нида̄наван̣н̣ана̄

344. евам̣ ме сутанти саккапан̃хасуттам̣. татра̄йаманутта̄нападаван̣н̣ана̄ – амбасан̣д̣а̄ на̄ма бра̄хман̣ага̄моти со кира га̄мо амбасан̣д̣а̄нам̣ авидӯре нивит̣т̣хо, тасма̄ ‘‘амбасан̣д̣а̄’’ твева вуччати. ведийаке паббатети со кира паббато паббатапа̄де джа̄тена ман̣иведика̄садисена нӣлаванасан̣д̣ена саманта̄ париккхитто, тасма̄ ‘ведийакапаббато’ твева сан̇кхйам̣ гато. индаса̄лагуха̄йанти пуббепи са̄ двиннам̣ паббата̄нам̣ антаре гуха̄, индаса̄ларуккхо часса̄ два̄ре, тасма̄ ‘индаса̄лагуха̄’ти сан̇кхйам̣ гата̄. атха нам̣ кут̣т̣ехи париккхипитва̄ два̄рава̄тапа̄на̄ни йоджетва̄ супаринит̣т̣хитасудха̄каммама̄ла̄каммалата̄каммавичиттам̣ лен̣ам̣ катва̄ бхагавато адам̣су. пуримавоха̄равасена пана ‘‘индаса̄лагуха̄’’ твева нам̣ сан̃джа̄нанти. там̣ сандха̄йа вуттам̣ ‘индаса̄лагуха̄йа’нти.

уссуккам̣ удапа̄дӣти дхаммико усса̄хо уппаджджи. нану ча еса абхин̣хадасса̄вӣ бхагавато, на со девата̄саннипа̄то на̄ма аттхи, йаттха̄йам̣ на а̄гатапуббо, саккена садисо аппама̄давиха̄рӣ девапутто на̄ма наттхи. атха касма̄ буддхадассанам̣ ана̄гатапуббасса вийа асса усса̄хо удапа̄дӣти? маран̣абхайена сантаджджитатта̄. тасмим̣ кирасса самайе а̄йу париккхӣн̣о, со пан̃ча пуббанимитта̄ни дисва̄ ‘‘париккхӣн̣о да̄ни ме а̄йӯ’’ти ан̃н̃а̄си. йесан̃ча девапутта̄нам̣ маран̣анимитта̄ни а̄ви бхаванти, тесу йе париттакена пун̃н̃акаммена девалоке ниббатта̄, те ‘‘кухим̣ ну кхо ида̄ни ниббаттисса̄ма̄’’ти бхайам̣ санта̄сам̣ а̄паджджанти. йе катабхӣрутта̄на̄ бахум̣ пун̃н̃ам̣ катва̄ ниббатта̄, те аттана̄ диннада̄нам̣ раккхитасӣлам̣ бха̄витабха̄ванан̃ча а̄гамма ‘‘упаридевалоке сампаттим̣ анубхависса̄ма̄’’ти на бха̄йанти.

сакко пана девара̄джа̄ пуббанимитта̄ни дисва̄ дасайоджанасахассам̣ деванагарам̣, йоджанасахассуббедхам̣ веджайантам̣, тийоджанасатикам̣ судхаммадевасабхам̣, йоджанасатуббедхам̣ па̄риччхаттакам̣, сат̣т̣хийоджаникам̣ пан̣д̣укамбаласилам̣, ад̣д̣хатийа̄ на̄т̣акакот̣ийо двӣсу девалокесу девапарисам̣, нанданаванам̣, читталата̄ванам̣, миссакаванам̣, пха̄русакавананти етам̣ саббасампаттим̣ олокетва̄ ‘‘нассати вата бхо ме айам̣ сампаттӣ’’ти бхайа̄бхибхӯто ахоси.

тато ‘‘аттхи ну кхо кочи саман̣о ва̄ бра̄хман̣о ва̄ локапита̄махо маха̄брахма̄ ва̄, йо ме хадайанисситам̣ сокасаллам̣ самуддхаритва̄ имам̣ сампаттим̣ тха̄варам̣ кареййа̄’’ти олокенто кан̃чи адисва̄ пуна аддаса ‘‘ма̄диса̄нам̣ сатасахасса̄нампи уппаннам̣ сокасаллам̣ самма̄самбуддхо уддхаритум̣ пат̣ибало’’ти. атхевам̣ паривитаккентасса тена кхо пана самайена саккасса дева̄наминдасса уссуккам̣ удапа̄ди бхагавантам̣ дассана̄йа.

