2. пурисагатисуттаван̣н̣ана̄

55. дутийе пурисагатийоти пурисасса н̃а̄н̣агатийо. анупа̄да̄паринибба̄нанти апаччайанибба̄нам̣. но часса̄ти атӣте аттабха̄ваниббаттакам̣ каммам̣ но че абхависса. но ча ме сийа̄ти етарахи ме айам̣ аттабха̄во на сийа̄. на бхависсатӣти етарахи ме ана̄гататтабха̄ваниббаттакам̣ каммам̣ на бхависсати. на ча ме бхависсатӣти ана̄гате ме аттабха̄во на бхависсати. йадаттхи йам̣ бхӯтанти йам̣ аттхи йам̣ бхӯтам̣ паччуппаннаккхандхапан̃чакам̣. там̣ паджаха̄мӣти упеккхам̣ пат̣илабхатӣти там̣ таттха чхандара̄гаппаха̄нена паджаха̄мӣти випассанупеккхам̣ пат̣илабхати. бхаве на раджджатӣти атӣте кхандхапан̃чаке тан̣ха̄дит̣т̣хӣхи на раджджати. самбхаве на раджджатӣти ана̄гатепи татхева на раджджати. аттхуттари падам̣ сантанти уттари сантам̣ нибба̄нападам̣ на̄ма аттхи. саммаппан̃н̃а̄йа пассатӣти там̣ сахавипассана̄йа маггапан̃н̃а̄йа самма̄ пассати. на саббена саббанти екачча̄нам̣ килеса̄нам̣ аппахӣнатта̄ саччапат̣иччха̄дакасса тамасса саббасо авиддхам̣ситатта̄ на сабба̄ка̄рена саббам̣. хан̃н̃ама̄нети сан̣д̣а̄сена гахетва̄ мут̣т̣хика̄йа кот̣т̣ийама̄не. антара̄паринибба̄йӣти упапаттисаманантарато пат̣т̣ха̄йа а̄йуно вемаджджхам̣ анатиккамитва̄ еттхантаре килесапаринибба̄нена париниббуто хоти. анупахачча таланти а̄ка̄саталам̣ анупахачча анатиккамитва̄, бхӯмим̣ аппатва̄ а̄ка̄сейева нибба̄йеййа̄ти има̄хи тӣхи упама̄хи тайо антара̄паринибба̄йӣ дассита̄.

упахаччапаринибба̄йӣти а̄йувемаджджхам̣ атиккамитва̄ паччхимакот̣им̣ аппатва̄ париниббуто хоти. упахачча таланти джалама̄на̄ гантва̄ а̄ка̄саталам̣ атиккамитва̄ патхавӣталам̣ ва̄ упаханитва̄ патхавийам̣ патитаматта̄ва нибба̄йеййа. асан̇кха̄рена аппайогена килесе кхепетва̄ паринибба̄йӣти асан̇кха̄рапаринибба̄йӣ. сасан̇кха̄рена саппайогена килесе кхепетва̄ паринибба̄йӣти сасан̇кха̄рапаринибба̄йӣ. гаччханти нира̄раккхам̣ аран̃н̃ам̣. да̄йанти са̄раккхам̣ абхайаттха̄йа диннам̣ аран̃н̃ам̣. сесаметтха утта̄наттхамева. имасмим̣ сутте арийапуггала̄ва катхита̄ти.