2. саупа̄дисесасуттаван̣н̣ана̄

12. дутийе саупа̄дисесанти саупа̄да̄насесам̣. анупа̄дисесанти упа̄да̄насесарахитам̣ ниггахан̣ам̣. маттасо ка̄рӣти пама̄н̣ака̄рӣ на парипӯрака̄рӣ. на та̄ва̄йам̣, са̄рипутта, дхаммапарийа̄йо пат̣ибха̄сӣти аппат̣ибха̄нам̣ на̄ма бхагавато наттхи, на та̄ва̄хам̣ имам̣ дхаммапарийа̄йам̣ катхесинти айам̣ панеттха аттхо. ма̄йимам̣ дхаммапарийа̄йам̣ сутва̄ пама̄дам̣ а̄харим̣сӯти ‘‘майам̣ кира чатӯхи апа̄йехи мутта̄’’ти упари арахаттаттха̄йа вӣрийам̣ акаронта̄ ма̄ пама̄дам̣ а̄паджджим̣су. пан̃ха̄дхиппа̄йена бха̄ситоти тайа̄ пуччхитапан̃хасса сабха̄вена катхитоти дассети. имесам̣ пана наваннам̣ пуггала̄нам̣ бхавесу чхандара̄гавиноданаттхам̣ етамева аттхуппаттим̣ катва̄ – ‘‘сеййатха̄пи, бхиккхаве, аппаматтакопи гӯтхо дуггандхо хоти, евамева кхо кхва̄хам̣, бхиккхаве, аппаматтакампи бхавам̣ на ван̣н̣еми антамасо аччхара̄сан̇гха̄таматтампӣ’’ти имам̣ суттам̣ (а. ни. 1.321) абха̄си. на кевалан̃ча етесам̣йева наваннам̣ пуггала̄нам̣ гати нибаддха̄, йесам̣ пана кула̄нам̣ тӣн̣и саран̣а̄ни пан̃ча сӣла̄ни екам̣ сала̄кабхаттам̣ екам̣ паккхийабхаттам̣ екам̣ васса̄ва̄сикам̣ ека̄ поккхаран̣ӣ еко а̄ва̄со, еварӯпа̄ни нибаддхапун̃н̃а̄ни аттхи. тесампи гати нибаддха̄, сота̄паннасадиса̄нева та̄ни кула̄ни.