(12) 2. кесивагго

1. кесисуттаван̣н̣ана̄

111. дутийасса пат̣хаме кесӣти тасса на̄мам̣. ассадамме са̄ретӣти ассадаммаса̄ратхи. сан̣хенапи винетӣтиа̄дӣсу тасса ануччхавикам̣ сакка̄рам̣ катва̄ субходжанам̣ бходжетва̄ мадхурапа̄нам̣ па̄йетва̄ мудувачанена самуда̄чаритва̄ даменто сан̣хена дамети на̄ма, джа̄н̣убандханамукхабандхана̄дӣхи чева патодавиджджханакаса̄бхигха̄тапхарусавачанехи ча даменто пхарусена дамети на̄ма, ка̄лена ка̄лам̣ тадубхайам̣ каронто сан̣хапхарусена дамети на̄ма.

2. джавасуттаван̣н̣ана̄

112. дутийе аджджавена̄ти уджукабха̄вена. джавена̄ти падавегена. кхантийа̄ти адхива̄санаккхантийа̄. сораччена̄ти сучибха̄васӣлена. пуггалагун̣ан̇гесу джавена̄ти н̃а̄н̣аджавена. сесаметтха утта̄наттхамева.

3. патодасуттаван̣н̣ана̄

113. татийе патодаччха̄йанти виджджханаттхам̣ уккхиттасса патодасса чха̄йам̣. сам̣виджджатӣти ‘‘джаво ме гахетаббо’’ти саллаккхан̣авасена сам̣виджджати. сам̣вегам̣ а̄паджджатӣти сам̣вегам̣ пат̣ипаджджати ломаведхавиддхоти ломакӯпе патодаведхена виддхаматто. чаммаведхавиддхоти чхавичаммам̣ чхиндантена патодаведхена виддхо. ат̣т̣хиведхавиддхоти ат̣т̣хим̣ бхиндантена ведхена виддхо. ка̄йена̄ти на̄мака̄йена. парамасаччанти нибба̄нам̣. саччхикаротӣти пассати. пан̃н̃а̄йа̄ти сахавипассана̄йа маггапан̃н̃а̄йа.

4. на̄гасуттаван̣н̣ана̄

114. чатуттхе ат̣т̣хим̣ катва̄ти ат̣т̣хико хутва̄. тин̣аванинна̄дасадда̄нанти еттха тин̣авоти д̣ин̣д̣имо, нинна̄дасаддоти саббесампи екатомиссито маха̄саддо. д̣ам̣са̄дӣсу д̣ам̣са̄ти пин̇галамаккхика̄, макаса̄ макаса̄ва. кхиппан̃н̃ева ганта̄ хотӣти сӣласама̄дхипан̃н̃а̄вимуттивимуттин̃а̄н̣адассана̄ни пӯретва̄ сӣгхамева ганта̄ хоти.

5. т̣ха̄насуттаван̣н̣ана̄

115. пан̃чаме т̣ха̄на̄нӣти ка̄ран̣а̄ни. анаттха̄йа сам̣ваттатӣти ахита̄йа авад̣д̣хийа̄ сам̣ваттати. еттха ча пат̣хамам̣ опа̄таккхан̣анамаччхабандханасандхиччхедана̄дибхедам̣ садуккхам̣ савигха̄там̣ па̄пакаммам̣ ведитаббам̣, дутийам̣ самаджӣвика̄нам̣ гихӣнам̣ пуппхаччхад̣д̣ака̄дикаммам̣ судха̄кот̣т̣ана-гехаччха̄данаасучит̣т̣ха̄насаммаджджана̄дикамман̃ча ведитаббам̣, татийам̣ сура̄па̄нагандхавилепанама̄ла̄пил̣андхана̄дикамман̃чева асса̄давасена паваттам̣ па̄н̣а̄типа̄та̄дикамман̃ча ведитаббам̣, чатуттхам̣ дхаммассаванаттха̄йа гаманака̄ле суддхаваттхаччха̄дана-ма̄ла̄гандха̄дӣнам̣ а̄да̄йа гаманам̣ четийаванданам̣ бодхиванданам̣ мадхурадхаммакатха̄саванам̣ пан̃часӣласама̄да̄нанти евама̄дӣсу соманассасампайуттам̣ кусалакаммам̣ ведитаббам̣. пурисатха̄мети пурисасса н̃а̄н̣атха̄масмим̣. сесадвайепи есева найо.

6. аппама̄дасуттаван̣н̣ана̄

116. чхат̣т̣хе йато кхоти йада̄ кхо. сампара̄йикасса̄ти десана̄маттаметам̣, кхӣн̣а̄саво пана нева сампара̄йикасса, на дит̣т̣хадхаммикасса маран̣асса бха̄йати. сова идха адхиппето. кечи пана ‘‘самма̄дит̣т̣хи бха̄вита̄ти вачанато сота̄паннам̣ а̄дим̣ катва̄ саббепи арийа̄ адхиппета̄’’ти ваданти.

7. а̄раккхасуттаван̣н̣ана̄

117. саттаме аттарӯпена̄ти аттано анурӯпена ануччхавикена, хитака̄мена̄ти аттхо. раджанӣйесӯти ра̄гасса паччайабхӯтесу. дхаммесӯти сабха̄весу, ит̣т̣ха̄рамман̣есӯти аттхо. евам̣ саббаттха найо ведитаббо. на раджджатӣти дит̣т̣хивасена на раджджати. сесападесупи есева найо. на ча пана саман̣авачанахетупи гаччхатӣти саман̣а̄нам̣ парава̄дӣнам̣ вачанахетупи аттано дит̣т̣хим̣ паха̄йа тесам̣ дит̣т̣хивасена на гаччхатӣти аттхо. идха̄пи кхӣн̣а̄савова адхиппето.

8-10. сам̣веджанӣйа̄дисуттаттайаван̣н̣ана̄

118-120. ат̣т̣хаме дассанӣйа̄нӣти пасситаббайуттака̄ни. сам̣веджанӣйа̄нӣти сам̣вегаджанака̄ни. наваме джа̄тибхайанти джа̄тим̣ а̄раббха уппаджджанакабхайам̣. сесападесупи есева найо. дасаме аггибхайанти аггим̣ пат̣ичча уппаджджанакабхайам̣. сесападесупи есева найо.

кесивагго дутийо.