7. чодана̄суттаван̣н̣ана̄

167. саттаме чодакена̄ти ваттхусандассана̄ а̄паттисандассана̄ сам̣ва̄саппат̣иккхепо са̄мӣчиппат̣иккхепоти чатӯхи чодана̄ваттхӯхи чодайама̄нена. ка̄лена ваккха̄ми но ака̄лена̄ти еттха чудитакасса ка̄ло катхито, на чодакасса. парам̣ чодентена хи парисамаджджхе ва̄ упосатхапава̄ран̣агге ва̄ а̄санаса̄ла̄бходжанаса̄ла̄дӣсу ва̄ на чодетаббо, дива̄т̣т̣ха̄не нисиннака̄ле ‘‘карота̄йасма̄ ока̄сам̣, ахам̣ а̄йасмантам̣ ваттука̄мо’’ти евам̣ ока̄сам̣ ка̄ретва̄ чодетаббо. пуггалам̣ пана упапариккхитва̄ йо лолапуггало абхӯтам̣ ватва̄ бхиккхӯнам̣ айасам̣ а̄ропети, со ока̄сакаммам̣ вина̄пи чодетаббо. бхӯтена̄ти таччхена сабха̄вена. сан̣хена̄ти мат̣т̣хена мудукена. аттхасам̣хитена̄ти аттхака̄мата̄йа хитака̄мата̄йа упетена. авиппат̣иса̄ро упадаха̄табботи аман̇кубха̄во упанетаббо. алам̣ те авиппат̣иса̄ра̄йа̄ти йуттам̣ те аман̇кубха̄ва̄йа. сесаметтха утта̄намева̄ти. ат̣т̣хамам̣ хет̣т̣ха̄ вуттанайатта̄ па̄кат̣амева.