7. абхин̃н̃еййа̄дива̄раван̣н̣ана̄

1030. саттамава̄ре салаккхан̣апаригга̄хика̄йа абхин̃н̃а̄йа васена абхин̃н̃еййата̄ ведитабба̄. н̃а̄татӣран̣апаха̄напарин̃н̃а̄нам̣ васена парин̃н̃еййата̄. са̄ ча рӯпаккхандхо абхин̃н̃еййо парин̃н̃еййо на паха̄табботиа̄дӣсу н̃а̄татӣран̣апарин̃н̃а̄васенева ведитабба̄. самудайасаччам̣ абхин̃н̃еййам̣ парин̃н̃еййам̣ паха̄таббантиа̄дӣсу паха̄напарин̃н̃а̄васена.

ат̣т̣хамава̄ре рӯпа̄диа̄рамман̣а̄нам̣ чаккхувин̃н̃а̄н̣а̄дӣнам̣ васена са̄рамман̣а̄на̄рамман̣ата̄ ведитабба̄. навамава̄ро утта̄наттхойева. дасамава̄репи йам̣ ваттаббам̣ сийа̄ там̣ саббам̣ таттха таттха пан̃ха̄пуччхакава̄ре вуттамева̄ти.

саммохавиноданийа̄ вибхан̇гат̣т̣хакатха̄йа

дхаммахадайавибхан̇гаван̣н̣ана̄ нит̣т̣хита̄.

нигаманакатха̄

етта̄вата̄ ча –

абхидхаммам̣ десенто, дхаммагару дхаммага̄равайутта̄нам̣;

дева̄нам̣ девапуре, деваган̣асахассапарива̄ро.

дутийам̣ адутийапурисо, йам̣ а̄ха вибхан̇гапакаран̣ам̣ на̄тхо;

ат̣т̣ха̄расахи вибхан̇гехи, ман̣д̣итаман̣д̣апеййагун̣о.

аттхаппака̄санаттхам̣, тасса̄хам̣ йа̄чито т̣хитагун̣ена;

йатина̄ адандхагатина̄, субуддхина̄ буддхагхосена.

йам̣ а̄рабхим̣ рачайитум̣, ат̣т̣хакатхам̣ сунипун̣есу аттхесу;

саммохавиноданато, саммохавиноданим̣ на̄ма.

пора̄н̣ат̣т̣хакатха̄нам̣, са̄рам̣ а̄да̄йа са̄ айам̣ нит̣т̣хам̣;

патта̄ анантара̄йена, па̄л̣ийа̄ бха̄н̣ава̄рехи.

чатта̄лӣса̄йа йатха̄, екена ча евамева саббепи;

нит̣т̣хам̣ ваджанту вимала̄, маноратха̄ саббасатта̄нам̣.

саддхаммасса т̣хитаттхам̣, йан̃ча имам̣ рачайата̄ майа̄ пун̃н̃ам̣;

паттам̣ тена саматтам̣, па̄пун̣ату садевако локо.

сучирам̣ тит̣т̣хату дхаммо, дхамма̄бхирато сада̄ бхавату локо;

ниччам̣ кхемасубхиккха̄ди-сампада̄ джанапада̄ хонтӯти.

парамависуддхасаддха̄буддхивӣрийапат̣иман̣д̣итена сӣла̄ча̄раджджавамаддава̄дигун̣асамудайасамудитена сакасамайасамайантарагаханаджджхога̄хан̣асаматтхена пан̃н̃а̄веййаттийасаманна̄гатена типит̣акапарийаттиппабхеде са̄т̣т̣хакатхе саттхуса̄сане аппат̣ихатан̃а̄н̣аппабха̄вена маха̄веййа̄каран̣ена каран̣асампаттиджанитасукхавиниггатамадхурода̄равачанала̄ван̣н̣айуттена йуттамуттава̄дина̄ ва̄дӣварена маха̄кавина̄ пабхиннапат̣исамбхида̄парива̄ре чхал̣абхин̃н̃а̄пат̣исамбхида̄диппабхедагун̣апат̣иман̣д̣ите уттаримануссадхамме суппатит̣т̣хитабуддхӣнам̣ тхеравам̣саппадӣпа̄нам̣ тхера̄нам̣ маха̄виха̄рава̄сӣнам̣ вам̣са̄лан̇ка̄рабхӯтена випулависуддхабуддхина̄ буддхагхосоти гарӯхи гахитана̄мадхеййена тхерена ката̄ айам̣ саммохавиноданӣ на̄ма вибхан̇гат̣т̣хакатха̄.

та̄ва тит̣т̣хату локасмим̣, локаниттхаран̣есинам̣;

дассентӣ кулапутта̄нам̣, найам̣ пан̃н̃а̄висуддхийа̄.

йа̄ва буддхоти на̄мампи, суддхачиттасса та̄дино;

локамхи локаджет̣т̣хасса, паваттати махесиноти.

саммохавиноданӣ на̄ма вибхан̇га-ат̣т̣хакатха̄ нит̣т̣хита̄.