кахам̣ ну кхо бхагава̄ етарахи вихаратӣти катарасмим̣ джанападе катарам̣ нагарам̣ упанисса̄йа касса паччайе парибхун̃джанто касса аматам̣ дхаммам̣ десайама̄но вихаратӣти. аддаса̄ кхоти аддаккхи пат̣ивиджджхи. ма̄риса̄ти пийавачанаметам̣, девата̄нам̣ па̄т̣ийекко воха̄ро. ниддуккха̄типи вуттам̣ хоти. касма̄ панеса деве а̄мантеси? саха̄йаттха̄йа. пуббе киреса бхагавати сал̣алагхаре вихаранте екакова дассана̄йа агама̄си. саттха̄ ‘‘апарипаккам̣ та̄васса н̃а̄н̣ам̣, катипа̄хам̣ пана атиккамитва̄ майи индаса̄лагуха̄йам̣ вихаранте пан̃ча пуббанимитта̄ни дисва̄ маран̣абхайабхӣто двӣсу девалокесу девата̄хи саддхим̣ упасан̇камитва̄ чуддаса пан̃хе пуччхитва̄ упеккха̄пан̃хависсаджджана̄васа̄не асӣтийа̄ девата̄сахассехи саддхим̣ сота̄паттипхале патит̣т̣хахиссатӣ’’ти чинтетва̄ ока̄сам̣ на̄ка̄си. со ‘‘мама пуббепи екакасса гататта̄ саттха̄ра̄ ока̄со на като, аддха̄ ме наттхи маггапхаласса упаниссайо, екасса пана упаниссайе сати чаккава̄л̣апарийанта̄йапи париса̄йа бхагава̄ дхаммам̣ десетийева. авассам̣ кхо пана двӣсу девалокесу кассачи девасса упаниссайо бхависсати, там̣ сандха̄йа саттха̄ дхаммам̣ десессати. там̣ сутва̄ ахампи аттано доманассам̣ вӯпасамесса̄мӣ’’ти чинтетва̄ саха̄йаттха̄йа а̄мантеси.

евам̣ бхаддам̣ тава̄ти кхо дева̄ та̄ватим̣са̄ти евам̣ хоту маха̄ра̄джа, гаччха̄ма бхагавантам̣ дассана̄йа, дуллабхо буддхуппа̄до, бхаддам̣ тава, йо твам̣ ‘‘паббатакӣл̣ам̣ надӣкӣл̣ам̣ гаччха̄ма̄’’ти аватва̄ амхе еварӯпесу т̣ха̄несу нийоджесӣти. паччассосунти тасса вачанам̣ сираса̄ сампат̣иччхим̣су.

345. пан̃часикхам̣ гандхаббадевапуттам̣ а̄мантесӣти деве та̄ва а̄мантету, имам̣ касма̄ висум̣ а̄мантеси? ока̄сакаран̣аттхам̣. евам̣ кирасса ахоси ‘‘двӣсу девалокесу девата̄ гахетва̄ дхурена пахарантасса вийа саттха̄рам̣ упасан̇камитум̣ на йуттам̣, айам̣ пана пан̃часикхо дасабаласса упат̣т̣ха̄ко валлабхо иччхитиччхитаккхан̣е гантва̄ пан̃хам̣ пуччхитва̄ дхаммам̣ сун̣а̄ти, имам̣ пурато песетва̄ ока̄сам̣ ка̄ретва̄ имина̄ катока̄се упасан̇камитва̄ пан̃хам̣ пуччхисса̄мӣ’’ти ока̄сакаран̣аттхам̣ а̄мантеси.

евам̣ бхаддам̣ тава̄ти со ‘‘евам̣ маха̄ра̄джа, хоту, бхаддам̣ тава, йо твам̣ мам̣ ‘ехи, ма̄риса, уййа̄накӣл̣а̄дӣни ва̄ нат̣асамаджджа̄дӣни ва̄ дассана̄йа гаччха̄ма̄’ти аватва̄ ‘буддхам̣ пассисса̄ма, дхаммам̣ сосса̄ма̄’ти вадасӣ’’ти дал̣хатарам̣ упаттхамбхенто дева̄наминдасса вачанам̣ пат̣иссутва̄ анучарийам̣ сахачаран̣ам̣ екато гаманам̣ упа̄гами.

