6. упаджджха̄йасуттаван̣н̣ана̄

56. чхат̣т̣хе мадхуракаджа̄тоти сан̃джа̄тагарубха̄во. диса̄ ча ме на паккха̄йантӣти чатассо диса̄ ча анудиса̄ ча майхам̣ на упат̣т̣хахантӣти вадати. дхамма̄ ча мам̣ наппат̣ибхантӣти саматхавипассана̄дхамма̄пи ме на упат̣т̣хаханти. анабхирато ча брахмачарийам̣ чара̄мӣти уккан̣т̣хито хутва̄ брахмачарийава̄сам̣ васа̄ми. йена бхагава̄ тенупасан̇камӣти тасса катхам̣ сутва̄ ‘‘буддхавенеййапуггало айа’’нти там̣ ка̄ран̣ам̣ бхагавато а̄рочетум̣ упасан̇ками. авипассакасса кусала̄нам̣ дхамма̄нанти кусаладхамме авипассантасса, анесантасса агавесантасса̄ти аттхо. бодхипаккхийа̄нам̣ дхамма̄нанти сатипат̣т̣ха̄на̄дӣнам̣ саттатим̣садхамма̄нам̣.