2. виттха̄расуттаван̣н̣ана̄

162. дутийе абхиккхан̣анти абхин̣хам̣. а̄нантарийанти анантаравипа̄када̄йакам̣ маггасама̄дхим̣. а̄сава̄нам̣ кхайа̄йа̄ти арахаттапхалаттха̄йа. пан̃чиндрийа̄нӣти випассана̄пан̃чамака̄ни пан̃чиндрийа̄ни. пан̃н̃индрийанти хи еттха випассана̄пан̃н̃а̄ва пан̃н̃индрийанти адхиппетам̣. сесаметтха па̄л̣ивасена утта̄намева.

има̄сам̣ пана пат̣ипада̄нам̣ айам̣ а̄вибха̄вакатха̄ – идха бхиккху пуббе аката̄бхинивесо пуббабха̄ге рӯпапариггахе киламати, арӯпапариггахе киламати, паччайапариггахе киламати, тӣсу аддха̄су киламати, магга̄магге киламати. евам̣ пан̃часу т̣ха̄несу киламанто випассанам̣ па̄пун̣а̄ти. випассанам̣ патва̄пи удайаббайа̄нупассане, бхан̇га̄нупассане, бхайатупат̣т̣ха̄не, а̄дӣнава̄нупассане, ниббида̄нупассане, муччитукамйата̄н̃а̄н̣е, сан̇кха̄рупеккха̄н̃а̄н̣е, ануломан̃а̄н̣е, готрабхун̃а̄н̣ети имесу навасу випассана̄н̃а̄н̣есупи киламитва̄ва локуттарамаггам̣ па̄пун̣а̄ти. тасса со локуттарамагго евам̣ дуккхена гарубха̄вена саччхикататта̄ дуккхапат̣ипадо дандха̄бхин̃н̃о на̄ма джа̄то. йо пана пуббабха̄ге пан̃часу н̃а̄н̣есу киламанто апарабха̄ге навасу випассана̄н̃а̄н̣есу акиламитва̄ва маггам̣ саччхикароти, тасса со магго евам̣ дуккхена агарубха̄вена саччхикататта̄ дуккхапат̣ипадо кхиппа̄бхин̃н̃о на̄ма джа̄то. имина̄ упа̄йена итара̄пи две ведитабба̄.

гон̣апарийесакаупама̄хи чета̄ вибха̄ветабба̄ – екасса хи пурисасса чатта̄ро гон̣а̄ пала̄йитва̄ ат̣авим̣ павит̣т̣ха̄. со сакан̣т̣аке сагахане ване те парийесанто гаханамаггенева киччхена касирена гантва̄ гаханат̣т̣ха̄нейева нилӣне гон̣епи киччхена касирена аддаса. еко киччхена гантва̄ аббхока̄се т̣хите кхиппамева аддаса. апаро аббхока̄самаггена сукхена гантва̄ гаханат̣т̣ха̄не нилӣне киччхена касирена аддаса. апаро аббхока̄самаггенева сукхена гантва̄ аббхока̄се т̣хитейева кхиппам̣ аддаса. таттха чатта̄ро гон̣а̄ вийа чатта̄ро арийамагга̄ дат̣т̣хабба̄, гон̣апарийесако пурисо вийа йога̄вачаро, гаханамаггена киччхена касирена гаманам̣ вийа пуббабха̄ге пан̃часу н̃а̄н̣есу киламато дуккха̄пат̣ипада̄. гаханат̣т̣ха̄не нилӣна̄нам̣ киччхенева дассанам̣ вийа апарабха̄ге навасу н̃а̄н̣есу киламантасса арийамагга̄нам̣ дассанам̣. имина̄ упа̄йена сесаупама̄пи йоджетабба̄.