таттха белувапан̣д̣унти белувапаккам̣ вийа пан̣д̣уван̣н̣ам̣. тасса кира сован̣н̣амайам̣ поккхарам̣, инданӣламайо дан̣д̣о, раджатамайа̄ тантийо, пава̄л̣амайа̄ вет̣хака̄, вӣн̣а̄паттакам̣ га̄вутам̣, тантибандханат̣т̣ха̄нам̣ га̄вутам̣, упари дан̣д̣ако га̄вутанти тига̄вутаппама̄н̣а̄ вӣн̣а̄. ити со там̣ вӣн̣ам̣ а̄да̄йа самапан̃н̃а̄самуччхана̄ муччхетва̄ агганакхехи пахаритва̄ мадхурам̣ гӣтассарам̣ ниччха̄ретва̄ сесадеве саккасса гаманака̄лам̣ джа̄на̄пенто екамантам̣ ат̣т̣ха̄си. евам̣ тасса гӣтава̄дитасан̃н̃а̄йа саннипатите деваган̣е атха кхо сакко дева̄наминдо…пе… ведийаке паббате паччут̣т̣ха̄си.

346. атирива обха̄саджа̄тоти ан̃н̃есу дивасесу екассева девасса ва̄ ма̄расса ва̄ брахмуно ва̄ обха̄сена обха̄саджа̄то хоти, там̣дивасам̣ пана двӣсу девалокесу девата̄нам̣ обха̄сена атирива обха̄саджа̄то екападжджото сахассачандасӯрийауггатака̄ласадисо ахоси. парито га̄месу манусса̄ти саманта̄ га̄месу манусса̄. пакатиса̄йама̄сака̄лейева кира га̄мамаджджхе да̄ракесу кӣл̣антесу таттха сакко агама̄си, тасма̄ манусса̄ пасситва̄ евама̄хам̣су. нану ча маджджхимайа̄ме девата̄ бхагавантам̣ упасан̇каманти, айам̣ касма̄ пат̣хамайа̄масса̄пи пуримабха̄гейева а̄гатоти? маран̣абхайенева таджджитатта̄. ким̣су на̄ма̄ти ким̣су на̄ма бхо етам̣, ко ну кхо аджджа махесаккхо дево ва̄ брахма̄ ва̄ бхагавантам̣ пан̃хам̣ пуччхитум̣ дхаммам̣ сотум̣ упасан̇каманто, катхам̣су на̄ма бхо бхагава̄ пан̃хам̣ виссаджджессати дхаммам̣ десессати, ла̄бха̄ амха̄кам̣, йесам̣ но евам̣ девата̄нам̣ кан̇кха̄винодако саттха̄ авидӯре виха̄ре васати, йе лабха̄ма тха̄лакабхиккхампи кат̣аччхубхиккхампи да̄тунти сам̣вигга̄ ломахат̣т̣хаджа̄та̄ уддхаггалома̄ хутва̄ дасанакхасамодха̄насамуджджалам̣ ан̃джалим̣ сирасмим̣ патит̣т̣хапетва̄ намассама̄на̄ ат̣т̣хам̣су.

347. дурупасан̇кама̄ти дупайирупа̄сийа̄. ахам̣ сара̄го садосо самохо, саттха̄ вӣтара̄го вӣтадосо вӣтамохо, тасма̄ дупайирупа̄сийа̄ татха̄гата̄ ма̄дисена. джха̄йӣти лаккхан̣ӯпаниджджха̄нена ча а̄рамман̣ӯпаниджджха̄нена ча джха̄йӣ. тасмин̃н̃ева джха̄не рата̄ти джха̄нарата̄. тадантарам̣ пат̣исаллӣна̄ти тадантарам̣ пат̣исаллӣна̄ сампати пат̣исаллӣна̄ ва̄. тасма̄ на кевалам̣ джха̄йӣ джха̄нарата̄ти дурупасан̇кама̄, ида̄нимева пат̣исаллӣна̄типи дурупасан̇кама̄. паса̄деййа̄сӣти а̄ра̄дхеййа̄си, ока̄сам̣ ме ка̄ретва̄ дадеййа̄сӣти вадати. белувапан̣д̣увӣн̣ам̣ а̄да̄йа̄ти нану пуббева а̄динна̄ти? а̄ма, а̄динна̄. маггагаманавасена пана ам̣сакӯт̣е лаггита̄, ида̄ни нам̣ ва̄махаттхе т̣хапетва̄ ва̄данасаджджам̣ катва̄ а̄дийи. тена вуттам̣ ‘‘а̄да̄йа̄’’ти.