па̄тимоккхасам̣вараван̣н̣ана̄

364. тато там̣ пуччханто катхам̣ пат̣ипанно пана, ма̄риса̄тиа̄дима̄ха. таттха па̄тимоккхасам̣вара̄йа̄ти уттамаджет̣т̣хакасӣласам̣вара̄йа. ка̄йасама̄ча̄рампӣтиа̄ди севитаббака̄йасама̄ча̄ра̄дивасена па̄тимоккхасам̣варадассанаттхам̣ вуттам̣. сӣлакатха̄ ча на̄меса̄ каммапатхавасена ва̄ пан̣н̣аттивасена ва̄ катхетабба̄ хоти.

таттха каммапатхавасена катхентена асевитаббака̄йасама̄ча̄ро та̄ва па̄н̣а̄типа̄таадинна̄да̄намиччха̄ча̄рехи катхетаббо. пан̣н̣аттивасена катхентена ка̄йадва̄ре пан̃н̃аттасиккха̄падавӣтиккамавасена катхетаббо. севитаббака̄йасама̄ча̄ро па̄н̣а̄типа̄та̄дивераман̣ӣхи чева ка̄йадва̄ре пан̃н̃аттасиккха̄падаавӣтиккамена ча катхетаббо. асевитаббавачӣсама̄ча̄ро муса̄ва̄да̄дивачӣдуччаритена чева вачӣдва̄ре пан̃н̃аттасиккха̄падавӣтиккамена ча катхетаббо. севитаббавачӣсама̄ча̄ро муса̄ва̄да̄дивераман̣ӣхи чева вачӣдва̄ре пан̃н̃аттасиккха̄падаавӣтиккамена ча катхетаббо.

парийесана̄ пана ка̄йава̄ча̄хи парийесана̄йева. са̄ ка̄йавачӣсама̄ча̄рагахан̣ена гахита̄пи сама̄на̄ йасма̄ а̄джӣват̣т̣хамакасӣлам̣ на̄ма етасмин̃н̃ева два̄радвайе уппаджджати, на а̄ка̄се, тасма̄ а̄джӣват̣т̣хамакасӣладассанаттхам̣ висум̣ вутта̄. таттха насевитаббапарийесана̄ анарийапарийесана̄йа катхетабба̄. севитаббапарийесана̄ арийапарийесана̄йа. вуттан̃хетам̣ –

‘‘двема̄, бхиккхаве, парийесана̄ анарийа̄ ча парийесана̄, арийа̄ ча парийесана̄. катама̄ ча, бхиккхаве, анарийа̄ парийесана̄? идха, бхиккхаве, екаччо аттана̄ джа̄тидхаммо сама̄но джа̄тидхаммам̣йева парийесати, аттана̄ джара̄дхаммо, бйа̄дхидхаммо, маран̣адхаммо, сокадхаммо, сам̣килесадхаммо сама̄но сам̣килесадхаммам̣йева парийесати.

кин̃ча, бхиккхаве, джа̄тидхаммам̣ вадетха? путтабхарийам̣, бхиккхаве, джа̄тидхаммам̣, да̄сида̄сам̣ джа̄тидхаммам̣ аджел̣акам̣ джа̄тидхаммам̣, куккут̣асӯкарам̣ джа̄тидхаммам̣, хаттхигава̄ссавал̣авам̣ джа̄тидхаммам̣, джа̄тарӯпараджатам̣ джа̄тидхаммам̣. джа̄тидхамма̄ хете, бхиккхаве, упадхайо, еттха̄йам̣ гатхито муччхито аджджха̄панно аттана̄ джа̄тидхаммо сама̄но джа̄тидхаммам̣йева парийесати.

кин̃ча, бхиккхаве, джара̄дхаммам̣ вадетха? путтабхарийам̣, бхиккхаве, джара̄дхаммам̣…пе… джара̄дхаммам̣йева парийесати.

кин̃ча, бхиккхаве, бйа̄дхидхаммам̣ вадетха? путтабхарийам̣, бхиккхаве, бйа̄дхидхаммам̣, да̄сида̄сам̣ бйа̄дхидхаммам̣, аджел̣акам̣, куккут̣асӯкарам̣, хаттхигава̄ссавал̣авам̣ бйа̄дхидхаммам̣. бйа̄дхидхамма̄ хете, бхиккхаве, упадхайо, еттха̄йам̣ гатхито муччхито аджджха̄панно аттана̄ бйа̄дхидхаммо сама̄но бйа̄дхидхаммам̣йева парийесати.

