4. девата̄вагго

5. пат̣хамамиттасуттаван̣н̣ана̄

36. чатуттхасса пан̃чаме дуддаданти дуппариччаджам̣ маха̄рахам̣ бхан̣д̣акам̣. дуккарам̣ каротӣти ка̄тум̣ асукарам̣ каммам̣ кароти. дуккхамам̣ кхаматӣти саха̄йасса аттха̄йа дурадхива̄сам̣ адхива̄сети. гуйхамасса а̄викаротӣти аттано гуйхам̣ тасса а̄викароти. гуйхамасса паригухатӣти тасса гуйхам̣ ан̃н̃есам̣ на̄чиккхати. кхӣн̣ена на̄тиман̃н̃атӣти тасса бхоге кхӣн̣е тена кхайена там̣ на̄тиман̃н̃ати, тасмим̣ ома̄нам̣ аттани ча атима̄нам̣ на кароти.

6. дутийамиттасуттаван̣н̣ана̄

37. чхат̣т̣хе ватта̄ти вачанакусало. вачанаккхамоти вачанам̣ кхамати, диннам̣ ова̄дам̣ кароти. гамбхӣранти гуйхам̣ рахассам̣ джха̄нанисситам̣ випассана̄маггапхаланибба̄нанисситам̣.

7. пат̣хамапат̣исамбхида̄суттаван̣н̣ана̄

38. саттаме идам̣ ме четасо лӣнаттанти уппанне четасо лӣнатте ‘‘идам̣ ме четасо лӣнатта’’нти йатха̄сабха̄вато джа̄на̄ти. аджджхаттам̣ сам̣кхиттам̣ на̄ма тхинамиддха̄нугатам̣. бахиддха̄ виккхиттам̣ на̄ма пан̃часу ка̄магун̣есу виккхиттам̣. ведана̄тиа̄дӣни папан̃чамӯлавасена гахита̄ни. ведана̄ хи тан̣ха̄йа мӯлам̣ сукхавасена тан̣хуппаттито, сан̃н̃а̄ дит̣т̣хийа̄ мӯлам̣ авибхӯта̄рамман̣е дит̣т̣хиуппаттито, витакко ма̄насса мӯлам̣ витаккавасена асмӣти ма̄нуппаттито. саппа̄йа̄саппа̄йесӯти упака̄ра̄нупака̄ресу. нимиттанти ка̄ран̣ам̣. сесам̣ саббаттха утта̄наттхамева̄ти.

девата̄вагго чатуттхо.