4. кхеттасуттаван̣н̣ана̄

34. чатуттхе на махаппхалам̣ хотӣти дхан̃н̃апхалена махаппхалам̣ на хоти. на махасса̄данти йамписса пхалам̣ хоти, тасса асса̄до на маха̄ хоти мандасса̄дам̣ на мадхурам̣. на пха̄тисеййанти сеййа̄писса на хоти вуд̣д̣хи, тасса махантам̣ вӣхитхамбхасаннивесам̣ на хотӣти аттхо. унна̄манинна̄мӣти тхаланиннавасена висаматалам̣. таттха тхале удакам̣ на сан̣т̣ха̄ти, нинне атибаху тит̣т̣хати. па̄са̄н̣асаккхариканти паттхаритва̄ т̣хитапит̣т̣хипа̄са̄н̣ехи ча кхуддакапа̄са̄н̣ехи ча саккхара̄хи ча саманна̄гатам̣. ӯсаранти уббхинналон̣ам̣. на ча гамбхӣраситанти тхаддхабхӯмита̄йа гамбхӣра̄нугатам̣, нан̇галамаггам̣ катва̄ каситум̣ на сакка̄ хоти, утта̄нанан̇галамаггамева хоти. на а̄йасампаннанти на удака̄гаманасампаннам̣. на апа̄йасампаннанти паччха̄бха̄ге удаканиггаманамаггасампаннам̣ на хоти. на ма̄тика̄сампаннанти на кхуддакамахантӣхи удакама̄тика̄хи сампаннам̣ хоти. на марийа̄дасампаннанти на кеда̄рамарийа̄да̄хи сампаннам̣. на махаппхалантиа̄дӣни сабба̄ни випа̄капхалавасенева ведитабба̄ни.

сампаннети парипун̣н̣е сампаттийутте. павутта̄ бӣджасампада̄ти сампаннам̣ бӣджам̣ ропитам̣. деве сампа̄дайантамхӣти деве самма̄ вассанте. анӣтисампада̄ хотӣти кӣт̣акимиа̄дипа̄н̣акаӣтийа̄ абха̄во ека̄ сампада̄ хоти. вирӯл̣хӣти вад̣д̣хи дутийа̄ сампада̄ хоти. вепулланти випулабха̄во татийа̄ сампада̄ хоти. пхаланти парипун̣н̣апхалам̣ чатуттхӣ сампада̄ хоти. сампаннасӣлесӯти парипун̣н̣асӣлесу. бходжанасампада̄ти сампаннам̣ вивидхабходжанам̣. сампада̄нанти тивидхам̣ кусаласампадам̣. упанетӣти са̄ бходжанасампада̄ упанайати. касма̄? сампаннан̃хисса там̣ катам̣, йасма̄сса там̣ катакаммам̣ сампаннам̣ парипун̣н̣анти аттхо. сампаннаттхӯдха̄ти сампанно аттху идха. виджджа̄чаран̣асампанноти тӣхи виджджа̄хи ча пан̃чадасахи чаран̣адхаммехи ча саманна̄гато. ладдха̄ти еварӯпо пуггало читтасса сампадам̣ авекаллапарипун̣н̣абха̄вам̣ лабхитва̄. кароти каммасампаданти парипун̣н̣акаммам̣ кароти. лабхати чаттхасампаданти аттхан̃ча парипун̣н̣ам̣ лабхати. дит̣т̣хисампаданти випассана̄дит̣т̣хим̣. маггасампаданти сота̄паттимаггам̣. йа̄ти сампаннама̄насоти парипун̣н̣ачитто хутва̄ арахаттам̣ йа̄ти. са̄ хоти саббасампада̄ти са̄ саббадуккхехи вимутти саббасампада̄ на̄ма хотӣти.