8. упакасуттаван̣н̣ана̄

188. ат̣т̣хаме упакоти тасса на̄мам̣. ман̣д̣ика̄путтоти ман̣д̣ика̄йа путто. упасан̇камӣти со кира девадаттасса упат̣т̣ха̄ко, ‘‘ким̣ ну кхо саттха̄ майи аттано сантикам̣ упагате ван̣н̣ам̣ катхессати, уда̄ху аван̣н̣а’’нти паригган̣ханаттхам̣ упасан̇ками. ‘‘нерайико девадатто каппат̣т̣хо атекиччхо’’ти (чӯл̣ава. 348) вачанам̣ сутва̄ саттха̄рам̣ гхат̣т̣етука̄мо упасан̇камӣтипи ваданти. парӯпа̄рамбхам̣ ваттетӣти парагарахам̣ катхети. саббо со на упапа̄детӣти саббопи со кусаладхаммам̣ на уппа̄дети, аттано ва̄ вачанам̣ упапа̄детум̣ ануччхавикам̣ ка̄тум̣ на саккоти. анупапа̄денто га̄райхо хотӣти кусалам̣ дхаммам̣ уппа̄детум̣ асакконто аттано ча вачанам̣ упапаннам̣ ануччхавикам̣ ка̄тум̣ асакконто га̄райхо хоти. упаваджджоти упавадитаббо ча хоти, ваджджена ва̄ упето хоти, садосо хотӣти аттхо.

атха бхагава̄ тасса ва̄дам̣ гахетва̄ тассева гӣва̄йа пат̣имун̃чанто парӯпа̄рамбхантиа̄дима̄ха. уммуджджама̄накам̣йева̄ти удакато сӣсам̣ уккхипантам̣йева. таттха апарима̄н̣а̄ пада̄тиа̄дӣсу тасмим̣ акусаланти пан̃н̃а̄пане пада̄нипи аккхара̄нипи дхаммадесана̄пи апарима̄н̣а̄йева. итипидам̣ акусаланти идампи акусалам̣ идампи акусалам̣ имина̄пи ка̄ран̣ена имина̄пи ка̄ран̣ена акусаланти евам̣ акусалапан̃н̃аттийам̣ а̄гата̄нипи апарима̄н̣а̄ни. атха̄пи ан̃н̃ена̄ка̄рена татха̄гато там̣ дхаммам̣ десеййа, евамписса десана̄ апарима̄н̣а̄ бхавеййа. йатха̄ха – ‘‘апарийа̄динна̄васса татха̄гатасса дхаммадесана̄, апарийа̄диннам̣ дхаммападабйан̃джана’’нти (ма. ни. 1.161). имина̄ упа̄йена саббава̄ресу аттхо ведитаббо. йа̄ва дхам̣сӣ вата̄йанти йа̄ва гун̣адхам̣сӣ вата айам̣. лон̣ака̄рада̄ракоти лон̣ака̄рага̄мада̄рако. йатра хи на̄ма̄ти йо хи на̄ма. а̄са̄детаббам̣ ман̃н̃иссатӣти гхат̣т̣етаббам̣ ман̃н̃иссати. апехӣти апагаччха, ма̄ ме пурато ат̣т̣ха̄си. еван̃ча пана ватва̄ гӣва̄йа ган̣ха̄петва̄ никкад̣д̣ха̄песийева̄ти.