5. упосатхавагго

4. ва̄сет̣т̣хасуттаван̣н̣ана̄

44. пан̃чамасса чатуттхе име чепи, ва̄сет̣т̣ха, маха̄са̄ла̄ти пурато т̣хите две са̄ларуккхе дассенто парикаппопамам̣ а̄ха. идам̣ вуттам̣ хоти – име та̄ва маха̄са̄ла̄ ачетана̄. саче етепи сачетана̄ хутва̄ ат̣т̣хан̇гасаманна̄гатам̣ упосатхам̣ упавасеййум̣, етесампи со упосатхава̄со дӣгхараттам̣ хита̄йа сукха̄йа асса. бхӯте пана ваттаббамева наттхӣти.

6. ануруддхасуттаван̣н̣ана̄

46. чхат̣т̣хе йена̄йасма̄ ануруддхоти та̄ кира девата̄ аттано сампаттим̣ олокетва̄ ‘‘ким̣ ну кхо нисса̄йа айам̣ сампатти амхехи ладдха̄’’ти а̄ваджджама̄на̄ тхерам̣ дисва̄ ‘‘майам̣ амха̄кам̣ аййасса пуббе чаккаваттираджджам̣ каронтасса па̄дапарича̄рика̄ хутва̄ тена диннова̄де т̣хатва̄ имам̣ сампаттим̣ лабхимха, гаччха̄ма тхерам̣ а̄нетва̄ имам̣ сампаттим̣ анубхависса̄ма̄’’ти дива̄ йена̄йасма̄ ануруддхо тенупасан̇камим̣су. тӣсу т̣ха̄несӯти тӣсу ка̄ран̣есу. т̣ха̄насо пат̣илабха̄ма̄ти кхан̣енева лабха̄ма. саранти вачанасаддам̣ ва̄ гӣтасаддам̣ ва̄ а̄бхаран̣асаддам̣ ва̄. пӣта̄ ассӯтиа̄дӣни нӣла̄ та̄ва джа̄та̄, пӣта̄ бхавитум̣ на саккхиссантӣтиа̄дина̄ найена чинтетва̄ витаккети. та̄пи ‘‘ида̄ни аййо амха̄кам̣ пӣтабха̄вам̣ иччхати, ида̄ни лохитабха̄ва’’нти та̄диса̄ва ахесум̣.

аччхарам̣ ва̄десӣти па̄н̣италам̣ ва̄деси. пан̃чан̇гикасса̄ти а̄татам̣, витатам̣, а̄татавитатам̣, гханам̣, сусиранти имехи пан̃чахи ан̇гехи саманна̄гатасса. таттха а̄татам̣ на̄ма чаммапарийонаддхесу бхериа̄дӣсу екаталатӯрийам̣, витатам̣ на̄ма убхайаталам̣, а̄татавитатам̣ на̄ма саббасо парийонаддхам̣, сусирам̣ вам̣са̄ди, гханам̣ самма̄ди. сувинӣтасса̄ти а̄кад̣д̣ханаситхилакаран̣а̄дӣхи самуччхитасса. суппат̣ипата̄л̣итасса̄ти пама̄н̣е т̣хитабха̄ваджа̄нанаттхам̣ сут̣т̣ху пат̣ипата̄л̣итасса. кусалехи сусаманна̄хатасса̄ти йе ва̄детум̣ кусала̄ чхека̄, техи ва̄дитасса. ваггӯти чхеко сундаро. раджанӣйоти ран̃джетум̣ саматтхо. каманӣйоти ка̄метаббайутто. кхаманӣйоти ва̄ па̄т̣хо, дивасампи суййама̄но кхаматева, на ниббиндатӣти аттхо. маданӣйоти ма̄намадапурисамададжанано. индрийа̄ни оккхипӣти ‘‘аса̄руппам̣ има̄ девата̄ каронтӣ’’ти индрийа̄ни хет̣т̣ха̄ кхипи, на аккхӣни уммӣлетва̄ олокеси. на кхваййо ануруддхо са̄дийатӣти ‘‘майам̣ начча̄ма га̄йа̄ма, аййо пана ануруддхо на кхо са̄дийати, аккхӣни уммӣлетва̄ на олокети, ким̣ майам̣ наччитва̄ ва̄ га̄йитва̄ ва̄ карисса̄ма̄’’ти таттхева антарадха̄йим̣су. йена бхагава̄ тенупасан̇камӣти та̄сам̣ девата̄нам̣ а̄нубха̄вам̣ дисва̄ ‘‘катихи ну кхо дхаммехи саманна̄гато ма̄туга̄мо мана̄пака̄йике девалоке ниббаттатӣ’’ти имаматтхам̣ пуччхитум̣ упасан̇ками.

9-10. идхалокикасуттадвайаван̣н̣ана̄

49-50. наваме айам̣’са локо а̄раддхо хотӣти айамасса локо идхалоке каран̣аматта̄йа а̄раддхатта̄ парипун̣н̣атта̄ а̄раддхо хоти парипун̣н̣о. сол̣аса̄ка̄расампанна̄ти сутте вуттехи ат̣т̣хахи, га̄тха̄су ат̣т̣хахӣти сол̣асахи а̄ка̄рехи саманна̄гата̄, йа̄ни ва̄ ат̣т̣хан̇га̄ни парампи тесу сама̄дапетӣти евампи сол̣аса̄ка̄расампанна̄ти еке. саддха̄сӣлапан̃н̃а̄ панеттха миссика̄ катхита̄. дасамам̣ бхиккхусан̇гхасса катхитам̣. саббасуттесу пана йам̣ на вуттам̣, там̣ хет̣т̣ха̄ а̄гатанайатта̄ утта̄наттхамева̄ти.

упосатхавагго пан̃чамо.