9. наваманайо сампайуттенасампайуттападаван̣н̣ана̄

319. ида̄ни сампайуттенасампайуттападам̣ бха̄джетум̣ ведана̄ккхандхена̄тиа̄ди а̄раддхам̣. таттха йам̣ кхандха̄дивасена сампайуттам̣, пуна тассева кхандха̄дӣхи сампайогам̣ пуччхитва̄ виссаджджанам̣ катам̣. там̣ рӯпена ва̄ рӯпамиссакехи ва̄ саббарӯпаккхандхасан̇га̄хакехи ва̄ падехи саддхим̣ на йуджджати. рӯпена хи рӯпамиссакена ва̄ ан̃н̃есам̣ сампайого наттхи. саббарӯпаккхандхасан̇га̄хакехи саббесам̣ сампайога̄раха̄нам̣ кхандха̄дӣнам̣ гахитатта̄ ан̃н̃ам̣йева наттхи, йам̣ тена саха сампайогам̣ гаччхеййа. тасма̄ татха̄рӯпа̄ни пада̄ни идха на гахита̄ни. йа̄ни пана пада̄ни рӯпена асаммиссам̣ арӯпекадесам̣ дӣпенти, та̄ни идха гахита̄ни. тесам̣ идамудда̄нам̣ –

‘‘арӯпаккхандха̄ чатта̄ро, мана̄йатанамева ча;

вин̃н̃а̄н̣адха̄туйо сатта, две сачча̄ чуддасиндрийа̄.

‘‘паччайе два̄даса пада̄, тато упари сол̣аса;

тикесу ат̣т̣ха гоччхаке, течатта̄лӣсамева ча.

‘‘махантарадуке сатта, пада̄ пит̣т̣хидукесу чха;

навамасса падассете, ниддесе сан̇гахам̣ гата̄’’ти.

саббапан̃хесу пана йе дхамма̄ пуччха̄йа уддхат̣а̄, те йехи сампайутта̄ хонти, тесам̣ васена кхандха̄дибхедо ведитаббо. ведана̄ккхандхена хи итаре тайо кхандха̄ сампайутта̄, пуна техи ведана̄ккхандхо сампайутто. со техи сан̃н̃а̄дӣхи тӣхи кхандхехи, екена мана̄йатанена, саттахи вин̃н̃а̄н̣адха̄тӯхи, екасмим̣ дхамма̄йатане, дхаммадха̄туйа̄ ча, кехичи сан̃н̃а̄сан̇кха̄рехева сампайутто. есева найо саббаттха̄ти.

сампайуттенасампайуттападаван̣н̣ана̄.