9. париса̄суттаван̣н̣ана̄

69. наваме кхаттийапариса̄ти кхаттийа̄нам̣ париса̄нам̣ саннипа̄то сама̄гамо. еса найо саббаттха. анекасатам̣ кхаттийапарисанти бимбиса̄расама̄гама-н̃а̄тисама̄гама-личчхависама̄гама̄дисадисам̣, ан̃н̃есу чаккава̄л̣есупи лаббхатева. саллапитапуббанти а̄ла̄пасалла̄по катапуббо. са̄каччха̄ти дхаммаса̄каччха̄пи сама̄паджджитапубба̄. йа̄дисако тесам̣ ван̣н̣оти те ода̄та̄пи хонти ка̄л̣а̄пи ман̇гураччхавӣпи, саттха̄ суван̣н̣аван̣н̣о. идам̣ пана сан̣т̣ха̄нам̣ пат̣ичча катхитам̣. сан̣т̣ха̄нампи ча кевалам̣ тесам̣ пан̃н̃а̄йатийева. на пана бхагава̄ милаккхасадисо хоти, на̄пи а̄муттаман̣икун̣д̣ало, буддхавесенева нисӣдати. тепи аттано сама̄насан̣т̣ха̄намева пассанти. йа̄дисако тесам̣ сароти те чхиннассара̄пи хонти гаггассара̄пи ка̄кассара̄пи, саттха̄ брахмассарова. идам̣ пана бха̄сантарам̣ сандха̄йа катхитам̣. сачепи хи саттха̄ ра̄джа̄сане нисинно катхети, ‘‘аджджа ра̄джа̄ мадхурена катхетӣ’’ти несам̣ хоти. катхетва̄ пакканте пана бхагавати пуна ра̄джа̄нам̣ а̄гатам̣ дисва̄ ‘‘ко ну кхо айа’’нти вӣмам̣са̄ уппаджджати. таттха ко ну кхо айанти ‘‘имасмим̣ т̣ха̄не ида̄нева ма̄гадхабха̄са̄йа сӣхал̣абха̄са̄йа мадхурена а̄ка̄рена катхенто ко ну кхо айам̣ антарахито, ким̣ дево уда̄ху мануссо’’ти евам̣ вӣмам̣санта̄пи на джа̄нантӣти аттхо. киматтхам̣ паневам̣ аджа̄нанта̄нам̣ дхаммам̣ десетӣти? ва̄санаттха̄йа. евам̣ сутопи хи дхаммо ана̄гате паччайо хотӣти ана̄гатам̣ пат̣ичча десети. анекасатам̣ бра̄хман̣апарисантиа̄динам̣ сон̣адан̣д̣асама̄гама̄дивасена чева ан̃н̃ачаккава̄л̣авасена ча самбхаво ведитаббо.