13-18. ануломапаччанӣйапат̣т̣ха̄наван̣н̣ана̄

1. ида̄ни кусала̄дӣсу дхаммесу паччайадхаммам̣ аппат̣иккхипитва̄ паччайуппаннасса кусала̄дибха̄вапат̣иккхепавасена дхамма̄нам̣ ануломапаччанӣйата̄йа ладдхана̄мам̣ ануломапаччанӣйапат̣т̣ха̄нам̣ дассетум̣ кусалам̣ дхаммам̣ пат̣ичча на кусало дхаммо уппаджджати хетупаччайа̄тиа̄ди а̄раддхам̣. таттха кусалам̣ дхаммам̣ пат̣ичча̄ти кусаласса паччайабха̄вам̣ ануджа̄на̄ти. на кусало дхаммо уппаджджатӣти кусалассева уппаттим̣ ва̄рети. тасма̄ ‘‘кусале кхандхе пат̣ичча читтасамут̣т̣ха̄нам̣ рӯпа’’нтиа̄дина̄ найена виссаджджанам̣ дасситам̣, там̣ саббам̣ па̄л̣им̣ олокетва̄ са̄дхукам̣ саллаккхетаббам̣. йампи йена садисам̣, йан̃ча йаттха лаббхати, йо ча йесам̣ виссаджджана̄нам̣ йесу паччайесу ган̣анапариччхедо, со саббо па̄л̣ийам̣ дассито, тасма̄ па̄л̣ийева еттха аттхо. йатха̄ четтха, евам̣ дукапат̣т̣ха̄на̄дӣсупӣти.

етта̄вата̄ –

тикан̃ча пат̣т̣ха̄наварам̣ дукуттамам̣,

дукам̣ тикан̃чева тикам̣ дукан̃ча;

тикам̣ тикан̃чева дукам̣ дукан̃ча,

чха ануломапаччанӣйамхи найа̄ сугамбхӣра̄ти. –

ат̣т̣хакатха̄йам̣ вуттага̄тха̄йа дӣпита̄ дхамма̄нуломапаччанӣйапат̣т̣ха̄не чха найа̄ ниддит̣т̣ха̄ хонти. паччайавасена панеттха екекасмим̣ пат̣т̣ха̄не анулома̄дайо чатта̄ро чатта̄ро найа̄ти екена парийа̄йена чатувӣсатинайапат̣иман̣д̣итам̣ ануломапаччанӣйапат̣т̣ха̄нан̃н̃ева ведитаббам̣.

ануломапаччанӣйапат̣т̣ха̄наван̣н̣ана̄.