1. а̄хунеййавагго

1. пат̣хамаа̄хунеййасуттаван̣н̣ана̄

1. чхакканипа̄тасса пат̣хаме идха, бхиккхаве, бхиккхӯти, бхиккхаве, имасмим̣ са̄сане бхиккху. нева сумано хоти на думманоти ит̣т̣ха̄рамман̣е ра̄гасахагатена соманассена сумано ва̄ анит̣т̣ха̄рамман̣е досасахагатена доманассена думмано ва̄ на хоти. упеккхако вихарати сато сампаджа̄ноти маджджхатта̄рамман̣е асамапеккханена ан̃н̃а̄н̣упеккха̄йа упеккхакабха̄вам̣ ана̄паджджитва̄ сато сампаджа̄но хутва̄ а̄рамман̣е маджджхатто вихарати. имасмим̣ сутте кхӣн̣а̄савасса сататавиха̄ро катхито.

2. дутийаа̄хунеййасуттаван̣н̣ана̄

2-4. дутийе анекавихитам̣ иддхивидхантиа̄дӣни висуддхимагге вутта̄нева. а̄сава̄нам̣ кхайа̄ ана̄саванти а̄сава̄нам̣ кхайена ана̄савам̣, на чаккхувин̃н̃а̄н̣а̄дӣнам̣ вийа абха̄вена̄ти. имасмим̣ сутте кхӣн̣а̄савасса абхин̃н̃а̄ пат̣ипа̄т̣ийа̄ катхита̄. татийачатуттхесу кхӣн̣а̄саво катхито.

5-7. а̄джа̄нӣйасуттаттайаван̣н̣ана̄

5-7. пан̃чаме ан̇гехӣти гун̣ан̇гехи. кхамоти адхива̄сако. рӯпа̄нанти рӯпа̄рамман̣а̄нам̣. ван̣н̣асампанноти сарӣраван̣н̣ена сампанно. чхат̣т̣хе баласампанноти ка̄йабалена сампанно. саттаме джавасампанноти пададжавена сампанно.

8-9. ануттарийасутта̄диван̣н̣ана̄

8-9. ат̣т̣хаме ануттарийа̄нӣти ан̃н̃ена уттаритарена рахита̄ни нируттара̄ни. дассана̄нуттарийанти рӯпадассанесу ануттарам̣. еса найо саббападесу. хаттхиратана̄дӣнан̃хи дассанам̣ на дассана̄нуттарийам̣, нивит̣т̣хасаддхасса пана нивит̣т̣хапемавасена дасабаласса ва̄ бхиккхусан̇гхасса ва̄ касин̣аасубханимитта̄дӣнам̣ ва̄ ан̃н̃атарасса дассанам̣ дассана̄нуттарийам̣ на̄ма. кхаттийа̄дӣнам̣ гун̣акатха̄саванам̣ на савана̄нуттарийам̣, нивит̣т̣хасаддхасса пана нивит̣т̣хапемавасена тин̣н̣ам̣ ва̄ ратана̄нам̣ гун̣акатха̄саванам̣ тепит̣акабуддхавачанасаванам̣ ва̄ савана̄нуттарийам̣ на̄ма. ман̣иратана̄дӣнам̣ ла̄бхо на ла̄бха̄нуттарийам̣, саттавидхаарийадханала̄бхо пана ла̄бха̄нуттарийам̣ на̄ма. хаттхисиппа̄дисиккханам̣ на сиккха̄нуттарийам̣, сиккха̄ттайасса пӯран̣ам̣ пана сиккха̄нуттарийам̣ на̄ма. кхаттийа̄дӣнам̣ па̄ричарийа̄ на па̄ричарийа̄нуттарийам̣, тин̣н̣ам̣ пана ратана̄нам̣ па̄ричарийа̄ па̄ричарийа̄нуттарийам̣ на̄ма. кхаттийа̄дӣнам̣ гун̣а̄нуссаран̣ам̣ на ануссата̄нуттарийам̣, тин̣н̣ам̣ пана ратана̄нам̣ гун̣а̄нуссаран̣ам̣ ануссата̄нуттарийам̣ на̄ма. ити има̄ни чха ануттарийа̄ни локийалокуттара̄ни катхита̄ни. наваме буддха̄нуссатӣти буддхагун̣а̄рамман̣а̄ сати. сесападесупи есева найо.

10. маха̄на̄масуттаван̣н̣ана̄

10. дасаме маха̄на̄моти дасабаласса чӯл̣апиту путто еко сакйара̄джа̄. йена бхагава̄ тенупасан̇камӣти бхуттапа̄тара̄со хутва̄ да̄сапариджанапаривуто гандхама̄ла̄дӣни га̄ха̄петва̄ йаттха саттха̄, таттха агама̄си. арийапхалам̣ асса а̄гатанти а̄гатапхало. сиккха̄ттайаса̄санам̣ етена вин̃н̃а̄танти вин̃н̃а̄таса̄сано. ити айам̣ ра̄джа̄ ‘‘сота̄паннасса ниссайавиха̄рам̣ пуччха̄мӣ’’ти пуччханто евама̄ха.

невасса ра̄гапарийут̣т̣хитанти на уппаджджама̄нена ра̄гена ут̣т̣хахитва̄ гахитам̣. уджугатанти буддха̄нуссатикаммат̣т̣ха̄не уджукамева гатам̣. татха̄гатам̣ а̄раббха̄ти татха̄гатагун̣е а̄раббха. аттхаведанти ат̣т̣хакатхам̣ нисса̄йа уппаннам̣ пӣтипа̄моджджам̣. дхаммаведанти па̄л̣им̣ нисса̄йа уппаннам̣ пӣтипа̄моджджам̣. дхаммӯпасан̃хитанти па̄л̣ин̃ча ат̣т̣хакатхан̃ча нисса̄йа уппаннам̣. памудитасса̄ти дувидхена па̄моджджена памудитасса. пӣти джа̄йатӣти пан̃чавидха̄ пӣти ниббаттати. ка̄йо пассамбхатӣти на̄мака̄йо ча караджака̄йо ча даратхапат̣иппассаддхийа̄ пат̣иппассамбхати. сукханти ка̄йикачетасикасукхам̣. сама̄дхийатӣти а̄рамман̣е самма̄ т̣хапитам̣ хоти. висамагата̄йа паджа̄йа̄ти ра̄гадосамохависамагатесу саттесу. самаппаттоти самам̣ упасамам̣ патто хутва̄. сабйа̄паджджха̄йа̄ти садуккха̄йа. дхаммасотам̣ сама̄панноти випассана̄сан̇кха̄там̣ дхаммасотам̣ сама̄панно. буддха̄нуссатим̣ бха̄ветӣти буддха̄нуссатикаммат̣т̣ха̄нам̣ брӯхети вад̣д̣хети. имина̄ найена саббаттха аттхо ведитаббо. ити маха̄на̄мо сота̄паннасса ниссайавиха̄рам̣ пуччхи. саттха̄писса тамева катхеси. евам̣ имасмим̣ сутте сота̄паннова катхитоти.

а̄хунеййавагго пат̣хамо.