7. абхин̣хапаччавеккхитаббат̣ха̄насуттаван̣н̣ана̄

57. саттаме джара̄дхаммомхӣти джара̄сабха̄во амхи. джарам̣ анатӣтоти джарам̣ анатикканто, антоджара̄йа ева чара̄ми. сесападесупи есева найо. каммассакотиа̄дӣсу каммам̣ майхам̣ сакам̣ аттано сантаканти каммассако амхи. каммасса да̄йа̄доти каммада̄йа̄до, каммам̣ майхам̣ да̄йаджджам̣ сантаканти аттхо. каммам̣ майхам̣ йони ка̄ран̣анти каммайони. каммам̣ майхам̣ бандхӯти каммабандху, камман̃а̄такоти аттхо. каммам̣ майхам̣ пат̣исаран̣ам̣ патит̣т̣ха̄ти каммапат̣исаран̣о. тасса да̄йа̄до бхависса̄мӣти тасса каммасса да̄йа̄до тена диннапхалапат̣игга̄хако бхависса̄мӣти аттхо. йоббанамадоти йоббанам̣ а̄раббха уппаннамадо. сесесупи есева найо. магго сан̃джа̄йатӣти локуттарамагго сан̃джа̄йати. сам̣йоджана̄ни саббасо пахӣйантӣти даса сам̣йоджана̄ни саббасо пахӣйанти. анусайа̄ бйантӣхонтӣти сатта анусайа̄ вигатанта̄ париччхинна̄ париват̣ума̄ хонти. еваметтха хет̣т̣ха̄ пан̃часу т̣ха̄несу випассана̄ катхита̄, имесу пан̃часу локуттарамагго.

ида̄ни га̄тха̄хи кӯт̣ам̣ ган̣ханто бйа̄дхидхамма̄тиа̄дима̄ха. таттха н̃атва̄ дхаммам̣ нирӯпадхинти упадхирахитам̣ арахаттамаггам̣ н̃атва̄. саббе маде абхибхосмӣти саббе име тайопи маде адхибхавим̣, атиккамма т̣хитосмӣти аттхо. неккхаммам̣ дат̣т̣ху кхематоти паббаджджам̣ кхемато дисва̄. тасса ме аху усса̄хо, нибба̄нам̣ абхипассатоти тасса майхам̣ нибба̄нам̣ абхипассантасса ва̄йа̄мо ахоси. аниватти бхависса̄мӣти паббаджджато аниваттико бхависса̄ми, брахмачарийава̄сато аниваттико, саббан̃н̃утан̃н̃а̄н̣ато аниваттико бхависса̄ми. брахмачарийапара̄йан̣оти маггабрахмачарийапара̄йан̣о. имина̄ локуттаро ат̣т̣хан̇гико магго катхитоти.