5. пан̃чаманайо асан̇гахитенаасан̇гахитападаван̣н̣ана̄

193. ида̄ни асан̇гахитена асан̇гахитападам̣ бха̄джетум̣ рӯпаккхандхена̄тиа̄ди а̄раддхам̣. таттха йам̣ кхандха̄дӣхи асан̇гахитена кхандха̄дивасена асан̇гахитам̣, пуна тассева кхандха̄дӣхи асан̇гахам̣ пуччхитва̄ виссаджджанам̣ катам̣. там̣ пан̃чаккхандхагга̄хакесу дуккхасачча̄дӣсу вин̃н̃а̄н̣ена саддхим̣ сукхумарӯпагга̄хакесу анидассанааппат̣игха̄дӣсу ча падесу на йуджджати. та̄дисена хи падена нибба̄нам̣ кхандхасан̇гахаматтам̣ на гаччхеййа. сеса̄ кхандха̄дӣхи асан̇гахитадхамма̄ на̄ма наттхи. тасма̄ татха̄рӯпа̄ни пада̄ни имасмим̣ ва̄ре на гахита̄ни. йа̄ни пана пан̃чаккхандхе вин̃н̃а̄н̣ан̃ча сукхумарӯпена саддхим̣ екато на дӣпенти, та̄ни идха гахита̄ни. тесам̣ идамудда̄нам̣ –

‘‘саббе кхандха̄ татха̄йатанадха̄туйо саччато тайо;

индрийа̄нипи сабба̄ни, тевӣсати пат̣иччато.

‘‘парато сол̣аса пада̄, течатта̄лӣсакам̣ тике;

гоччхаке саттати две ча, сатта чӯл̣антаре пада̄.

‘‘махантаре пада̄ вутта̄, ат̣т̣ха̄раса тато парам̣;

ат̣т̣ха̄расева н̃а̄табба̄, сеса̄ идха на бха̄сита̄’’ти.

пан̃ха̄ панеттха садисависсаджджана̄нам̣ васена самодха̄нетва̄ катихи саддхим̣ саббепи чатуттим̣са хонти. таттха йам̣ пуччха̄йа уддхат̣ам̣ падам̣, тадева йехи кхандха̄дӣхи асан̇гахитам̣, те дхамме сандха̄йа екена кхандхена̄тиа̄ди вуттам̣.

татра̄йам̣ найо – рӯпаккхандхена хи чатта̄ро кхандха̄ нибба̄нан̃ча кхандхасан̇гахена асан̇гахита̄. а̄йатанадха̄тусан̇гахена пана т̣хапетва̄ вин̃н̃а̄н̣ам̣ авасеса̄ сан̇гахита̄ти вин̃н̃а̄н̣амева тӣхипи кхандхасан̇гаха̄дӣхи асан̇гахитам̣ на̄ма. пуна тена вин̃н̃а̄н̣ена саддхим̣ нибба̄нена чатта̄ро кхандха̄ кхандха̄дисан̇гахена асан̇гахита̄. те саббепи пуна вин̃н̃а̄н̣енева кхандха̄дисан̇гахена асан̇гахита̄ти екена кхандхена, екена̄йатанена, саттахи дха̄тӯхи асан̇гахита̄ на̄ма хонти. атха ва̄ – йадетам̣ рӯпаккхандхена вин̃н̃а̄н̣амева тӣхи кхандха̄дисан̇гахехи асан̇гахитам̣, техипи вин̃н̃а̄н̣адхаммехи те рӯпадхамма̄ва тӣхи сан̇гахехи асан̇гахита̄. пуна те рӯпадхамма̄ вин̃н̃а̄н̣енева тӣхи сан̇гахехи асан̇гахита̄. вин̃н̃а̄н̣ан̃ча кхандхато еко вин̃н̃а̄н̣аккхандхо хоти, а̄йатанато екам̣ мана̄йатанам̣, дха̄туто сатта вин̃н̃а̄н̣адха̄туйо. тасма̄ ‘‘екена кхандхена̄’’тиа̄ди вуттам̣. имина̄ упа̄йена саббаттха йам̣ пуччха̄йа уддхат̣ам̣ падам̣, тадева йехи дхаммехи кхандха̄дивасена асан̇гахитам̣, тесам̣ дхамма̄нам̣ васена кхандха̄дайо ведитабба̄. таттха дутийапан̃хе та̄ва – рӯпавин̃н̃а̄н̣а̄нам̣ васена ведитабба̄. ведана̄дайо хи рӯпавин̃н̃а̄н̣ехева кхандха̄дисан̇гахена асан̇гахита̄. те ча две кхандха̄ ека̄даса̄йатана̄ни саттараса дха̄туйо хонти.

195. татийапан̃хе – вин̃н̃а̄н̣ам̣ рӯпа̄дӣхи чатӯхи асан̇гахитанти тесам̣ васена кхандха̄дайо ведитабба̄.

196. чатуттхапан̃хе – чаккха̄йатанам̣ ведана̄дӣхи чатӯхӣти имина̄ найена саббаттха кхандха̄дайо ведитабба̄. парийоса̄не – рӯпан̃ча дхамма̄йатананти удда̄нага̄тха̄йа дасситадхамма̄йева ан̃н̃ена̄ка̄рена сан̇кхипитва̄ дассита̄ти.

асан̇гахитенаасан̇гахитападаван̣н̣ана̄.