1. дханавагго

1-5. пат̣хамапийасутта̄диван̣н̣ана̄

1-5. саттаканипа̄тасса пат̣хаме анаван̃н̃аттика̄моти абхин̃н̃а̄табха̄вака̄мо. татийе йонисо вичине дхамманти упа̄йена чатусаччадхаммам̣ вичина̄ти. пан̃н̃а̄йаттхам̣ випассатӣти сахавипассана̄йа маггапан̃н̃а̄йа саччадхаммам̣ випассати. паджджотассева̄ти дӣпассева. вимоккхо хоти четасоти тасса имехи балехи саманна̄гатасса кхӣн̣а̄савасса дӣпанибба̄нам̣ вийа чаримакачиттасса ваттха̄рамман̣ехи вимоккхо хоти, гатат̣т̣ха̄нам̣ на пан̃н̃а̄йати. чатуттхе саддхо хотӣтиа̄дӣни пан̃чаканипа̄те ван̣н̣ита̄нева. пан̃чаме дхана̄нӣти ада̄лиддийакаран̣ат̣т̣хена дхана̄ни.

7. уггасуттаван̣н̣ана̄

7. саттаме угго ра̄джамаха̄маттоти пасенадикосаласса маха̄амаччо. упасан̇камӣти бхуттапа̄тара̄со упасан̇ками. ад̣д̣хоти нидха̄нагатена дханена ад̣д̣хо. мига̄ро рохан̣еййоти рохан̣асет̣т̣хино натта̄рам̣ мига̄расет̣т̣хим̣ сандха̄йевама̄ха. махаддханоти вал̣ан̃джанадханена махаддхано. маха̄бхоготи упабхогапарибхогабхан̣д̣асса махантата̄йа маха̄бхого. хиран̃н̃асса̄ти суван̣н̣ассева. суван̣н̣а̄мева хисса кот̣исан̇кхйам̣ ахоси. рӯпийасса̄ти сесасса тат̣т̣акасаракааттхаран̣апа̄вуран̣а̄дино парибхогапариккха̄расса пама̄н̣асан̇кха̄не ва̄дойева наттхи.

8. сам̣йоджанасуттаван̣н̣ана̄

8. ат̣т̣хаме анунайасам̣йоджананти ка̄мара̄гасам̣йоджанам̣. сабба̄нева чета̄ни бандханат̣т̣хена сам̣йоджана̄нӣти ведитабба̄ни. имасмим̣ сутте ват̣т̣амева катхитам̣. сесам̣ саббаттха утта̄наттхамева̄ти.

дханавагго пат̣хамо.