2. паваттива̄раван̣н̣ана̄

27-164. паваттива̄ре панеттха паччуппаннака̄ле пуггалава̄расса ануломанайе ‘‘йасса дуккхасаччам̣ уппаджджати, тасса самудайасаччам̣ уппаджджати; йасса ва̄ пана самудайасаччам̣ уппаджджати, тасса дуккхасаччам̣ уппаджджатӣ’’ти дуккхасаччамӯлакехи тӣхи, самудайасаччамӯлакехи двӣхи, ниродхасаччамӯлакена екена̄ти лаббхама̄нан̃ча алаббхама̄нан̃ча гахетва̄ па̄л̣ивасена чхахи йамакехи бхавитаббам̣. тесу йасма̄ ниродхасса нева уппа̄до, на ниродхо йуджджати, тасма̄ дуккхасаччамӯлака̄ни самудайасаччамаггасаччехи саддхим̣ две, самудайасаччамӯлакам̣ маггасаччена саддхим̣ еканти тӣн̣и йамака̄ни а̄гата̄ни. тасса пат̣иломанайепи ока̄сава̄ра̄дӣсупи есева найо. еваметтха саббава̄ресу тин̣н̣ам̣ тин̣н̣ам̣ йамака̄нам̣ васена йамакаган̣ана̄ ведитабба̄. аттхавиниччхайе панеттха идам̣ лаккхан̣ам̣ – имасса хи саччайамакасса паваттива̄ре ниродхасаччам̣ та̄ва на лаббхатева. сесесу пана тӣсу самудайасаччамаггасачча̄ни екантена паваттийам̣йева лаббханти. дуккхасаччам̣ чутипат̣исандхӣсупи паваттепи лаббхати. паччуппанна̄дайо пана тайо ка̄ла̄ чутипат̣исандхӣнампи паваттийа̄пи васена лаббханти. еваметтха йам̣ йам̣ лаббхати, тасса тасса васена аттхавиниччхайо ведитаббо.

татридам̣ найамукхам̣ – саббесам̣ упападжджанта̄нанти антамасо суддха̄ва̄са̄нампи. тепи хи дуккхасачченева упападжджанти. тан̣ха̄виппайуттачиттасса̄ти идам̣ дуккхасаччасамудайасаччесу екакот̣т̣ха̄сасса уппаттидассанаттхам̣ вуттам̣. тасма̄ пан̃чавока̄равасенева гахетаббам̣. чатувока̄ре пана тан̣ха̄виппайуттасса пхаласама̄паттичиттасса уппа̄даккхан̣е екампи саччам̣ нуппаджджати. идам̣ идха на гахетаббам̣. тесам̣ дуккхасаччан̃ча̄ти тасмин̃хи кхан̣е тан̣хам̣ т̣хапетва̄ сесам̣ дуккхасаччам̣ на̄ма хотӣти сандха̄йетам̣ вуттам̣. маггасса уппа̄даккхан̣епи есева найо. таттха пана рӯпамева дуккхасаччам̣ на̄ма. сеса̄ маггасампайуттака̄ дхамма̄ саччавинимутта̄. тенева ка̄ран̣ена ‘‘арӯпе маггасса уппа̄даккхан̣е тесам̣ маггасаччам̣ уппаджджати, но ча тесам̣ дуккхасаччам̣ уппаджджатӣ’’ти вуттам̣. саббесам̣ упападжджанта̄нам̣ паватте тан̣ха̄виппайуттачиттасса уппа̄даккхан̣е тесам̣ таттха̄ти тесам̣ тасмим̣ упапаттиккхан̣е тан̣ха̄виппайуттачиттуппаттиккхан̣е ча̄ти еваметтха кхан̣авасена ока̄со ведитаббо. ан̃н̃есупи еварӯпесу есева найо. анабхисамета̄вӣнанти чатусаччапат̣иведхасан̇кха̄там̣ абхисамайам̣ аппаттасатта̄нам̣. абхисамета̄вӣнанти абхисамитасачча̄нанти. имина̄ найамукхена саббаттха аттхавиниччхайо ведитаббо.

паваттива̄раван̣н̣ана̄.