1. абйа̄катасуттаван̣н̣ана̄

54. чхат̣т̣хаваггасса пат̣хаме абйа̄катаваттхӯсӯти екам̣са̄дивасена акатхитаваттхӯсу. татха̄гатоти сатто. дит̣т̣хигатаметанти миччха̄дит̣т̣химаттакаметам̣, на та̄йа дит̣т̣хийа̄ гахитасатто на̄ма аттхи. пат̣ипаданти арийамаггам̣. на чхамбхатӣти дит̣т̣хивасена на кампати. сесападесупи есева найо. тан̣ха̄гатанти дит̣т̣хитан̣ха̄. сан̃н̃а̄гата̄дӣсупи есева найо. дит̣т̣хисан̃н̃а̄ ева хеттха сан̃н̃а̄гатам̣, дит̣т̣хинисситама̄нойева дит̣т̣химан̃н̃итамева ва̄ ман̃н̃итам̣, дит̣т̣хипапан̃чова папан̃читам̣, дит̣т̣хупа̄да̄намева упа̄да̄нам̣, дит̣т̣хийа̄ вирӯпам̣ пат̣исаран̣абха̄войева виппат̣иса̄ро на̄ма̄ти ведитаббо. еттха ча дит̣т̣хиггахан̣ена два̄сат̣т̣хи дит̣т̣хийо, дит̣т̣хиниродхага̄минипат̣ипада̄гахан̣ена сота̄паттимагго гахитоти.