10. тапуссасуттаван̣н̣ана̄
41. дасаме маллесӯти малларат̣т̣хе. идхева та̄ва твам̣, а̄нанда, хотӣти идха бхагава̄ ‘‘тапуссагахапатино идха т̣хитена а̄нандена саддхим̣ катха̄салла̄по бхависсати, татонида̄нам̣ ахам̣ махантам̣ дхаммапарийа̄йам̣ десесса̄мӣ’’ти н̃атва̄ а̄ха. упасан̇камӣти со кира бхуттапа̄тара̄со ‘‘дасабаласса упат̣т̣ха̄нам̣ гамисса̄мӣ’’ти никкхаманто дӯратова тхерам̣ дисва̄ йена̄йасма̄ а̄нандо тенупасан̇ками. папа̄то вийа кха̄йати, йадидам̣ неккхамманти йамидам̣ паббаджджа̄сан̇кха̄там̣ неккхаммам̣, там̣ амха̄кам̣ маха̄папа̄то вийа ога̄хитва̄ упат̣т̣ха̄ти. неккхамме читтам̣ паккхандатӣти паббаджджа̄йа читтам̣ а̄рамман̣авасена паккхандати, тадева а̄рамман̣ам̣ катва̄ пасӣдати, тадева патит̣т̣ха̄ти, паччанӣкадхаммехи ча вимуччати. ‘етам̣ санта’нти пассатоти етам̣ неккхаммам̣ сантам̣ вигатадаратхапарил̣а̄ханти евам̣ пассанта̄нам̣ бхиккхӯнам̣. бахуна̄ джанена висабха̄готи тайидам̣ бахуна̄ маха̄джанена саддхим̣ бхиккхӯнам̣ висабха̄гам̣, асадисанти аттхо.
катха̄па̄бхатанти катха̄мӯлам̣. тасса майхам̣, а̄нанда, неккхамме читтам̣ на паккхандатӣти тасса евам̣ витаккентасса̄пи майхам̣ паббаджджа̄йа читтам̣ на отарати. ‘‘етам̣ санта’’нти пассатоти ‘‘са̄дху неккхамма’’нти паривитакканавасена ‘‘етам̣ неккхаммам̣ санта’’нти пассантассапи. ана̄севитоти на а̄севито на пхассито на саччхикато. адхигамма̄ти адхигантва̄ патва̄ саччхикатва̄. тама̄севеййанти там̣ а̄нисам̣сам̣ севеййам̣ бхаджеййам̣. йам̣ мети йена ка̄ран̣ена майхам̣. адхигамма̄ти адхигантва̄. сва̄сса ме хоти а̄ба̄дхоти со майхам̣ а̄ба̄дханат̣т̣хена а̄ба̄дхо хоти. авитакке читтам̣ на паккхандатӣти авитаккавича̄ре дутийаджджха̄не а̄рамман̣авасена читтам̣ на паккхандати. витаккесӯти витаккавича̄ресу. сесам̣ саббаттха утта̄наттхамева̄ти.
маха̄вагго чатуттхо.