3. пан̃ха̄пуччхакаван̣н̣ана̄

386. пан̃ха̄пуччхаке па̄л̣иануса̄ренева сатипат̣т̣ха̄на̄нам̣ кусала̄дибха̄во ведитаббо. а̄рамман̣аттикесу пана сабба̄нипи ета̄ни аппама̄н̣ам̣ нибба̄нам̣ а̄раббха паваттанато аппама̄н̣а̄рамман̣а̄нева, на магга̄рамман̣а̄ни; сахаджа̄тахетувасена пана маггахетука̄ни; вӣрийам̣ ва̄ вӣмам̣сам̣ ва̄ джет̣т̣хакам̣ катва̄ маггабха̄вана̄ка̄ле магга̄дхипатӣни; чхандачиттаджет̣т̣хака̄йа маггабха̄вана̄йа наваттабба̄ни магга̄дхипатӣнӣти пхалака̄лепи наваттабба̄нева; атӣта̄дӣсу ека̄рамман̣абха̄венапи наваттабба̄ни; нибба̄насса пана бахиддха̄дхамматта̄ бахиддха̄рамман̣а̄ни на̄ма хонтӣти. еваметасмим̣ пан̃ха̄пуччхаке ниббаттиталокуттара̄нева сатипат̣т̣ха̄на̄ни катхита̄ни. самма̄самбуддхена хи суттантабха̄джанӣйасмим̣йева локийалокуттарамиссака̄ сатипат̣т̣ха̄на̄ катхита̄; абхидхаммабха̄джанӣйапан̃ха̄пуччхакесу пана локуттара̄йева̄ти. евамайам̣ сатипат̣т̣ха̄навибхан̇гопи тепариват̣т̣ам̣ нӣхаритва̄ бха̄джетва̄ дасситоти.

саммохавиноданийа̄ вибхан̇гат̣т̣хакатха̄йа

сатипат̣т̣ха̄навибхан̇гаван̣н̣ана̄ нит̣т̣хита̄.