1. пат̣хамада̄насуттаван̣н̣ана̄

31. чатуттхасса пат̣хаме а̄саджджа да̄нам̣ детӣти патва̄ да̄нам̣ дети. а̄гатам̣ дисва̄ там̣ мухуттам̣йева нисӣда̄петва̄ сакка̄рам̣ катва̄ да̄нам̣ дети, дасса̄мӣти на киламети. бхайа̄ти ‘‘айам̣ ада̄йако ака̄рако’’ти гарахабхайа̄, апа̄йабхайа̄ ва̄. ада̄си мети майхам̣ пуббе еса идам̣ на̄ма ада̄сӣти дети. дассати мети ана̄гате идам̣ на̄ма дассатӣти дети. са̄ху да̄нанти да̄нам̣ на̄ма са̄дху сундарам̣ буддха̄дӣхи пан̣д̣итехи пасаттханти дети. читта̄лан̇ка̄рачиттапариккха̄раттхам̣ да̄нам̣ детӣти саматхавипассана̄читтасса алан̇ка̄раттхан̃чева париккха̄раттхан̃ча дети. да̄нан̃хи читтам̣ мудум̣ кароти. йена ладдхо, со ‘‘ладдхам̣ ме’’ти мудучитто хоти. йена диннам̣, сопи ‘‘диннам̣ майа̄’’ти мудучитто хоти. ити убхиннам̣ читтам̣ мудум̣ кароти. тенева ‘‘адантадамана’’нти вуччати. йатха̄ха –

‘‘адантадаманам̣ да̄нам̣, ада̄нам̣ дантадӯсакам̣;

да̄нена пийава̄ча̄йа, уннаманти наманти ча̄’’ти.

имесу пана ат̣т̣хасу да̄несу читта̄лан̇ка̄рада̄намева уттаманти.