̄рам̣ гантва̄ саттху дхаммадесанам̣ сутва̄ пасанно сатта̄хам̣ буддхаппамукхасса бхиккхусан̇гхасса маха̄да̄нам̣ паваттетва̄ йа̄ваджӣвам̣ пун̃н̃а̄ни катва̄ апара̄парам̣ девамануссесу сам̣саранто амха̄кам̣ бхагавато ка̄ле косамбийам̣ ран̃н̃о уденасса пурохитасса путто хутва̄ ниббатти. бха̄радва̄джотисса на̄мам̣ ахоси. со вайаппато тайо веде уггахетва̄ пан̃ча ма̄н̣авакасата̄ни манте ва̄ченто махаггхасабха̄вена ананурӯпа̄ча̄ратта̄ техи париччатто ра̄джагахам̣ гантва̄ бхагавато бхиккхусан̇гхасса ча ла̄бхасакка̄рам̣ дисва̄ са̄сане паббаджитва̄ бходжане аматтан̃н̃ӯ хутва̄ вихарати. саттха̄ра̄ упа̄йена маттан̃н̃ута̄йа патит̣т̣ха̄пенто випассанам̣ пат̣т̣хапетва̄ начирассева чхал̣абхин̃н̃о ахоси. чхал̣абхин̃н̃о пана хутва̄ бхагавато саммукха̄ ‘‘йам̣ са̄вакехи паттаббам̣, там̣ майа̄ ануппатта’’нти, бхиккхусан̇гхе ча ‘‘йасса магге ва̄ пхале ва̄ кан̇кха̄ аттхи, со мам̣ пуччхатӯ’’ти сӣхана̄дам̣ нади. тена там̣ бхагава̄ – ‘‘етадаггам̣, бхиккхаве, мама са̄вака̄нам̣ бхиккхӯнам̣ сӣхана̄дика̄нам̣ йадидам̣ пин̣д̣олабха̄радва̄джо’’ти (а. ни. 1.188, 195) етадагге т̣хапеси.

613. евам̣ етадаггам̣ т̣ха̄нам̣ патва̄ пуббе катапун̃н̃асамбха̄рам̣ саритва̄ соманассавасена аттано пун̃н̃акамма̄пада̄нам̣ вибха̄венто падумуттаротиа̄дима̄ха. тассаттхо хет̣т̣ха̄ вуттова. пурато химавантасса̄ти хима̄лайапаббатато пуббадиса̄бха̄гети аттхо. читтакӯт̣е васӣ тада̄ти йада̄ ахам̣ сӣхо мигара̄джа̄ хутва̄ химавантапаббатасамӣпе васа̄ми, тада̄ падумуттаро на̄ма саттха̄ анекехи ча осадхехи, анекехи ча ратанехи читтавичиттата̄йа читтакӯт̣е читтапаббатасикхаре васӣти самбандхо.

614. абхӣтарӯпо таттха̄синти абхӣтасабха̄во ниббхайасабха̄во мигара̄джа̄ таттха а̄сим̣ ахосинти аттхо. чатуккамоти чатӯхи диса̄хи камо гантум̣ саматтхо. йасса саддам̣ сун̣итва̄на̄ти йасса мигаран̃н̃о сӣхана̄дам̣ сутва̄ бахуджджана̄ бахусатта̄ виккхамбханти висесена кхамбханти бха̄йанти.

615. супхуллам̣ падумам̣ гайха̄ти бхагавати паса̄дена супуппхитападумапуппхам̣ д̣ам̣ситва̄. нара̄сабхам̣ нара̄нам̣ а̄сабхам̣ уттамам̣ сет̣т̣хам̣ самбуддхам̣ упагаччхим̣, самӣпам̣ агаминти аттхо. вут̣т̣хитасса сама̄дхимха̄ти ниродхасама̄паттито вут̣т̣хитасса буддхасса там̣ пуппхам̣ абхиропайим̣ пӯджесинти аттхо.

616. чатуддисам̣ намасситва̄ти чатӯсу диса̄су намасситва̄ сакам̣ читтам̣ аттано читтам̣ паса̄детва̄ а̄дарена патит̣т̣хапетва̄ сӣхана̄дам̣ абхӣтана̄дам̣ анадим̣ гхосесинти аттхо.

617. тато буддхена диннабйа̄каран̣ам̣ пака̄сенто падумуттаротиа̄дима̄ха. там̣ утта̄наттхамева.

618. вадатам̣ сет̣т̣хоти ‘‘майам̣ буддха̄, майам̣ буддха̄’’ти ваданта̄нам̣ ан̃н̃атиттхийа̄нам̣ сет̣т̣хо уттамо буддхо а̄гатоти самбандхо. тасса а̄гатасса бхагавато там̣ дхаммам̣ сосса̄ма сун̣исса̄ма̄ти аттхо.

619. тесам̣ ха̄сапарета̄нанти ха̄сехи соманассехи парета̄нам̣ абхибхӯта̄нам̣ саманна̄гата̄нам̣ тесам̣ деваманусса̄нам̣. локана̄йакоти локасса на̄йако саггамоккхасампа̄пако мама саддам̣ майхам̣ сӣхана̄дам̣ пакиттеси пака̄сеси катхеси, дӣгхадассӣ ана̄гатака̄ладассӣ маха̄муни мунӣнамантаре маханто муни. сесага̄тха̄ сувин̃н̃еййамева.

622. на̄мена падумо на̄ма чаккаваттӣ хутва̄ чатусат̣т̣хийа̄ джа̄тийа̄ иссарийам̣ иссарабха̄вам̣ раджджам̣ ка̄райиссатӣти аттхо.

623. каппасатасахассамхӣти са̄мйаттхе бхуммавачанам̣, каппасатасахасса̄нам̣ парийоса̄нети аттхо.

624. пака̄сите па̄вачанети тена готамена бхагавата̄ пит̣акаттайе пака̄сите деситети аттхо. брахмабандху бхависсатӣти тада̄ готамасса бхагавато ка̄ле айам̣ сӣхо мигара̄джа̄ бра̄хман̣акуле ниббаттиссатӣти аттхо. брахман̃н̃а̄ абхиниккхамма̄ти бра̄хман̣акулато никкхамитва̄ тасса бхагавато са̄сане паббаджиссатӣти самбандхо.

625. падха̄напахитаттоти вӣрийакаран̣аттхам̣ песитачитто. упадхисан̇кха̄та̄нам̣ килеса̄нам̣ абха̄вена нирупадхи. килесадаратха̄нам̣ абха̄вена упасанто. сабба̄саве сакала̄саве парин̃н̃а̄йа паха̄йа ана̄саво никкилесо нибба̄йиссати кхандхапаринибба̄нена ниббуто бхависсатӣти аттхо.

626. виджане пантасеййамхӣти джанасамба̄дхарахите дӯра̄ран̃н̃асена̄санети аттхо. ва̄л̣амигасама̄кулети ка̄л̣асӣха̄дӣхи чан̣д̣амигасан̇гехи а̄куле сам̣кин̣н̣ети аттхо. сесам̣ вуттаттхамева̄ти.

пин̣д̣олабха̄радва̄джаттхераапада̄наван̣н̣ана̄ саматта̄.