1. сам̣кхиттасуттаван̣н̣ана̄

232. чатуттхасса пат̣хаме кан̣ханти ка̄л̣акам̣ дасаакусалакаммапатхакаммам̣. кан̣хавипа̄канти апа̄йе ниббаттанато ка̄л̣акавипа̄кам̣. сукканти пан̣д̣аракам̣ кусалакаммапатхакаммам̣. суккавипа̄канти сагге ниббаттанато пан̣д̣аракавипа̄кам̣. кан̣хасукканти миссакакаммам̣. кан̣хасуккавипа̄канти сукхадуккхавипа̄кам̣. миссакакамман̃хи катва̄ акусалена тираччха̄найонийам̣ ман̇галахаттхит̣т̣ха̄на̄дӣсу уппанно кусалена паватте сукхам̣ ведийати. кусалена ра̄джакулепи ниббатто акусалена паватте дуккхам̣ ведийати. акан̣хам̣ асукканти каммаккхайакарам̣ чатумагган̃а̄н̣ам̣ адхиппетам̣. тан̃хи йади кан̣хам̣ бхавеййа, кан̣хавипа̄кам̣ дадеййа. йади суккам̣ бхавеййа, суккавипа̄кам̣ дадеййа. убхайавипа̄касса пана аппада̄нато акан̣хам̣ асукканти айаметтха аттхо.