кин̃ча, бхиккхаве, маран̣адхаммам̣ вадетха? путтабхарийам̣, бхиккхаве, маран̣адхаммам̣…пе… маран̣адхаммам̣йева парийесати.

кин̃ча, бхиккхаве, сокадхаммам̣ вадетха? путтабхарийам̣…пе… сокадхаммам̣йева парийесати.

кин̃ча, бхиккхаве, сам̣килесадхаммам̣ вадетха…пе… джа̄тарӯпараджатам̣ сам̣килесадхаммам̣. сам̣килесадхамма̄, хете, бхиккхаве, упадхайо, еттха̄йам̣ гатхито муччхито аджджха̄панно аттана̄ сам̣килесадхаммо сама̄но сам̣килесадхаммам̣йева парийесати. айам̣, бхиккхаве, анарийа̄ парийесана̄ти (ма. ни. 1.274).

апича кухана̄дивасена пан̃чавидха̄, агочаравасена чхаббидха̄ веджджакамма̄дивасена екавӣсативидха̄, евам̣ паватта̄ сабба̄пи анесана̄ анарийапарийесана̄йева̄ти ведитабба̄.

‘‘катама̄ ча, бхиккхаве, арийа̄ парийесана̄? идха, бхиккхаве, екаччо аттана̄ джа̄тидхаммо сама̄но джа̄тидхамме а̄дӣнавам̣ видитва̄ аджа̄там̣ ануттарам̣ йогаккхемам̣ нибба̄нам̣ парийесати, аттана̄ джара̄дхаммо, бйа̄дхи, маран̣а, сока, сам̣килесадхаммо сама̄но сам̣килесадхамме а̄дӣнавам̣ видитва̄ асам̣килит̣т̣хам̣ ануттарам̣ йогаккхемам̣ нибба̄нам̣ парийесати. айам̣ арийа̄ парийесана̄ти (ма. ни. 1.275).

апича пан̃ча кухана̄дӣни чха агочаре екавӣсативидхан̃ча анесанам̣ ваджджетва̄ бхиккха̄чарийа̄йа дхаммена самена парийесана̄пи арийапарийесана̄йева̄ти ведитабба̄.

еттха ча йо йо ‘‘на севитаббо’’ти вутто, со со пуббабха̄ге па̄н̣а̄типа̄та̄дӣнам̣ самбха̄рапарийесана̄пайогакаран̣агаманака̄лато пат̣т̣ха̄йа на севитаббова. итаро а̄дито пат̣т̣ха̄йа севитаббо, асакконтена читтампи уппа̄детаббам̣. апича сан̇гхабхеда̄дӣнам̣ аттха̄йа параккаманта̄нам̣ девадатта̄дӣнам̣ вийа ка̄йасама̄ча̄ро на севитаббо, дивасасса дваттиккхаттум̣ тин̣н̣ам̣ ратана̄нам̣ упат̣т̣ха̄нагамана̄дивасена паватто дхаммасена̄патимаха̄моггалла̄наттхера̄дӣнам̣ вийа ка̄йасама̄ча̄ро севитаббо. дхануггахапесана̄дивасена ва̄чам̣ бхинданта̄нам̣ девадатта̄дӣнам̣ вийа вачӣсама̄ча̄ро на севитаббо, тин̣н̣ам̣ ратана̄нам̣ гун̣акиттана̄дивасена паватто дхаммасена̄патимаха̄моггалла̄наттхера̄дӣнам̣ вийа вачӣсама̄ча̄ро севитаббо. анарийапарийесанам̣ парийесанта̄нам̣ девадатта̄дӣнам̣ вийа парийесана̄ на севитабба̄, арийапарийесанамева парийесанта̄нам̣ дхаммасена̄патимаха̄моггалла̄наттхера̄дӣнам̣ вийа парийесана̄ севитабба̄.

евам̣ пат̣ипанно кхоти евам̣ асевитаббам̣ ка̄йавачӣсама̄ча̄рам̣ парийесанан̃ча паха̄йа севитабба̄нам̣ па̄рипӯрийа̄ пат̣ипанно, дева̄наминда, бхиккху па̄тимоккхасам̣вара̄йа уттамаджет̣т̣хакасӣласам̣вараттха̄йа пат̣ипанно на̄ма хотӣти бхагава̄ кхӣн̣а̄савасса а̄гаманӣйапуббабха̄гапат̣ипадам̣ катхеси.