3. пан̃ха̄пуччхакаван̣н̣ана̄

504. пан̃ха̄пуччхаке па̄л̣иануса̄ренева магган̇га̄нам̣ кусала̄дибха̄во ведитаббо. а̄рамман̣аттикесу пана сабба̄нипета̄ни аппама̄н̣ам̣ нибба̄нам̣ а̄раббха паваттито аппама̄н̣а̄рамман̣а̄нева, на магга̄рамман̣а̄ни. нева хи магго на пхалам̣ маггам̣ а̄рамман̣ам̣ кароти. сахаджа̄тахетувасена панеттха кусала̄ни маггахетука̄ни; вӣрийам̣ ва̄ вӣмам̣сам̣ ва̄ джет̣т̣хакам̣ катва̄ маггабха̄вана̄ка̄ле магга̄дхипатӣни; чхандачиттаджет̣т̣хика̄йа маггабха̄вана̄йа на ваттабба̄ни магга̄дхипатӣнӣти; пхалака̄лепи на ваттабба̄нева.

атӣта̄дӣсу ека̄рамман̣абха̄венапи на ваттабба̄ни; нибба̄насса пана бахиддха̄дхамматта̄ бахиддха̄рамман̣а̄ни на̄ма хонтӣти еваметасмим̣ пан̃ха̄пуччхакепи ниббаттиталокуттара̄нева магган̇га̄ни катхита̄ни. самма̄самбуддхена хи суттантабха̄джанӣйасмим̣йева локийалокуттара̄ни магган̇га̄ни катхита̄ни; абхидхаммабха̄джанӣйе пана пан̃ха̄пуччхаке ча локуттара̄нева̄ти евамайам̣ маггавибхан̇гопи тепариват̣т̣ам̣ нӣхаритва̄ва бха̄джетва̄ дасситоти.

саммохавиноданийа̄ вибхан̇гат̣т̣хакатха̄йа

магган̇гавибхан̇гаван̣н̣ана̄ нит̣т̣хита̄.