2. пан̃ха̄пуччхакаван̣н̣ана̄

221. пан̃ха̄пуччхаке саббесампи индрийа̄нам̣ кусала̄дивибха̄го па̄л̣инайа̄нуса̄ренева ведитаббо.

223. а̄рамман̣аттикесу пана саттиндрийа̄ ана̄рамман̣а̄ти чаккхусотагха̄надживха̄ка̄йаиттхипурисиндрийа̄ни сандха̄йа вуттам̣. джӣвитиндрийам̣ пана арӯпамиссакатта̄ идха ана̄бхат̣т̣хам̣. двиндрийа̄ти две индрийа̄; сукхадуккхадвайам̣ сандха̄йетам̣ вуттам̣. тан̃хи екантапаритта̄рамман̣ам̣. доманассиндрийам̣ сийа̄ паритта̄рамман̣ам̣, сийа̄ махаггата̄рамман̣анти ка̄ма̄вачарадхамме а̄раббха паваттика̄ле паритта̄рамман̣ам̣ хоти, рӯпа̄вачара̄рӯпа̄вачаре пана а̄раббха паваттика̄ле махаггата̄рамман̣ам̣, пан̣н̣аттим̣ а̄раббха паваттика̄ле наваттабба̄рамман̣ам̣. навиндрийа̄ сийа̄ паритта̄рамман̣а̄ти маниндрийаджӣвитиндрийасоманассиндрийаупеккхиндрийа̄ни чева саддха̄дипан̃чакан̃ча сандха̄йа идам̣ вуттам̣. джӣвитиндрийан̃хи рӯпамиссакатта̄ ана̄рамман̣есу рӯпадхаммесу сан̇гахитампи арӯпакот̣т̣ха̄сена сийа̄паккхе сан̇гахитам̣.

чатта̄ри индрийа̄нӣти сукхадуккхадоманассаан̃н̃а̄та̄виндрийа̄ни. та̄ни хи магга̄рамман̣аттике на бхаджанти. маггахетуканти сахаджа̄тахетум̣ сандха̄йа вуттам̣. вӣрийавӣмам̣са̄джет̣т̣хакака̄ле сийа̄ магга̄дхипати, чхандачиттаджет̣т̣хакака̄ле сийа̄ наваттабба̄.

дасиндрийа̄ сийа̄ уппанна̄, сийа̄ уппа̄диноти сатта рӯпиндрийа̄ни тӣн̣и ча випа̄киндрийа̄ни сандха̄йетам̣ вуттам̣. дасиндрийа̄ни доманассена саддхим̣ хет̣т̣ха̄ вутта̄нева. таттха доманассиндрийам̣ пан̣н̣аттим̣ а̄раббха паваттика̄ле наваттабба̄рамман̣ам̣, сеса̄ни нибба̄напаччавеккхан̣ака̄лепи. тӣн̣индрийа̄ни бахиддха̄рамман̣а̄нӣти тӣн̣и локуттариндрийа̄ни. чатта̄рӣти сукхадуккхасоманассадоманасса̄ни. та̄ни хи аджджхаттадхаммепи бахиддха̄дхаммепи а̄раббха паваттанти. ат̣т̣хиндрийа̄ти маниндрийаджӣвитиндрийаупеккхиндрийа̄ни чева саддха̄дипан̃чакан̃ча. таттха а̄кин̃чан̃н̃а̄йатанака̄ле наваттабба̄рамман̣ата̄ ведитабба̄.

ити имасмимпи пан̃ха̄пуччхаке дасиндрийа̄ни ка̄ма̄вачара̄ни, тӣн̣и локуттара̄ни, нава локийалокуттарамиссака̄нева катхита̄нӣти. айампи абхидхаммабха̄джанӣйена саддхим̣ екапариччхедова хоти. айам̣ пана индрийавибхан̇го двепариват̣т̣ам̣ нӣхаритва̄ бха̄джетва̄ дасситоти.

саммохавиноданийа̄ вибхан̇гат̣т̣хакатха̄йа

индрийавибхан̇гаван̣н̣ана̄ нит̣т̣хита̄.