1. самба̄дхасуттаван̣н̣ана̄

42. пан̃чамасса пат̣хаме уда̄йӣти ка̄л̣уда̄йиттхеро. авидва̄ти ан̃н̃а̄си. бхӯримедхасоти маха̄пан̃н̃о. йо джха̄намабуджджхӣти йо джха̄нам̣ абуджджхи. пат̣илӣнанисабхоти екӣбха̄вавасена пат̣илӣно чева уттамат̣т̣хена ча нисабхо. мунӣти буддхамуни. парийа̄йена̄ти екена ка̄ран̣ена. ка̄масамба̄дхасса хи абха̄ваматтенева пат̣хамаджджха̄нам̣ ока̄са̄дхигамо на̄ма, на саббатха̄ саббам̣. татра̄паттхи самба̄дхоти тасмимпи пат̣хамаджджха̄не самба̄дхо пат̣ипӣл̣анам̣ аттхийева. татра̄питтхӣтипи па̄т̣хо. кин̃ча таттха самба̄дхоти тасмим̣ пана джха̄не ким̣ самба̄дхо на̄ма. айаметтха самба̄дхоти айам̣ витаккавича̄ра̄нам̣ анируддхабха̄во самба̄дхо сам̣пӣл̣а̄ на̄ма. имина̄ упа̄йена саббава̄ресу аттхо ведитаббо. ниппарийа̄йена̄ти на екена ка̄ран̣ена, атха кхо а̄саваккхайо на̄ма саббасамба̄дха̄нам̣ пахӣнатта̄ саббена саббам̣ ока̄са̄дхигамо на̄ма̄ти.