3. пат̣хамана̄на̄каран̣асуттаван̣н̣ана̄

123. татийе тадасса̄детӣти там̣ джха̄нам̣ сукхасса̄дена асса̄дети. ника̄метӣти паттхети. виттим̣ а̄паджджатӣти тут̣т̣хим̣ а̄паджджати. тададхимуттоти тасмим̣ адхимутто, там̣ ва̄ адхимутто. таббахулавиха̄рӣти тена джха̄нена бахулам̣ вихаранто. сахабйатам̣ упападжджатӣти сахабха̄вам̣ гаччхати, таттха ниббаттатӣти аттхо. каппо а̄йуппама̄н̣анти еттха пат̣хамаджджха̄нам̣ аттхи хӣнам̣, аттхи маджджхимам̣, аттхи пан̣ӣтам̣. таттха хӣнена уппанна̄нам̣ каппасса татийо кот̣т̣ха̄со а̄йуппама̄н̣ам̣, маджджхимена упад̣д̣хакаппо, пан̣ӣтена каппо. там̣ сандха̄йетам̣ вуттам̣. нирайампи гаччхатӣти нирайагаманӣйасса каммасса аппахӣнатта̄ апара̄парам̣ гаччхати, на анантарамева. тасмим̣йева бхаве паринибба̄йатӣти тасмим̣йева рӯпабхаве т̣хатва̄ паринибба̄йати, на хет̣т̣ха̄ отарати. йадидам̣ гатийа̄ упапаттийа̄ сатӣти йам̣ идам̣ гатийа̄ ча упапаттийа̄ ча сати секхасса арийаса̄вакасса пат̣исандхивасена хет̣т̣ха̄ анотаритва̄ тасмим̣йева рӯпабхаве упари дутийататийа̄дӣсу ан̃н̃атарасмим̣ брахмалоке паринибба̄нам̣, путхуджджанасса пана нирайа̄дигаманам̣, идам̣ на̄на̄каран̣анти аттхо.

две каппа̄ти еттха̄пи дутийаджджха̄нам̣ вуттанайенева тивидхам̣ хоти. таттха пан̣ӣтабха̄ванена ниббатта̄нам̣ ат̣т̣хакаппа̄ а̄йуппама̄н̣ам̣, маджджхимена чатта̄ро, хӣнена две. там̣ сандха̄йетам̣ вуттам̣. чатта̄ро каппа̄ти еттха йам̣ хет̣т̣ха̄ вуттам̣ ‘‘каппо, две каппа̄’’ти, тампи а̄харитва̄ аттхо ведитаббо. каппоти ча гун̣ассапи на̄мам̣, тасма̄ каппо две каппа̄ чатта̄ро каппа̄ти айаметтха аттхо дат̣т̣хаббо. идам̣ вуттам̣ хоти – йо пат̣хамам̣ вутто каппо, со две ва̄ре ган̣етва̄ екена гун̣ена две каппа̄ хонти, дутийена чатта̄ро, пуна те чатта̄ро каппа̄ти имехи чатӯхи гун̣ехи гун̣ита̄ екена гун̣ена ат̣т̣ха хонти, дутийена сол̣аса, татийена дваттим̣са, чатуттхена чатусат̣т̣хӣти. евамидха пан̣ӣтаджджха̄навасена чатусат̣т̣хи каппа̄ гахита̄ти ведитабба̄. пан̃ча каппасата̄нӣти идам̣ пан̣ӣтассева упапаттиджджха̄насса васена вуттам̣. вехаппхалесу ва̄ пат̣хамаджджха̄набхӯмиа̄дӣсу вийа тин̣н̣ам̣ брахмалока̄нам̣ абха̄вато еттакамева а̄йуппама̄н̣ам̣. тасма̄ евам̣ вуттам̣.