7. маджджхесуттаван̣н̣ана̄

61. саттаме па̄ра̄йане меттеййапан̃хети па̄ра̄йанасама̄гамамхи меттеййама̄н̣авасса пан̃хе. убхонте видитва̄на̄ти две анте две кот̣т̣ха̄се джа̄нитва̄. маджджхе манта̄ на липпатӣти манта̄ вуччати пан̃н̃а̄, та̄йа убхо анте видитва̄ маджджхе на липпати, вемаджджхет̣т̣ха̄не на липпати. сиббанимаччага̄ти сиббанисан̇кха̄там̣ тан̣хам̣ атӣто. пхассоти пхассавасена ниббаттатта̄ айам̣ аттабха̄во. еко антоти айамеко кот̣т̣ха̄со. пхассасамудайоти пхассо самудайо асса̄ти пхассасамудайо, имасмим̣ аттабха̄ве катакаммапхассапаччайа̄ ниббатто ана̄гататтабха̄во. дутийо антоти дутийо кот̣т̣ха̄со. пхассаниродхоти нибба̄нам̣. маджджхети сиббинитан̣хам̣ чхетва̄ двидха̄каран̣ат̣т̣хена нибба̄нам̣ маджджхе на̄ма хоти. тан̣ха̄ хи нам̣ сиббатӣти тан̣ха̄ нам̣ аттабха̄вадвайасан̇кха̄там̣ пхассан̃ча пхассасамудайан̃ча сиббати гхат̣т̣ети. ким̣ ка̄ран̣а̄? тасса тассева бхавасса абхиниббаттийа̄. йади хи тан̣ха̄ на сиббеййа, тасса тасса бхавасса ниббатти на бхавеййа. имасмим̣ т̣ха̄не кот̣имаджджхикӯпамам̣ ган̣ханти. двиннан̃хи кан̣д̣а̄нам̣ екато катва̄ маджджхе суттена сам̣сиббита̄нам̣ кот̣и маджджханти вуччати. сутте чхинне убхо кан̣д̣а̄ни убхато патанти. еваметтха кан̣д̣адвайам̣ вийа вуттаппака̄ра̄ две анта̄, сиббитва̄ т̣хитасуттам̣ вийа тан̣ха̄, сутте чхинне кан̣д̣адвайасса убхатопатанам̣ вийа тан̣ха̄йа нируддха̄йа антадвайам̣ нируддхамева хоти. етта̄вата̄ти еттакена имина̄ убхо анте видитва̄ тан̣ха̄йа маджджхе анупалиттабха̄вена абхин̃н̃еййам̣ чатусаччадхаммам̣ абхиджа̄на̄ти на̄ма, тӣран̣апарин̃н̃а̄йа ча паха̄напарин̃н̃а̄йа ча париджа̄нитаббам̣ локийасаччадвайам̣ париджа̄на̄ти на̄ма. дит̣т̣хева дхаммети имасмим̣йева аттабха̄ве. дуккхассантакаро хотӣти ват̣т̣адуккхасса кот̣икаро париччхедапариват̣умакаро хоти на̄ма.

дутийава̄ре тин̣н̣ам̣ кан̣д̣а̄нам̣ васена упама̄ ведитабба̄. тин̣н̣ан̃хи кан̣д̣а̄нам̣ суттена сам̣сиббита̄нам̣ сутте чхинне тӣн̣и кан̣д̣а̄ни тӣсу т̣ха̄несу патанти, еваметтха кан̣д̣аттайам̣ вийа атӣта̄на̄гатапаччуппанна̄ кхандха̄, суттам̣ вийа тан̣ха̄. са̄ хи атӣтам̣ паччуппаннена, паччуппаннан̃ча ана̄гатена саддхим̣ сам̣сиббати. сутте чхинне кан̣д̣аттайасса тӣсу т̣ха̄несу патанам̣ вийа тан̣ха̄йа нируддха̄йа атӣта̄на̄гатапаччуппанна̄ кхандха̄ нируддха̄ва хонти.

татийава̄ре адуккхамасукха̄ маджджхети двиннам̣ ведана̄нам̣ антарат̣т̣хакабха̄вена маджджхе. сукхан̃хи дуккхасса, дуккхам̣ ва̄ сукхасса антарам̣ на̄ма наттхи. тан̣ха̄ сиббинӣти ведана̄су нандира̄го ведана̄нам̣ упаччхедам̣ нива̄ретӣти та̄ сиббати на̄ма.

чатуттхава̄ре вин̃н̃а̄н̣ам̣ маджджхети пат̣исандхивин̃н̃а̄н̣ампи сесавин̃н̃а̄н̣ампи на̄марӯпапаччайасамуда̄гататта̄ на̄марӯпа̄нам̣ маджджхе на̄ма.

пан̃чамава̄ре вин̃н̃а̄н̣ам̣ маджджхети каммавин̃н̃а̄н̣ам̣ маджджхе, аджджхаттика̄йатанесу ва̄ мана̄йатанена каммасса гахитатта̄ идха йам̣кин̃чи вин̃н̃а̄н̣ам̣ маджджхе на̄ма, манодва̄ре ва̄ а̄ваджджанасса аджджхаттика̄йатананисситатта̄ джаванавин̃н̃а̄н̣ам̣ маджджхе на̄ма.

чхат̣т̣хава̄ре сакка̄йоти тебхӯмакават̣т̣ам̣. сакка̄йасамудайоти самудайасаччам̣. сакка̄йаниродхоти ниродхасаччам̣. парийа̄йена̄ти тена тена ка̄ран̣енева. сесам̣ саббаттха вуттанайенева ведитаббам̣.